މިހާރު އެވްރެޖުކޮށް ދުވާލެއްގެ މައްޗަށް 7000 އަށްވުރެ ގިނަ ފަތުރުވެރިން ރާއްޖެ ޒިޔާރަތްކުރާކަމަށް ފަތުރުވެރިކަމާއި ބެހޭ ވުޒާރާގެ ތަފާތު ހިސާބުތަކުން ދައްކައިފިއެވެ.

ފަތުރުވެރިކަމާއި ބެހޭ ވުޒާރާއިން އެންމެފަހުން އާންމުކޮށްފައިވާ ތަފާސް ހިސާބުތަކަށް ބަލާއިރު މިމަހުގެ 17 ވަނަ ދުވަހާއި ހަމައަށް 326،424 ފަތުރުވެރިން ރާއްޖެއަށް ޒިޔާރަތްކޮށްފައިވެއެވެ. މއީ ވޭތުވެ ދިޔަ އަހަރާއި އަޅާބަލާއިރު 47201 ފަތުރުވެރިން އިތުރު އަދަދެކެވެ. ވޭތުވެދިޔަ އަހަރު މި މުއްދަތުގައި ރާއްޖެއަށް ޒިޔާރަތްކޮށްފައިވަނީ 279،223 ފަތުރުވެރިންނެވެ.

ވަކިވަކި ޤައުމުތަކުން މިހާތަނަށް ރާއްޖެއަށް ޒިޔާރަތްކޮށްފައިވާ ފަތުރުވެރިންނަށް ބަލާއިރު އެންމެގިނަ ފަތުރުވެރިން އައިސްފައިވަނީ ޗައިނާ މާކެޓުންނެވެ. ދެވަނައަށް އެންމެގިނަ މީހުން އައިސްފައިވަނީ އިޓަލީ ވިލާތުންނެވެ. އަދި ތިން ވަނާގައި އުޅެނީ ރަޝިޔާއެވެ.

މިމަހުގެ 17 ވަނަ ދުވަހާއި ހަމައަށް އެންމެ ގިނަ ފަތުރުވެރިން އައިސްފައިވާ 5 ޤައުމަކީ:-

ޗައިނާ - 47،185 ފަތުރުވެރިން

އިޓަލީ - 31،039 ފަތުރުވެރިން

ރަޝިއާ - 30،927 ފަތުރުވެރިން

އިނގިރޭސިވިލާތް - 28،858 ފަތުރުވެރިން

އިންޑިއާ - 22،555 ފަތުރުވެރިން

ފަތުރުވެރިކަމާއި ބެހޭ ވުޒާރާގެ ތަފާސްހިސާބުތަކުން އެނގޭ ގޮތުގައި މިހާރު ރާއްޖެ ޒިޔާރަތްކުރާ ފަތުރުވެރިން އެވްރެޖުކޮށް 7 ދުވަސް ވަންދެން ރާއްޖޭގައި މަޑުކުރެއެވެ.

ވޭތުވެ ދިޔަ އަހަރު ރާއްޖެއަށް 1.8 މިލިޔަން ފަތުރުވެރިން ޒިޔާރަތް ކޮށްފައިވާއިރު މިއަހަރަށް ސަރުކާރުގެ އަމާޒަކީ 2 މިލިއަން ފަތުރުވެރިން ގެނައުމެވެ. ފަތުރުވެރިކަމުގެ ވުޒާރާއިން ހާމަކޮށްފައިވާ ގޮތުގައި އެ ވުޒާރާގެ އަމާޒަކީ 2.3 މިލިޔަން ފަތުރުވެރިން މިއަހަރު ރާއްޖެ ގެނައުމެވެ.