މިއަހަރުގެ މެއި މަހުގެ 10 ވަނަ ދުވަހުގެ ކުރިން ރާއްޖޭގައި ތިބި ހުރިހާ ސިފައިން ރާއްޖެއިން ފައިބައިގެން ދާނެކަމަށް ރައީސުލްޖުމުހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.

އެމަނިކުފާނު މިފަދައިން ވިދާޅުވެފައިވަނީ މިހާރު އައްޑުއަށް ކުރައްވަމުން ގެންދަވާ ދަތުރުފުޅުގައި މިރޭ އައްޑޫ ފޭދުގެ ރައްޔިތުންނާއި ބައްދަލުކުރައްވާ ވާހަކަފުޅު ދައްކަވަމުންނެވެ.  

އެމަނިކުފާނު އިތުރަށް ވިދާޅުވީ އިންޑިއާ ސިފައިންގެ ފުރަތަމަ ގްރޫޕް އަންނަމަހުގެ 10 ވަނަ ދުވަހު ރާއްޖެއިން ފައިބާނެ ކަމަށާއި އަދި ދެން ތިބި އެންމެން މެއި މަހުގެ 10 ވަނަ ދުވަހު ރާއްޖެއިން ފައިބައިގެން ދާނެ ކަމަށެވެ.

މިރޭގެ ޖަލްސާގައި ރައީސް އިތުރަށް ވިދާޅުވީ އެމަނިކުފާނުގެ ސަރުކާރުން މަސައްކަތް ކުރައްވަމުން ގެންދަނީ ދުނިޔޭގެ ބެސްޓް ޕްރެކްޓިސްއާއި އެއްގޮތަށް ވާހަކަ ދައްކައިގެން ކަންތައްތައް ހައްލުކުރުމަށް އިސްކަން ދިނުމުގެ ސިޔާސަތެވެ. މިއަދު އިންޑިއާ ސިފައިންވެސް ރާއްޖެއިން ބޭލުމުގެ ކަންތައްތައް ވެސް މިހާ އަވަހަށް ކާމިޔާބު ވުމުގެ ސިއްރަކީވެސް މިކަމުގައި ރާއްޖެއިން ޑިމޮކްރެޓިކް އުސޫލު އިސްކުރުމުގެސަބަބުން ކަމަށެވެ.    

ރައީސުލްޖުމުހުރިއްޔާ ޑރ. މުހައްމަދު މިފަދައިން ވިދާޅުވެފައިވާއިރު މި ސަރުކާރު ވެރިކަމަށް އައުމަށް އެންމެ ބޮޑަށް ވަކާލާތުކުރަމުން ދިޔަ އެއްކަމަކީވެސް ރާއްޖޭގައި ތިބި އިންޑިއާ ސިފައިން ބޭލުމުގެ ބޮޑު ވައުދެވެ.

މިކަން ކުރުމަށްޓަކައި މިހާތަނަށް ދެ ޤައުމުގެ އެންމެ މަތީފަންތީގެ ބޭފުޅުންގެ ބައްދަލުވުންތަކެއް ބޭއްވިފައިވާއިރު ދެ ޤައުމުގެ ސަރުކާރުންވެސް މިހާރުވަނީ ރާއްޖޭގައި ޤައިމުވެފައިތިބި އިންޑިއާ ސިފައިން ރާއްޖެއިން ގެންދާނެކަން ހާމަކޮށްފައެވެ.