ފުވައްމުލައް ސިޓީގެ މަގުތައް ހެދުމުގެ ދެވަނަ ފަޔަވަހީގެ އަމަލީ މަސައްކަތްތައް ރައީސުލްޖުމުހޫރިއްޔާ ޑރ.މުހައްމަދު މުއިއްޒު ފައްޓަވައި ދެއްވައިފިއެވެ.

އެމަނިކުފާނު މި މަޝްރޫއު ފައްޓަވައިދެއްވާފައި މިވަނީ މިހާރު ރާއްޖޭގެ ދެކުނަށް  ކުރައްވަމުން ގެންދަވާ  ދަތުރުފުޅުގެ ތެރެއިން މިއަދު ހަވީރު ފުވައްމުލައް ސިޓީއަށް ވަޑައިގެން އެކަމަށް ހާއްޞަކުރެވިގެން ބޭއްވުނު ރަސްމިއްޔާތެއްގައެވެ.

މި ރަސްމިއްޔާތުގައި އެމަނިކުފާނުގެ އިތުރުން އިމާރާތްކުރުމާއި ބިނާރާބެހޭ ވަޒީރު ޑރ.ޢަބްދުﷲ މުއްޠަލިބާއި ފުވައްމުލައް ސިޓީގެ މޭޔަރ އިސްމާޢީލް ރަފީޤް އަދި މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ އެމްޓީސީސީގެ ސީއީއޯ ޢަބްދުﷲ ޒިޔާދު އަމަލީގޮތުން ބައިވެރިވެ ވަޑައިގެންނެވިއެވެ.

ރައީސުލްޖުމުހޫރިއްޔާ ފުވައްމުލަކު ސިޓީއަށް ކޮށްދެއްވާނެކަމަށް ވިދާޅުވި މަގުތައް ރަނގަޅު ފެންވަރަކަށް ހަދައިދެއްވުމުގެ ވަޢުދުގެ ޢަމަލީ މަސައްކަތް މިއަދު ފައްޓަވައި ދެއްވިއިރު މި މަސައްކަތަކީ އެމްޓީސީސީ އާއި ހަވަލުކުރެވިގެން ކުރިއަށް ގެންދިއުމަށް ހަމަޖެހިފައިވާ މަސައްކަތެކެވެ.

އެމްޓިސީސީން މައުލޫމާތު ދެއްވާފައިވާ ގޮތުގައި ފުވައްމުލައް ސިޓީގެ މަގުތައް ހެދުމުގެ ދެވަނަ ފަޔަވަހީގެ މަސައްކަތް ނިމޭއިރު 50 މަގެއް (ގާތްގަޑަކަށް 12.7 މީޓަރ) ގައި ތާރުއެޅި އެންމެ ޒަމާނީ ފެންވަރަށް ހެދިގެން ދާނެއެވެ. މިކަމަށް މުޅި ޖުމުލަ 225 މިލިޔަން ރުފިޔާ ޚަރަދުވާނެކަމަށްވެސް އެމްޓީސީސީން މަޢުލޫމާތު ދެއްވައެވެ.

މިއަދުގެ ފުވައްމުލައް ސިޓީގައި މި ފެށުނު މަޝްރޫޢުއަކީ ރައީސް ޑރ.މުހައްމަދު މުއިއްޒު ވެރިކަމާއި ހަވާލުވެ ވަޑައިގެންނެވުމަށްފަހު އެސޓީގައި ފެށިގެން ދިޔަ ތަރައްޤީގެ އެންމެ ބޮޑު އެއް މަޝްރޫޢުއެވެ.

ފުވައްމުލައް ސިޓީ ރައްޔިތުންގެ އެންމެ ބޮޑުއެއް ސަކުވާއަކަށްވެފައި ވަނީ ވިއްސާރަ މޫސުމުގައި މަގުތަކުގައި ފެންހެދި ދުއްވާ އެއްޗެހި ދުންވުމަށާއި އަދި ހިނގާބިގާވެ އުޅުމުގައި އުނދަގޫތައް ތަހައްމަލުކުރަން ޖެހުމެވެ. އެހެންކަމުން ރިޔާސީ ކެންޕެއިންގެ ތެރޭގައި ރައީސް ޑރ.މުހައްމަދު މުއިއްޒުވަނީ ވުވައްމުލަކު ސިޓީގެ މަގުތައް ރަނގަޅު ފެންވަރަކަށް ހައްދަވައި ދެއްވާނެކަމަށް ވިދާޅުވެފައެވެ.