ކޮންމެ ރައީސަކަށްވެސް ވެރިކަން ކުރުމަށްޓަކައި އިންސާފުވެރި ވަގުތު ދޭން ޖެހޭ ކަމަށް އިސްލާމީކަންތަންތަކާއި ބެހޭ ވަޒީރު ޑރ.މުހައްމަދު ޝަޙީމް ޢަލީ ސައިދު ވިދާޅުވެއްޖެއެވެ.
ވަޒީރު ޝަހީމް މިފަދައިން ވިދާޅުވެފައި ވަނީ ރައީސުލްޖުމުހޫރިއްޔާ ޑރ. މުހައްމަދު މުއިއްޒު މިހާރު ރާއްޖޭގެ ދެކުނުގެ އަތޮޅުތަކަށް ކުރައްވަމުން ގެންދަވާ ދަތުރުފުޅުގައި މިއަދު ފުވައްމުލައް ސިޓީއަށް ވަޑައިގެން ރޭ އެ ސިޓީގެ ރައްޔިތުންނާއި ބައްދަލުކޮށްލުމަށް ބޭއްވުނު ޖަލްސާގައި ވާހަކަ ދައްވަމުންނެވެ.
ވަޒީރު ޝަހީމް ވިދާޅުވީ ރައީސް ޑރ.މުހައްމަދު މުއިއްޒުގެ ޒަޢާމަތުގައި މިވީ 13 ހަފްތާގެ ތެރޭގައި ވަރަށް ކާމިޔާބު މަސައްކަތްތަކެއް ރައްޔިތުންނަށްޓަކައި ކޮށްދެއްވާފައިވާ ކަމަށާއި، އަދި ކުރިއަށް ރޭވިފައިވާ ކަންތައްތަކަކީ މާފުރިހަމަ މާގިނަ ކަންތައްތަކެއް ކަމަށެވެ.
ރައީސް ޑރ.މުހައްމަދު މުއިއްޒު ވެރިކަމާއި ހަވާލުވެ ވަޑައިގެންނެވިއިރު ޤައުމު އޮތީ އިޤްތިޞާދީގޮތުން ފުން ވަޅުގަނޑެއްގެ ތެރޭގައި ކަމަށާއި، އެގޮތުން ރާއްޖެ އޮތީ 120 ބިލިއަން ރުފިޔާއަށް ދަރާފައި ކަމަށެވެ. އަދި ސަރުކާރުގެ ކުންފުނިތައްވެސް އޮތީ ދަރާވިކިފައި ކަމަށް ވަޒީރު ފާހަގަ ކުރެއްވިއެވެ.
"މިކަންކަމުން ޤައުމު ސަލާމަތް ކުރުމަށްޓަކައި ހިންމަތާއި، ހިތްވަރާއި ކެތްތެރިކަމާއި އެކުގައި މަސައްކަތް ކުރަމުންދާ ޒުވާން ވަރުހުރި ރައީސްއެއްގެ ވެރިކަން 13 ހަފްތާ ތެރޭގައި ގުޑުވާލަން މަސައްކަތް ކުރަނީ ކީއްވެގެންތޯ ވިސްނާލަން ޖެހޭ،".
މަޖިލިސްތެރެއިން ރައީސުލްޖުމުހުރިއްޔާ އަޒުލްކުރުމަށް އެމްޑީޕީން މަސައްކަތް ކުރަމުންދާ ދިއުމަށް އިޝާރާތް ކުރައްވާ ވަޒީރު ޝަހީމް ވިދާޅުވިއެވެ.
މިރޭގެ މިޖަލްސާގައި ވަޒީރު ޝަހީމްވަނީ އެބޭފުޅާގެ ވުޒާރާއިން ރޭވިގެން ހިންގަމުން ގެންދާ ގިނަ މަޝްރޫޢޫތަކެއްގެ، ވަކިން ޚާއްޞަކޮށް ފުވައްމުލައް ސިޓީއަށް މިހާތަނަށް ކޮށްދެވިފައިވާ އަދި ކޮންދިނުމަށް ރާއްވަވާފައިވާ ވަރަށް ގިނަ ކަންތައްތަކެއް ހިއްސާކުރައްވާފައެވެ.
Advertisement
This content is created and paid for by advertisers and does not involve Voice Journalists
