ކޮވިޑް-19 ގެ ވެކްސިން ޖަހާފައިވާ މީހުންނަށް ބޮޑެތި ބަލިތައް ޖެހުމުގެ ފުރުސަތު އޮތް ކަމަށް ދިރާސާ އަކުން ދައްކައިފިއެވެ.

8 ގައުމަކުން 99 މިލިއަން މީހުންގެ ޑޭޓާ ބޭނުންކޮށްގެން ކުރި މި ދިރާސާއިން ދައްކާގޮތުގައި ކޮވިޑް-19ގެ އެކި ވެކްސިންތަކުގެ ސަބަބުން ކުރާ ނޭދެވޭ އަސަރުތައް ކަމާބެހޭ މާހިރުން ލަފާކުރި ވަރަށް ވުރެ ގިނަ ކަމަށް ގްލޯބަލް ވެކްސިން ޑޭޓާ ނެޓްވޯކް (ޖީވީޑީއެން) ވަނީ ހާމަކޮށްފައެވެ.

މިމަހުގެ 12 ވަނަ ދުވަހު މެޑިކަލް ޖާނަލް ވެކްސިންގައި ޝާއިއުކުރި މި ދިރާސާގައި ވަނީ ނިއުރޯލޮޖިކަލް، ލޭ، އަދި ހިތާއި ގުޅުންހުރި 13 ހާލަތަކަށް އަލި އަޅުވާލާފައެވެ. މި ދިރާސާގައި ބައިވެރިވި ބޮޑު އާބާދީގެ ސަބަބުން މަދުން ނޫނީ ނުފެންނަ ވެކްސިން ސޭފްޓީ ސިގްނަލްތައް ދެނެގަތުމުގެ ފުރުސަތު އިތުރުވި ކަމަށް މި ދިރާސާގައި ބޮޑު ރޯލެއް އަދާކޮށްފައިވާ ކްރިސްޓީނާ ފަކްސޯވާ ވަނީ ބުނެފައެވެ.

Advertisement

ޖީވީޑީއެން ހާމަކޮށްފައިވާ ގޮތުގައި، ކޮވިޑް ވެކްސިންތަކެއް ކަމަށްވާ ފައިޒަރ/ބަޔޮންޓެކް (ބީއެންޓީ162ބީ2) އަދި މޮޑަރނާ (އެމްއާރްއެންއޭ-1273) ޝޮޓް ނެގި މީހުންގެ ތެރެއިން، ހިތުގެ ބަލިތައް ކަމަށްވާ މަޔޯކާޑިޓިސް އަދި ޕެރިކާޑިޓިސް އަލާމާތްތައް ފެނިފައިވާ ފަރާތްތައް ގިނަކަމަށް މި ދިރާސާއިން ވަނީ ދައްކާފައެވެ.

ދިރާސާއިން ދައްކާގޮތުގައި ކޮވިޑަށް ދިން އަނެއް ވެކްސިން ކަމަށްވާ އެސްޓްރާޒެނެކާގެ ވައިރަލް ވެކްޓަރ ވެކްސިންގެ ތިންވަނަ ޑޯޒް ދިން މީހުންނަށް ޕެރިކާޑިޓިސް ބަލި ޖެހުމުގެ ރިސްކް 6.9 ގުނަ އިތުރެވެ. އަދި މި ވެކްސިން ދިން މީހުންގެ ތެރޭގައި މަދުން ނޫނީ ނުފެންނަ ނާރުގެ ބައްޔެއް ކަމަށްވާ އޮޓޯއިމިއުން ޑިސްއޯޑާ ގިލެން-ބާރޭ ސިންޑްރޯމް ޖެހުމުގެ ފުރުސަތު އެބަ އޮތް ކަމަށާއި، މި ވެކްސިންގެ ސަބަބުން ލޭ ހޮޅި ބެދުމުގެ ފުރުސަތު ވެސް އޮތް ކަމަށް ދިރާސާއިން ވަނީ ދައްކާފައެވެ.

މީގެ އިތުރުންވެސް ކޮވިޑް 19 އިން ރައްކާތެރިވުމަށް ދިން މޮޑަރނާގެ ވެކްސިންގެ ސަބަބުން ނާރުގެ ބައްޔެއް ކަމަށްވާ އެކިއުޓް ޑިސެމިނޭޓެޑް އެންސެފަލޯމައިލައިޓިސް (އޭޑީއީއެމް) ގެ އަލާމާތްތައް ފެނިފައިވާ ފަރާތްތަކުގެ ނިސްބަތް މަތިވެފައިވާއިރު، މި ވެކްސިންގެ ފުރަތަމަ ޝޮޓް ދިންތާ 42 ދުވަހުގެ ތެރޭގައި އޭޑީއީއެމް ގެ ދެ ކޭސް އެއް ފެނިފައިވާ ކަމަށް މި ދިރާސާއިން ދައްކައެވެ. އަދި މޮޑެނާގެ ވެކްސިންގެ ފުރަތަމަ ޑޯޒް އަދި ހަތަރުވަނަ ޑޯޒް ދިން މީހުންނަށް ވެސް ޕެރިކާޑިޓިސް ޖެހުމުގެ ރިސްކް އިތުރެވެ.

ދިރާސާ އިން މިފަދައިން ދައްކާފައިވާއިރު ދުނިޔޭގެ 71 އިންސައްތަ މީހުން ވަނީ އެންމެ މަދުވެގެން ކޮވިޑް ވެކްސިންގެ އެއް ޑޯޒް ޖަހާފައެވެ. މި ދިރާސާއިން މި ބަލިތައް ޖެހުމުގެ ފުރުސަތު އޮތް ކަމަށް ދެއްކި ނަމަވެސް ކޮވިޑް 19 ގެ ވެކްސިން ފުރިހަމަ ކުރުމަށް ކަމާބެހޭ ފަރާތްތަކުން ވަނީ އިލްތިމާސްކޮށްފައެވެ. 

ކޮވިޑް ވެކްސިންތައް ކަމަށްވާ މޮޑެނާ، ފައިޒަރ-ބަޔޮންޓެކް އަދި އެސްޓްރާޒެނެކާގެ ވެކްސިންތަކަކީ ބޮޑެތި އިންފެކްޝަންތަކުން ރައްކާތެރިވުމަށް ބޭނުންކުރާ ވެކްސިންތަކެއް ތަކެއް ކަމަށާއި، ކޮންމެ ވެކްސިނެއްގައި ވެސް އޭގެ ދެ ފުށް އޮންނާނެ ކަން ކަމާބެހޭ ފަރާތްތަކުން ބުނެއެވެ.