ވޭތުވެދިޔަ 2023 ވަނަ އަހަރު ނިމުނުއިރު ދައުލަތުގެ ބޭރުގެ ދަރަނީގެ ޖުމުލަ އަދަދަކީ 51.1 ބިލިއަން ރުފިޔާ ކަމަށް ނިމިދިޔަ ސަރުކާރުގެ މާލީވަޒީރު އިބުރާހިމް އަމީރު ވިދާޅުވެއްޖެއެވެ.

އަމީރު މިފަދައިން ވިދާޅުވެފައިވަނީ އެކްސް މެދުވެރިކޮށް ކުރެއްވި ޕޯސްޓެއްގައެވެ.

ނިމިދިޔަ ސަރުކާރުގެ މާލީވަޒީރުގެ ޕޯސްޓުގައި ވިދާޅުވެފައި ވަނީ ދައުލަތުގެ ބޭރުގެ ދަރަނީގެ 51 ބިލއަން އަކީ ސިދާ ދައުލަތުން ބޭރުގެ ފަރާތްތަކުން ނަގާފައިވާ 37.3 ބިލިއަން ރުފިޔާގެ އިތުރުން ދަޢުލަތުން ސޮވްރިންގ ގެރެންޓީދީގެން ނަގާފައިވާ 13.7 ބިލިއަން ރުފިޔާ ހިމެނޭހެން ޖުމްލަ އަދަދު ކަމަށެވެ.

Advertisement

ކުރީގެ ފިނޭންސް މިނިސްޓަރ މިފަދައިން އެކްސް ޕޮސްޓެއް ކުރައްވާފައިވާއިރު ރައީސް ޑރ.މުހައްމަދު މުއިއްޒުގެ ސަރުކާރުން ބުނަމުން ދަނީ މި ސަރުކާރު ވެރިކަމާއި ހަވާލުވި އިރު ދަޢުލަތުގެ ބޭރުގެ ދަރަނީގެ ޖުމްލަ 120 ބިލިއަން ރުފިޔާއަށް އަރާކަމަށައި، އެކަމާއި ހުރެ ރާއްޖޭގެ ތަރައްޤީގެ މަޝްރޫޢުތައް ހިންގުމަށްވެސް ދަތި ތަކާއި ކުރިމަތިލާން ޖެހިފައިވާ ކަމަށެވެ.

އެކަމަށް އިޝާރާތްކޮށް އަމީރުގެ ޕޯސްޓުގައި ބުނެފައި ވަނީ ސަރުކާރުތައް ބަދަލުވިޔަސް މި ޤައުމު ނުހުއްޓި ކުރިޔަށް ދާނެކަމަށާއި، 2018 ވަނަ އަހަރު ސަރުކާރު ބަދަލުވިއިރުވެސް އެތައް ބިލިއަން ރުފިޔާގެ ބިލް ޕޭ ކުރަން ޖެހިފައި ހުރި ކަމަށެވެ.

އަމީރު މިފަދައިން ވިދާޅުވި އިރު މި ސަރުކާރުގެ އެކި އެކި ވުޒާރާތަކުން ގެންދަނީ ނިމިދިޔަ ސަރުކާރުން އަމިއްލަ ކުންފުނިތައް ލައްވާ ސަރުކާރުގެ މަސައްކަތްތައް ކުރުވާފައި އެފަރާތްތަކަށް ދޭން ޖެހިފައިވާ އެތައް ބައިވަރު ރުފިޔާއެއް ހުރިކަމަށް ބުނަމުންނެވެ. މީގެ އިތުރުން ރައީސް ޑރ.މުހައްމަދު މުއިއްޒު މިހާރު ރާއްޖޭގެ ދެކުނަށް ކުރައްވަމުން ގެންދަވާ ދަތުރުފުޅުގެ ތެރޭގައި އެމަނިކުފާނު ވިދާޅުވެފައި ވަނީ ރައީސް ޞާލިޙްގެ ސަރުކާރު ނިމުނު އިރު ކުންފުނިތަކަށް އެކަނި ދައުލަތުން ދައްކަން ޖެހޭ ފައިސާގެ އަދަދު 9 ބިލއަނަށް އަރާ ކަމަށެވެ.

މި ސަރުކާރުން ދައްކަވާ މިފަދަ ވާހަކަތަކަށްވެސް އަމީރުގެ ޕޯސްޓުގައި ވަނީ ރައްދު ދެއްވާފައެވެ.

އަމީރު މިފަދައިން ވިދާޅުވެފައިވާ އިރު ދާދިފަހުން ރާއްޖެއަށް ޒިޔާރަތް ކުރެއްވި ދުނިޔޭގެ މާލީ އިދާރާތަކުން ވަނީ ނިމިދިޔަ ސަރުކާރުން ގެންގުޅުނު މާލީ ސިޔާސަތު ބަދަލުކުރަން އޭރު އެންގިފައިވާނެ ކަމަށާއި އަދި މި ސަރުކާރުގެ މާލީ ސިޔާސަތުތަކަށް ތާއިދު ކުރާކަން ހާމަކުރައްވާފައެވެ.