ގއ. ކަނޑުހުޅުދޫ ރައްޔިތުންގެ ހުރި ކަންބޮޑުވުންތައް ރައީސުލްޖުމްހޫރިއްޔާ ޑރ. މުހައްމަދު މުއިއްޒާއި ހިއްސާކޮށްފިއެވެ.

ކަނޑުހުޅުދޫ ރައްޔިތުންގެ ކަންބޮޑުވުންތައް ހިއްސާކޮށްފައި ވަނީ ރައީސް ޑރ.މުހައްމަދު މުއިއްޒު ރާއްޖޭގެ ދެކުނުގެ 4 އަތޮޅަށް މިހާރު ކުރައްވަމުން ގެންދަވާ ދަތުރުފުޅުގެ ތެރެއިން މިއަދު ގއ.ގެމަނަފުށްޓަށް ވަޑައިގެންނެވުމުން ގއ. ކަނޑުހުޅުދޫ ކައުންސިލާ އ.ތ.މ ކޮމިޓީގެ މެމްބަރުންނާއި ރައީސުލްޖުމުހޫރިއްޔާ ބައްދަލުކޮށްލެއްވި ބައްދަލުކޮށްލުމުގެ ތެރެއިންނެވެ.

ގއ. ގެމަނަފުށީ ކައުންސިލުގެ އިދާރާގައި ކުރިއަށް ގެންދެވުނު މި ބައްދަލުވުމުގައި ގއ. ކަނޑުހުޅުދޫ ކައުންސިލާ އ.ތ.މ ކޮމިޓީގެ މެމްބަރުން ވަނީ ޒުވާނުންގެ ތަރައްޤީއަށް ބޭނުންވާކަންކަމާއި އޭޓީއެމް ޚިދުމަތަކީ އެރަށުގެ ރައްޔިތުން އެންމެ ބޮޑަށް އެދެމުންދާ ކަންތައްތައްކަން ފާހަގަކުރައްވައިފައެވެ. މީގެ އިތުރުން ސްކޫލްގެ ޖާގައިގެ ދަތިކަން ހައްލުކުރުމާއި މަލްޓިޕާރޕަސް ހޯލުގެ މަސައްކަތް އަވަސްކުރުމާއި ބަނދަރުގެ ޖާގަ އިތުރުކުރަން ބޭނުންވާކަން ކައުންސިލުން ފާހަގަކުރެއްވިއެވެ. އަދި މެޖިސްޓްރޭޓް ކޯޓުގެ އިމާރާތް އެހެންތަނަކަށް ބަދަލުކުރުމާއި މަގުތައް ރަނގަޅުފެންވަރަކަށް ހަދަން ބޭނުންވާކަން ވަނީ ފާހަގަކުރައްވާފައެވެ.

Advertisement

މި ބައްދަލުވުމުގައި ކަނޑުހުޅުދޫ ރައްޔިތުންގެ ހުރި ކަންބޮޑުވުންތައް އަޑުއެއްސެވުމަށްފަހު ރައީސުލްޖުމުހުރިއްޔާ ވަނީ މަޝްރޫޢުތަކުގެ އެންމެ ފަހުގެ މަޢޫލޫމާތުތައް މި ބައްދަލުކުރެއްވުމުގައި ބައިވެރިވެވަޑައިގެންނެވި ބައެއް ވަޒީރުން މެދުވެރި ކުރައްވާ ހިއްސާކޮށްދެއްވާފައެވެ.

އޭގެ އިތުރުން ރައީސުލްޖުމްހޫރިއްޔާ ވަނީ ކައުންސިލުން އެދިވަޑައިގެންނެވި ކަންކަމަށް ސަމާލުކަން ދެއްވައިގެން މަސައްކަތްކޮށްދެއްވާނެކަމުގައި ވިދާޅުވެފައެވެ.

ރައީސުލްޖުމުހޫރިއްޔާ ގެ މިދަތުރުފުޅުގައި އެމަނިކުފާނު ގެންދަވަނީ ރަށްރަށުގެ ރައްޔިތުންނާއި ބައްދަލުކުރައްވާ އެ ރައްޔިތުންގެ ހުރި ކަންބޮޑުވުންތައް ވަރަށް ގާތުން އަޑުއައްސަވަމުންނެވެ.