ރައީސުލްޖުމްހޫރިއްޔާ ޑރ މުހައްމަދު މުޢިއްޒަށް ކުރިމަތިލައްވަން ޖެހިވަޑައިގެންފައިވަނީ ރާއްޖޭގެ އެހެން އެއްވެސް ރައީސަކަށް އިގްތިޞާދީ ގޮތުން ކުރިމަތިލައްވަން ނުޖެހޭ ވަރުގެ ބޮޑު ގޮންޖެހުމަކާއި ކަމަށް ޕްރިންސިޕަލް އެޑްވައިޒަރު ޓު ދަ ޕްރެސިޑެންޓް އޮން ޓްރޭޑް އިންވެސްޓްމަންޓް މުހައްމަދު އަލީ ޖަނާހް ވިދާޅުވެއްޖެެއެވެ.

ރައީސުލްޖުމްހޫރިއްޔާ ޑރ މުހައްމަދު މުޢިއްޒު ރާއްޖޭގެ ދެކުނަށް ކުރައްވަމުންދާ ދަތުރުފުޅުގެ ތެރެއިން ގއ ވިލިގިނލި އަށް ވަޑައިގެން އެރަށު ރައްޔިތުންނާ ބައްދަލު ކުރައްވަން ބޭއްވި ޖަލްސާގައި ވާހަކަ ދައްކަވަމުން ޖަނާހު ވަނީ އިގްތިސާދީ ގޮތުން ރައީސް މުޢިއްޒަށް ކުރިމަތިލާން ޖެހިވަޑައިގެންފައިވާ ގޮންޖެހުންތަކަށް އަލިއަޅުވާލައްވާފައެވެ. 

މިއާއެކު ޖަނާހު ވިދާޅުވީ، 1990ގެ އަހަރު ތަކުންފެށިގެން، ރާއްޖޭގެ އިގްތިސާދު މެނޭޖު ކުރަމުން އަންނަނީ އެކަން ކުރަންވީ ގޮތަކަށް ނޫން ކަމަށެވެ.

ޖަނާހު އިތުރަށް ވިދާޅުވީ, ރައީސުލްޖުމުހޫރިއްޔާ ބޭނުންފުޅުވަނީ ރާއްޖެ އެހެން ގައުމުތަކަށް އަޅުވެތި ނުވެ، އެހެން ގައުމަކަށް ބުރަ ނުވެ، އަމިއްލަ ފައިމައްޗަށް ތެދުވުމަށް މަސައްކަތް ކުރައްވަން ކަމަށާ، ދިވެހިންގެ އިގްތިޞާދު ދިވެހިންގެ އަތްމަތީގައި އޮންނަން ކަމަށެވެ.

ޖަނާހު ވިދާޅުވީ ރައީސުލްޖުމްހޫރިއްޔާ ކުރައްވަން ފަށްޓަވާފައިވާ މަސައްކަތަކީ، "ހަމައިން ނެއްޓި، އޮޅުން ބޮޅުން ވެފައި އޮތް އިގްތިސާދެއްގެ، އޮޅުން ބޮޅުން ފިލުވައި، ނިއުޅުވައިގެން، ރަނގަޅު ހަމައަކަށް އެޅުވުމުގެ މަސައްކަތްޕުޅު" ކަމަށެވެ.

އަދި އެ ކުރައްވަމުން އެ ގެންދަވާ މަސައްކަތުގެ ތެރެއިން ބޮޑެތި ގޮންޖެހުންތަކާއި ކުރިމަތިލައްވަން ޖެހިވަޑައިގަންނަވާނެ ކަމަށެވެ.

އެހެންކަމުން، ޚިޔާލު ތަފާތުންވުންތައް އޮތް ނަމަވެސް ދިވެހިރާއްޖޭގެ އިގްތިސާދާއި ގުޅިގެން ދޮގު ވާހަކަތައް ނުފަތުރަން ޖަނާހު ވަނީ އެދިވަޑައިގެންފައެވެ. އެފަދައިން ވާހަކަތައް ފަތުރާނަމަ، އިންވެސްޓަރުންގެ އިތުބާރު ރާއްޖެއަށް ގެއްލި، އެކަމުގެ އެންމެ ބޮޑު ގެއްލުމެއް ލިބިގެންދާނެ އާއްމު ރައްޔިތުންނަށް ކަމަށް އޭނާ ވިދާޅުވި އެވެ.