މައުލޫމާތު ހޯދުމާއި ލިބި ގަތުމުގެ ގާނޫނުގެ ދަށުން މިދިޔަ އަހަރު ބޭއްވި ރިޔާސީ އިންތިހާބަށް ރާއްޖޭގެ އެންމެ ބޮޑު ސިޔާސީ ޕާޓީ ކަމަށްވާ އެމްޑީޕީން އަދާލަތު ޕާޓީ އާއި އެމްޑީއޭއާ އެކު ހަދާފައިވާ ކޯލިޝަންގެ މައުލޫމާތު އެ ޕާޓީން މައުލޫމާތު ދޫކުރަން ޖެހޭނެ ކަމަށް އިންފޮމޭޝަން ކޮމިޝަނަރު ނިންމި ނިންމުމެއް އެމްޑީޕީން ހައި ކޯޓުގައި އިސްތިއުނާފުކޮށްފިއެވެ.

މައުލޫމާތު ހޯދުމާއި ލިބި ގަތުމުގެ ގާނޫނުގެ ދަށުން މިދިޔަ އަހަރުގެ ރިޔާސީ އިންތިހާބުގެ ތެރެއިން އެމްޑީޕީން އެމްޑީއޭ އާއި އަދާލަތު ޕާޓީ އާ އެކު ހެދި ކޯލިޝަންގެ އެއްބަސްވުމެއްވާ ނަމަ އެ އެއްބަސްވުމެއްގެ މައުލޫމާތު ހާމަކޮށްދިނުމަށް އާންމު ފަރުދަކު ވަނީ އެދިފަ އެވެ. އަދި އެމްޑީޕީން ކޯލިޝަން ހެދުމަށް ޕާޓީތަކުން ހުށަހަޅާ ހުށަހެޅުންތައް ބަލައިގަތުމުގައި އުސޫލެއް އޮންނަ ނަމަ އެ އުސޫލެއްގެ މައުލޫމާތު ދިނުމަށް ވެސް ވަނީ އެދިފައެވެ.

އެހެން ނަމަވެސް ގާނޫނުގައި މައުލޫމާތުދިނުމަށް އޮތް މުއްދަތުގައި އެމްޑީޕީން ޖަވާބުދީފައެއް ނުވެއެވެ. އެހެންކަމުން  އިންފޮމޭޝަން ކޮމިޝަނަރުގެ އޮފީސް (އައިކޮމް) އިން މައްސަލަ ބެލުމަށް ފަހު އޮކްޓޯބަރު 2023، ގައި ޕާޓީ ގާނޫނުގެ ތެރެއަށް ވަންނަ ކަމަށް ބުނެ އެމްޑީޕީއަށް ވަނީ އެމައުލޫމާތުތައް ދިނުމަށް އަންގާފައެވެ.

ހައިކޯޓުގެ ރަޖިސްޓްރީގައިވާ ގޮތުން ފެބްރުއަރީ 14، ގައި އެމްޑީޕީން ވަނީ ހައި ކޯޓުގައި އެ ނިންމުން އިސްތިއުނާފުކޮށްފައެވެ. ނަމަވެސް އިސްތިއުނާފުގެ މައްސަލަ ބަލައިގަތުމާ މެދު ކޯޓުން އަދި ގޮތެއް ނުނިންމާ ކަން ރަޖިސްޓްރީން ދައްކައެވެ.

މި މައްސަލައިގައި އައިކޮމް އިން ބޭއްވި އަޑުއެހުމުގައި އެމްޑީޕީގެ ވަކީލު އަހުމަދު އަބްދުﷲ އަފީފު ވިދާޅުވީ އެ ޕާޓީން ދެކޭ ގޮތުގައި ގާނޫނުގައި މައުލޫމާތު ދިނުމަށް އޮންނަ ދައުލަތުގެ އިދާރާތަކުގެ ތެރެއަށް އެއްވެސް ސިޔާސީ ޕާޓީއެއް ނުވަންނަ ކަމަށެވެ. އެހެންކަމުން އައިކޮމް އިން އެމްޑީޕީ އެ ގާނޫނަށް ވަންނަ ކަމަށް ނިންމާ ނަމަ ހައި ކޯޓުގައި މައްސަލަ އިސްތިއުނާފު ކުރައްވާނެ ކަމަށް ވެސް ވިދާޅުވިއެވެ.

ސިޔާސީ ޕާޓީތަކުގެ ގާނޫނު ބުނާ ގޮތުން 10،000 އަށް ވުރެ ގިނަ މެންބަރުން ތިބޭ ޕާޓީތަކަށް ދައުލަތުގެ ބަޖެޓުން ފައިސާ ދޫކުރަން ޖެހެއެވެ.

ޕާޓިތަކުގެ ގާނޫނު 2015 ވަނަ އަހަރު އެގޮތަށް ކަނޑައެޅިފަހުން ބައި ލައްކައެއްހާ އާންމު މެންބަރުން ހިމެނޭ އެމްޑީޕީއަށް ކޮންމެ އަހަރަކުވެސް ދައުލަތުގެ ބަޖެޓުން ފައިސާ ލިބެއެވެ. މިގޮތުން މިދިޔަ އަހަރު ވެސް 15.1 މިލިއަން ރުފިޔާ ދޫކޮށްފައިވާއިރު، ކޮންމެ އަހަރަކު ވެސް، ދައުލަތުގެ ބަޖެޓުން އެ ޕާޓީއަށް 10 މިލިއަނަށް ވުރެ ގިނަ ރުފިޔާ ދޫކުރެއެވެ.