ހއ. އުލިގަމު ރައްޔިތުންގެ އެންމެ ބޮޑު އެދުމަކީ އެރަށުގައި އާ ސިއްހީ މަރުކަޒެއް ހެދިގެން ދިއުންކަމަށް އެރަށު ކައުސިލުން ހާމަކުރައްވައިފިއެވެ.
އެކައުންސިލުން މިކަން ހާމަކުރައްވާފައި ވަނީ ރައީސް ޑރ.މުހައްމަދު މުއިއްޒު މިހާރު އުތުރުގެ 4 އަތޮޅަށް ކުރައްވަމުން ގެންދަވާ ދަތުރުފުޅުގެ ތެރެއިން މިއަދު ހަވީރު ހއ.ތުރާކުނަށް ވަޑައިގެން ތުރާކުނު ސްކޫލުގައި އެކައުންސިލާއި އެކު ބޭއްވި ބައްދަލު ވުމެއްގައެވެ.
މިބައްދަލުވުމުގައި އުލިގަމު ކައުންސިލުން ފާހަގަކުރެއްވި ކަންކަމުގެ ތެރޭގައި، ފަށާފައިހުރި މަޝްރޫޢުތައް އަވަހަށް ކުރިއަށްގެންދަން ބޭނުންވާކަމަށާއި، ރަށުގެ ޒުވާނުންނަށް ބޭނުންވާ ކަންކަމާއި، ރަށުގެ ފަތުރުވެރިކަމުގެ ސިނާއަތް ހަރުދަނާކުރަން ބޭނުންވާކަން ފާހަގަ ކުރެއްވިއެވެ.
މީގެ އިތުރުން ޔޮޓު ފަހަރަށް ބޭނުން ހިފޭނެގޮތަކަށް ބަނދަރު ތަރައްޤީ ކޮށްދެއްވުމަށާއި، ކުނި ނައްތާލުމަށް ވޭސްޓް މެނޭޖްމަންޓް ސެންޓަރެއް ޤާއިމުކުރުމަށް ބޭނުންވާކަމުގައިވެސް އުލިގަމު ކައުންސިލުން ފާހަގަކުރެއްވިއެވެ.
ކައުންސިލްގެ ވާހަކަތައް އަޑުއެއްސެވުމަށްފަހު މިބައްދަލުވުމުގައި ބައިވެރިވެ ވަޑައިގެންނެވި ވަޒީރުން މެދުވެރިކުރައްވާ ކައުްނސިލުން ހުށަހެޅުއްވި ކަންތައްތަކުގެ އެންމެފަހުގެ މައުލޫމާތު ހިއްސާކުރެއްވިއެވެ. އަދި ރައީސް ޑރ.މުހައްމަދު މުއިއްޒު ވިދާޅުވީ ކައުންސިލުން ފާހަގަކުރެއްވި ކަންކަން ކޮށްދެއްވުމަށް މަސައްކަތް ކޮށްދެއްވާނެކަމަށެވެ.
ރައީސުލްޖުމުހޫރިއްޔާ ޑރ.މުހައްމަދު މުއިއްޒު މިހާރު ކުރައްވަމުން ގެންދަވާ ދަތުރުފުޅުގައި ހޯރަފުށީގެ ރައްޔިތުންނާއި ބައްދަލުކުރައްވާ ވާހަކަފުޅު ދައްކަވަމުން ވިދާޅުވި ގޮތުގައި ރާއްޖޭގައި އިޤްތިޞާދީ ގޮތުން ހިންގޭނެ އެންމެ ބިޔަ ބޮޑު މަޝްރޫޢު ހިންގުމަށް ހަމަޖެހިފައިވަނީ ހއ. އަތޮޅުގައެވެ. އެ މަސްރޫޢުގެ ސަބަބުން އެތައް ބަޔަކަށް ވަޒީފާގެ ފުރުޞަތު ލިބިގެންދާނެކަމަށްވެސް ރައީސް ޑރ.މުހައްމަދު މުއިއްޒު ފާހަގަ ކުރެއްވިއެވެ.
Advertisement
This content is created and paid for by advertisers and does not involve Voice Journalists
