ހައްދު ފަހަނައަޅާފައިވާ އިސްރާއީލްގެ ނިރުބަވެރި ސިފައިން ޣައްޒާގައި ހިންގަމުންދާ ގަތުލުއާންމަށް 140 ދުވަސްވީއިރުވެސް އދ.އާއި ހުޅަގުން ތިބީ ކުޅިބަލަން ކަމަށް ތުރުކީވިލާތުގެ ރައީސް ޠައްޔިބު އުރުދުޣާން ވިދާޅުވެއްޖެއެވެ.

ތުރުކީވިލާތުގެ ރައީސް ރަޖަބް ތައްޔިބު އުރުދުޣާން ވިދާޅުވީ ފާއިތުވި 140 ދުވަހު އިސްރާއީލުން ޣައްޒާގައި ހިންގަމުންދިޔަ އިންސާނީ ޖަރީމާތައް ބަލަން އދ އާއި ހުޅަނގުގެ ޤައުމުތަކުން ތިބީ އެކަން ހުއްޓުވަން އެއްވެސް ހަރުދަނާ ފިޔަވަޅެއް އެޅުމެއް ނެތިކަމަށެވެ.  

އދ.އަށާއި، ހުޅަނގުގެ ގައުމުތަކަށް ވަރަށް ބޮޑަށް ފާޑުވިދާޅުވަމުން އޭނާ ވިދާޅުވީ އދ.ގެ ސަލާމަތީ މަޖިލީހުން ވަގުތުން ހަނގުރާމަ ހުއްޓާލުމަށް ގޮވައިނުލި ކަމަށާއި، އިސްރާއީލަށް ފުރުޞަތުދީގެން ތިބީކަމަށެވެ.

އޭނާ މިހެން ވިދާޅުވެ ވާހަކަފުޅު ދެއްކެވީ ތުރުކީގެ ހުޅަނގު އުތުރު ޕްރޮވިންސް ކަމަށްވާ ސަކަރްޔާގައި ބޭއްވި ޖަސްޓިސް އެންޑް ޑިވެލޮޕްމަންޓް (އޭކޭ) ޕާޓީގެ ބައްދަލުވުމެއްގައި ވާހަކަ ދައްކަވަމުންނެވެ.

އިސްރާއީލުގެ ހަމަލާތައް ހުއްޓުވުމަށް ހުޅަނގުގެ ބާރުތަކުން ވެސް އަދި އދ.ގެ ސަލާމަތީ މަޖިލީހުން ވެސް ބޭނުންތެރި ހަރުދަނާ މަސައްކަތެއް ކޮށްފައި ނުވާ ކަމަށް އޭނާ ތަކުރާރުކޮށް ވިދާޅުވިއެވެ.

އިސްރާއީލުން ޣައްޒާއަށް ހަމަލާދޭން ފަށައިފައިވަނީ ހަމާސް ޖަމާއަތުން ބޯޑަރު ހުރަސްކޮށް އިސްރާއީލަށް ދިން ހަމަލާއެއްގައި ގާތްގަނޑަކަށް 1200 އެއްހާ މީހުން މަރުވުމާ ގުޅިގެންނެވެ.

އޮކްޓޯބަރ 7 ވަނަ ދުވަހުން ފެށިގެން އިސްރާއީލުން ޣައްޒާއާ ދެކޮޅަށް ކުރަމުންދާ ހަނގުރާމައިގެ ސަބަބުން އެ ސަރަހައްދުގެ އާބާދީގެ 85 އިންސައްތަ މީހުން ކާބޯތަކެއްޗާއި ސާފު ފެނާއި ބޭހުގެ ދަތިކަން ބޮޑުވެ ގެދޮރު ގެއްލިފައިވާއިރު، އެންކްލޭވްގެ އުމްރާނީ ވަސީލަތްތަކުގެ 60 އިންސައްތަ ވަނީ ހަލާކުވެ ނުވަތަ ބޭނުން ނުކުރެވޭވަރު ވެފައި ކަމަށް އދއިން ބުނެއެވެ.

1948 ވަނަ އަހަރު އިސްރާއީލު އުފެދުނު ފަހުން ފުރަތަމަ ފަހަރަށް ޣައްޒާ ހަނގުރާމައާ ގުޅިގެން އދ.ގެ އެންމެ މަތީ ޝަރުއީ އިދާރާ ކަމަށްވާ އިންޓަނޭޝަނަލް ކޯޓް އޮފް ޖަސްޓިސްގައި އިސްރާއީލުގެ މައްޗަށް ވަނީ ޖަރީމާހިންގުމުގެ ތުހުމަތުގައި ދައުވާ ކޮށްފައެވެ.

މިދިޔަ ޖެނުއަރީ މަހު އެކޯޓުން ނެރުނު ވަގުތީ ހުކުމެއްގައި ވަނީ ޣައްޒާގައި ދިރިއުޅޭ އާންމުންނަށް އިންސާނީ އެހީތެރިކަން ފޯރުކޮށްދިނުމަށް ޖިނާއީ އަމަލުތައް ހުއްޓާލައި ފިޔަވަޅުތައް އެޅުމަށް ތެލްއަވީވްއަށް އަމުރު ކޮށްފައެވެ.