މި ސަރުކާރުވެރިކަމާއި ހަވާލުވެ ވަޑައިގެންނެވިއިރު އިޤތިޞާދީ ގޮތުން ޤައުމު އޮތް ހީނަރުކަމުން އަރައިގަތުމަށް އަވަސް ފިޔަވަޅުތަކެއް ނޭޅިނަމަ މިއަދު މިޤައުމު އޮތީހީ ބަގުރޫޓްވެފައިވާ ޤައުމެއްގެ ގޮތުގައި ކަމަށް ރައީސުލްޖުމުހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.

އެމަނިކުފާނު މިފަދައިން ވިދާޅުވެފައި ވަނީ މިހާރު ރާއްޖޭގެ އުތުރުގެ 4 އަތޮޅަށް ކުރައްވަމުން ގެންދަވާ ދަތުރުފުޅުގައި މިއަދު ހއ. ބާރަށަށް ވަޑައިގެން ބާރަށުގެ ރައްޔިތުންނާ ބައްދަލުކޮށް ދެއްކެވި ވާހަކަފުޅުގައެވެ.

ރައީސް ވިދާޅުވީ އެމަނިކުފާނު ވެރިކަމަށް ވަޑައިގެންނެވީ ދިވެހިރައްޔިތުންނަށް ވަރަށް ގިނަ ވަޢުދުތަކެއް ވެގެން ކަމަށާއި، އިޤްތިޞާދީ ގޮތުން ވެއްޓިފައިވާ އަދަވަޅުން އަރައިގަތުމަށް ފިޔަވަޅުތަކެއް އެޅުއްވީ ވައުދުތައް ފުއްދެވުމަށްޓަކައި ކަމަށެވެ.

Advertisement

ރައީސުލްޖުމްހޫރިއްޔާ ވިދާޅުވީ ސަރުކާރުން އިޤްތިޞާދު ކުރިއަރުވައި، ފުޅާކުރެއްވުމަށް ފިޔަވަޅުތައް ނޭޅިނަމަ މިއަދު ރާއްޖޭގެ އިޤްތިޞާދު މާބޮޑު ނުރައްކަލެއްގެ ތެރެއަށް ވެއްޓުނީސްކަމަށެވެ.

"އެ ފިޔަވަޅުތައް ނާޅާ ތިބިނަމަ މިއަދު ތިބޭނީ ޑިފޯލްޓްވެފައި. ބޭރަށް ދޭންޖެހޭ ފައިސާ ދިނުމުގައި ތިބޭނީ ފެއިލްވެފައި. އަޅުގަނޑުމެން ތިބޭނީ އަރައިނުގަނެވޭނެ ހާލަތަކަށް ގޮސްފައި، ނަމަވެސް ފިޔަވަޅު އެޅުމުން މިއަދު ރަނގަޅަށް ކަންކަން ދަނީ" ރައީސުލްޖުމްހޫރިއްޔާ ވިދާޅުވިއެވެ.

އެމަނިކުފާނު އިތުރަށް ވިދާޅުވީ އެމަނިކުފާނުގެ ވެރިކަމުގައި ހއ. އަތޮޅުވެގެންދާނީ އިޤތިޞާދީ ގޮތުން އެންމެ ބޮޑު ބިޔަ މަޝްރޫޢު ހިންގިގެންދާ ސަރަހައްދަށް ކަމަށާއި އެކަމުގެ ސަބަބުން އެތައް ބަޔަކަށް ވަޒީފާގެ ފުރުޞަތުތައް ތަނަވަސް ވެގެން ދާނެކަމަށެވެ.

އެމަނިކުފާނު ބާރަށުގެ ރައްޔިތުންނަށް ދެއްވި ޔަޤީން ކަމަކީ އެރަށަށް ކޮށްދެއްވާނެކަމަށް އެމަނިކުފާނު ވައުދުވި ހުރިހާ ކަމެއް ކޮންދެއްވާނެ ކަމުގެ ޔަޤީން ކަމެވެ.