ނިމިދިޔަ، އެމްޑީޕީ ސަރުކާރުން ކުރިއަށް ގެންދިޔަ މަޝްރޫޢު ތަކަށް ހޭދަކުރަންޖެހޭ މިންވަރަށް ވުރެ ތިން ހަތަރު ގުނަ އިތުރަށް އެ ސަރުކާރުން ޚަރަދު ކޮށްފައިވާ ކަމަށާ، އެހެން ނަމަވެސް އެތަނުން ގިނަ ކަންކަން ނުނިމޭ ކަމަށް ފިޝަރީޒް މިނިސްޓަރ އަހުމަދު ޝިޔާމް ވިދާޅުވެއްޖެއެވެ.
ރައީސުލްޖުމްހޫރިއްޔާ ޑރ މުހައްމަދު މުޢިއްޒު ހދ. ހަނިމާދޫ ރައްޔިތުންނާއި ބައްދަލު ކުރެއްވުމަށް ބޭއްވި ޖަލްސާގައި ވާހަކަ ދައްކަވަމުން ޝިޔާމް ވިދާޅުވީ، ކުރީގެ ރައީސް، އިބްރާހީމް މުހައްމަދު ޞާލިހުގެ ވެރިކަމުގައި އެމަނިކުފާނު މަސައްކަތް ކުރައްވަމުން ގެންދެވީ މަޖިލިސް މެންބަރުންނާއި، މަޖިލީހުގެ ރައީސް ރުއްސަވަން ކަމަށެވެ.
އަދި އެ މަސައްކަތް ކުރައްވަން އުޅުއްވައިގެން ރައްޔިތުންނަށް ކޮށްދޭންޖެހޭ ކަންކަން ހުރީ މަޑު ޖެހިފައި ކަމަށް ޝިޔާމް ވިދާޅުވި އެވެ.
އެގޮތުން، އެމްޑީޕީ މެޖޯރިޓީ މަޖިލީހުގައި ބާއްވައިގެން، ސަރުކާރުން ކުރިއަށް ގެންދިޔަ ޕްރޮޖެކްޓް ތަކަށް ދައުލަތުގެ ވަޖެޓުން ބޮޑު ހޭދައެއް ކޮށްފައިވާ ކަމަށާ، އެ ޕްރޮޖެކްޓް ތަކުގެ ހޭދައަށްވުރެ ތިން ހަތަރު ގުނަ އިތުރަށް ޚަރަދު ކޮށްފައިވާ ކަމަށް ޝިޔާމް ވިދާޅުވި އެވެ.
ރައްޔިތުންގެ މަޖިލީހުގެ މެންބަރުންނާއި، މަޖިލީހުގެ ރައީސް ހިތްހަމަޖައްސާ، މިކަންތައްތަކުގައި ރައީސުލްޖުމުހޫރިއްޔާ އާއި ސަރުކާރު އުޅެން ވެއްޖެއްޔާ ރައްޔިތުންގެ ތަރައްގީ އޮންނާނީ ހުއްޓިފައި. މިދިޔަ ސަރުކާރުން، މަޖިލީހުގައި ސުޕަމެޖޯރިޓީ އޮވެ، ދައުލަތުގެ ބަޖެޓް ހޭދަކުރި ވަރު އަޅުގަނޑުމެންނަށް އެބަ އެނގޭ. ހަމައެކަނި ހަނިމާދޫ އެއާޕޯޓަށް އެކަނި 136 މިލިއަން ޑޮލަރު އެބަ ހޭދަކުރޭ. މިއީ ގާތްގަނޑަކަށް ޑޮމެސްޓިކް 9 އެއާޕޯޓް އެޅޭނެ އަގަށް ހަނިމާދޫ އެއާޕޯޓް އަޅަން މިއޮތީ. ހަނިމާދޫގެ މިޕްރޮޖެކްޓް އެކަންޏެއް ނޫން. ނިސްބަތުން ދިވެހި ރާއްޖޭގައި ކުރެވިފައި ހުރި ހުރިހާ މަސައްކަތެއްގެ ވެސް އަގު ހުރީ ތިން ގުނަ ހަތަރު ގުނަ އަގު ބޮޑުކޮށް. ޕްރޮޖެކްޓް ތަކެއް ނުވެއް ނިމޭ. އެކަމް ޕްރޮޖެކްޓް ތަކަށް ހޭދަ ކުރެވިފައި ހުރީ.
ފިޝަރީޒް މިނިސްޓަރ އަހުމަދު ޝިޔާމް
ޝިޔާމް ވިދާޅުވީ، މިދިޔަ ފަސް އަހަރުގެ ބަޖެޓް އެއްކޮށް ލުމުން, 170 ބިލިއަން ރުފިޔާއަށްވުރެ ބޮޑުވާ ކަމަށެވެ. އެހެންނަމަވެސް، ޕްރޮޖެކްޓް ތައް ހިންގިފައި ހުރި މިންވަރަށް ބަލާއިރު، އޭގެ މަސައްކަތް ކުރިއަށް ގޮސްފައިވާތަން ނުފެންނަ ކަމަށް ޝިޔާމް ވިދާޅުވި އެވެ.
ބައެއް ބިންގާ އަޅާފައި ހުއްޓިފައި ހުންނަތަން މި ފެންނަނީ. އެކަމަކު 700, 800 މީހުން ދިރިއުޅޭ އާބާދީއެއްގައި، ފެނަކަ އައު އޮފީހެއް އަޅަންވެސް އަޅުގަނޑުމެންނަށް އެބަ ފެނޭ 12, 13 މިލިއަން ރުފިޔާ ހޭދަކޮށްފައިވާތަން. އެކަމަކު އަދި ހަމަ އިމާރާތް ބިމުން މައްޗަށް ހިއްލާ ނުލާ ހުރި ތަންތަން މަދެއް ނޫން.
ފިޝަރީޒް މިނިސްޓަރ އަހުމަދު ޝިޔާމް
ޝިޔާމް ވަނީ ކުރީ ސަރުކާރުން އެފަދައިން ދައުލަތުގެ މާލިއްޔާ ބޭނުން ކޮށްފައި ހުރި ގޮތް ފެނުމުން ކަންބޮޑުވެލައްވާ ކަން ފާހަގަކުރައްވާފައެވެ.
ޝިޔާމް އިތުރަށް ވިދާޅުވީ، އަދުގެ ރައީސުލްޖުމްހޫރިއްޔާ ޑރ. މުހައްމަދު މުޢިއްޒު މަސައްކަތް ކުރައްވަނީ އެފަދައިން މަޖިލިސް މެންބަރުން ރުއްސަން ދައުލަތުގެ މާލިއްޔާ ހޭދަ ކުރަން ނޫން ކަމަށާ، އެހެނެއް ކަމަކު، ރައްޔިތުން ބޭނުންވާ އަސާސީ ޚިދުމަތްތައް ފޯރުކޮށްދިނުމަށްޓަކައި އެމަނިކުފާނުގެ ވަގުތު ހުސްކުރެއްވުމަށް ކަމަށެވެ.
Advertisement
This content is created and paid for by advertisers and does not involve Voice Journalists
