ދިވެހިރާއްޖެއާއި މޮރިޝަސް އާއި ދެމެދު ފުށުއަރައި ކަނޑުގެ ސަރަހައްދާ ގުޅޭ ގޮތުން، އިންޓަނޭޝަނަލް ޓްރައިބިއުނަލް ފޯ ދަ ލޯ އޮފް ދަ ސީ (އިޓްލޮސް)އިން ނިންމާފައިވާ ނިންމުން ބަދަލުކުރަން ގޮންޖެހުންތަކެއް އެބަހުރި ކަމަށާއި އެ ނިންމުމަކީ އިޓްލޮސްއަށް ނިންމޭނެ ނިންމުމެއް ނޫން ކަމަށް ކަނޑުގެ ގާނޫނުގެ ޚަބީރުން ލަފާދެއްވާފައިވާ ކަމަށް އެޓާނީ ޖެނެރަލް (އޭޖީ) އޮފީހުން މިއަދު ބުނެފިއެވެ.

އޭޖީ އޮފީހުން މިފަދައިން ބުނެފައި ވަނީ ގެއްލިގެން ދިޔަ ބައި އަނބުރާ ހޯދުމަށް މި ސަރުކާރުން ނިންމާ އެކަމަށް ލަފާ ދިނުމަށް އެކުލަވާލި ބޭރުގެ މާހިރުންގެ ޓީމުގެ މަސައްކަތްތަކާއި ގުޅޭގޮތުން މިއަދު އެޓާނީ ޖެނެރަލް (އޭޖީ) އޮފީހުން ނެރުނު ބަޔާނެއްގައެވެ.

އޭޖީގެ ބަޔާނުގައި ބުނެފައިވަނީ އިޓްލޮސްއިން ނިންމާފައިވަނީ ރާއްޖޭގެ އެކްސްކްލޫސިވް އިކޮނަމިކް ޒޯން (އީއީޒެޑް)ގެ ތެރެއިން ދެކުނުގެ ކަނޑުގެ ސަރައްދުން ބޮޑު ބައެއް ގެއްލޭ ގޮތަށް ކަމަށެވެ.

އެ މައްސަލަ އިސްތިއުނާފުކޮށް، ގެއްލުނު ބައި ހޯދަން އައްޔަންކޮށްފައިވާ ނގިރޭސިވިލާތުގެ ކިންގްސް ކައުންސެލްއަކާއި، ލޯ އޮފް ދަ ސީ އާ ބެހޭ މޯލްޓާގެ ކަމާބެހޭ ތަޖުރިބާކާރުގެ ލަފާ ލިބިފައިވާ ކަމަށް އެ އޮފީހުން ބުނެއެވެ. އަދި، އެ މަސައްކަތަށް އައްޔަންކޮށްފައިވާ ވިލަރެސް ގްރޫޕުގެ ރިޕޯޓު ވެސް ލިބިފައިވާ ކަމަށް ބަޔާނުގައި ވަނީ ބުނެފައެވެ.

ބަޔާނުގައި ބުނީ ގާނޫނީ ލަފާ ހޯދަން އައްޔަންކޮށްފައިވާ ޚަބީރުންނާއި ވިލަރެސް ކޮމިޓީގެ ރިޕޯޓުން ވެސް ފާހަގަވާ އެންމެ މުހިއްމު އެއް ކަމަކީ އެ މައްސަލައިގައި ނިމުނު ސަރުކާރުން އަމަލުކުރީ ޒިންމާދާރުކަން ކުޑަކޮށްކަން ކަމަށެވެ. އެހެންވެ، ގެއްލުނު ކަނޑުގެ ބައި ހޯދަން މިހާރު ކުރަމުން އަންނަ މަސައްކަތުގައި ބޮޑެތި ގޮންޖެހުންތަކެއް ހުރި ކަމަށް އޭޖީ އޮފީހުން ބުންޏެވެ.

އެ ބަޔާނުގައި ބުނީ، ރާއްޖޭގެ އެންމެ މަތީ މަސްލަހަތު ހިމާޔަތްކުރަން ނެގެންހުރި މުހިއްމު ގިނަ ދިފާއުތަކެއް ނަގާފައިނުވާ ކަމަށެވެ.

އޭޖީ އޮފީހުގެ ބަޔާން ނިންމާލަމުން ބުނެފައި ވަނީ މި މައްސަލަ ކުރިއަށް ގެންދަން އިތުރަށް އަޅަންޖެހޭ ފިޔަވަޅުތަކާ ގުޅޭ ގޮތުން ވަޒީރުންގެ މަޖިލީހުން ނިންމަންޖެހޭ ކަންކަން ކަމާ ބެހޭ ފަރާތްތަކުގެ މަޝްވަރާއާއި އެކު ވަޒީރުންގެ މަޖިލީހަށް ހުށަހެޅުމުގެ މަސައްކަތް ކުރިއަށްދާ ކަމަށެވެ.

ޗާގޯސް މައްސަލައިގައި ރާއްޖެއިން ގެއްލުނު ކަނޑުގެ ސަރަހައްދު އަބުރާ ހޯދުމަކީ ރައީސުލްޖުމުހޫރިއްޔާ ޑރ.މުހައްމަދު މުއިއްޒުގެ ވަޢުދެއްވެސް މެއެވެ.