މޯލްޑިވިއަން ޑިމޮކްރެޓިކް ޕާޓީ ، އެމްޑީޕީގެ އެޑްވައިޒަރަކަށް ކުރީގެ ރައީސް އިބްރާހިމް މުހައްމަދު ޞާލިހް ހަމަޖައްސަވައިފި އެވެ.
އެމްޑީޕީގެ މަޖިލީސް ކެމްޕެއިން ފެށުމަށާއި، އެ ޕާޓީގެ ކެންޑިޑޭޓުން ތައާރަފު ކުރުމަށް މިރޭ އާޓިފިޝަލް ބީޗުގައި ކުރިއަށްގެންދިޔަ ޖަލްސާ ގައި ރައީސް ސޯލިހް ވެސް ބައިވެރިވެވަޑައިގަންފައިވާއިރު، ޕާޓީގެ އިސް ބޭފުޅުން އެމަނިކުފާނަށް މުހާތަބު ކުރައްވަނީ ޕާޓީގެ އެޑްވައިޒަރުގެ ގޮތުގައެވެ. އެ މަގާމަށް އެމަނިކުފާނު ހަމަޖެއްސެވި ދުވަހެއް އެމްޑީޕީ ހާމަކޮށްފައެއް ނުވެއެވެ.
ރައީސް ޞާލިޙް އެންމެ ފަހުން ހުންނެވީ އެމްޑީޕީގެ ވަގުތީ ރައީސްގެ މަގާމުގައެވެ. އެމަނިކުފާނު އެ ޕާޓީގެ ރައީސްކަމަށް ހަމަޖެއްސެވީ ނޮވެންބަރު 24 ގައި އެމްޑީޕީން ބޭއްވި ގައުމީ މަޖިލީހުގެ ޖަލްސާ ގައެވެ. އެމްޑީޕީގެ ރައީސްގެ މަގާމު ހުސްވެގެންދިޔައީ މަގާމުގައި ހުންނެވި ކުރީގެ ރައީސް މުހައްމަދު ނަޝީދު އެމްޑީޕީގެ ރައީސް ކަމުންނާއި މެންބަރު ކަމުން ވެސް އިސްތިއުފާ ދެއްވުމުންނެވެ.
އެމްޑީޕީގެ ރައީސްކަމަށް އިއުލާނު ކުރުމުން އެމަޤާމަށް ކުރީގެ ފޮރިން މިނިސްޓަރ އަބުދުﷲ ޝާހިދު އެކަނި ކުރިމަތިލުމުން ވޯޓަކާއި ނުލައި ޝާހިދު ވަނީ އެމްޑީޕީގެ ރައީސްކަމަށް އިންތިހާބުވެ ވަޑައިގެންފައެވެ.
މިރޭގެ ޖަލްސާގައި ވާހަކަފުޅު ދައްކަވަމުން ރައީސް ޞާލިޙްވަނީ އެމްޑީޕީގެ ލީޑަރޝިޕްގައި އަބަދުވެސް ހުންނަވާނެކަމުގެ ޔަޤިންކަން ޕާޓީގެ މެމްބަރުންނަށް ދެއްވާފައެވެ.
Advertisement
This content is created and paid for by advertisers and does not involve Voice Journalists
