ކުވެއިތު ފަންޑުން އަބަދުވެސް އަންނަނީ ރާއްޖެއަށް އެހީތެރިވަމުންކަމަށާއި، މަޝްރޫއެއް ނުހިންގިގެން އެއްވެސް ޕްރޮޖެކްޓަކަށް ފަންޑު ދިނުން އަނބުރާ ގެންގޮސްފައި ނުވާކަމަށް ކުރީގެ މާލީ ވަޒީރު އިބުރާޙިމް އަމީރު ވިދާޅުވެއްޖެއެވެ.
ކުރީގެ ވަޒީރު މިފަދައިން ވިދާޅުވެފައި ވަނީ ރައީސް އިބްރާހިމް މުހައްމަދު ޞާލީހުގެ ސަރުކާރުގައި މަޝްރޫއުތަކެއް ހިންގުން ލަސްވެގެން ކުވެއިތު ފަންޑުން ދިން ހިލޭ އެހީ އަނބުރާ ގެންދިޔަ ކަމަށް ރައީސް ޑރ. މުހައްމަދު މުއިއްޒު ވިދާޅުވި ވާހަކަ އަށް ރައްދު ދެއްވާ ކުރެއްވި އެކްސް ޕޯސްޓެއްގައެވެ.
ހދ. ހަނިމާދޫގައި ބޭއްވި ޖަލްސާގައި ރައީސް ޑރ. މުއިއްޒު ވިދާޅުވީ ހަނިމާދޫ ހިމެނޭ ގޮތަށް އިތުރު ތިން ރަށެއްގައި 30 އެނދުގެ ހޮސްޕިޓަލް އެޅުމަށް ކުވައިތު ފަންޑުން ހިލޭ އެހީ ހަމަޖެހިފައި އޮތް ކަމަށާއި، ނަމަވެސް މިދިޔަ ސަރުކާރުން އެ ފަންޑުގެ ބޭނުން ނުކޮށް ޕްރޮޖެކްޓުތައް ހިންގުން ލަސް ކުރަމުން ގޮސް ކުވައިތު ފަންޑުން އެންމެ ފަހުން ފަންޑު އަނބުރާ ގެންދިޔައީ ކަމަށެވެ.
"މިއީ ކަނޑައެޅިގެން ދޮގެއް، ކުވެއިތު ފަންޑުން އަބަދުވެސް އަންނަނީ ރާއްޖެއަށް އެހީތެރިވަމުން، މަޝްރޫއެއް ނުހިންގިގެން އެއްވެސް ޕްރޮޖެކްޓެއް، ފަންޑު ދިނުން އަނބުރާ ގެންގޮސްފައި ނުވޭ. މަނިކުފާނަށް ރަނގަޅު މައުލޫމާތު ދޭނެ ކަމަށް އެކަށީގެންވާ، ގާބިލް މީހުން އައްޔަން ކުރަން ފެނޭ،"
ރައީސް މުއިއްޒުގެ ވާހަކައަށް ރައްދުދެއްވާ އަމީރު ވިދާޅުވިއެވެ.
ވަޒީރު މިފަދައިން ވިދާޅުވެފައިވާއިރު ރޭ ބޭއްވި އެމްޑީޕީގެ ކެންޕެއިން ފެށުމުގެ ޖަލްސާގައި ވާހަކަ ދެއްކެވި ގިނަ ބޭފުޅުންވެސް ވަނީ މި ސަރުކާރުގެ އިސްވެރިން ރައްޔިތުންނަށް ދޮގު ހަދަމުންގެންދާކަމަށް ތުހުމަތު ކުރައްވާފައެވެ.
އެގޮތުން ދާދިފަހުން އެމްޑީޕީގެ ރައީސްކަމާއި ހަވާލުވެ ވަޑައިގެންނެވި ޝާހިދު ވިދާޅުވީ ދިވެހި ރައްޔިތުން އެއް އަޑަކުން ގޮވަމުން ދަނީ ދޮގު ދޮލަނގު ކުނިވެއްޖެ ކަމުގެ ވާހަކަ އާއި ދޮގު ދޮލަނގުގައި ފުޅަ އަޅައިފިކަމުގެ ވާހަކަތައް ކަމަށެވެ.
Advertisement
This content is created and paid for by advertisers and does not involve Voice Journalists
