ސިޔާސީ ގޮތުން މީހާ ރަސައްރަފު ފުދުމަކީ  ސިޔާސީގޮތުން ޖެހޭ ވަޔާއި، ސިޔާސީ ކަނޑުގައި ނަގާ ރާޅާއި އަދި ސިޔާސީ ކަނޑުގައި ދަމާ އޮއިވަރު އެނގިގެން ކަނޑުއޮޅިން ސަލާމަތްވެ ބަނދަރުކުރަން އެނގޭ މީހާކަމަށް ރައީސް، ޑރ. މުހައްމަދު މުއިއްޒުގެ ސްޕެޝަލް އެޑްވައިޒަރު އަބްދުއްރަހީމް އަބްދުﷲ (އަދުރޭ) ވިދާޅުވެއްޖެއެވެ.

ރައީސް އުތުރުގެ އަތޮޅުތަކަށް ކުރައްވަމުން ގެންދަވާ ދަތުރުފުޅުގެ ތެރެއިން ށ.މިލަންދޫއަށް ވަޑައިގެން އެރަށުގެ ރައްޔިތުންނާއި ބައްދަލު ކުރެއްވުމަށް ބޭއްވި ޖަލްސާގައި ވާހަކަ ދައްކަވަމުން އަދުރޭ ވިދާޅުވީ، ކޮންމެ ފަސްއަހަރަކުން އެއްއަހަރު ރައްޔިތުންނަށް، އެ  ރައްޔިތުން ގޮތް ނިންމަން ބާރު ލިބޭ ކަމަށާއި އެ ރައްޔިތުން ގޮތް ނިންމީމަ ދެން އެއާއި އިދިކޮޅަށް ވާހަކަ ދައްކާ   ހެދުމަކީ ރައްޔިތުންނަށް ވެރިކަން ކޮށްދިނުން ނޫންކަމަށެވެ.

އަދުރޭ ވިދާޅުވީ ރައްޔިތުންނަށް ވެރިކަން ކޮށްދޭ ރައީސުން ރައްޔިތުންގެ ގާތަށް އައިސް ރައްޔިތުންގެ ބޭނުންތައް ބައްލަވާނެ ކަމަށާއި އެއާއި ޚިލާފަށް މަޤާމާއި ލައްޒަތުގެ ބޭނުމުގައި ވެރިކަން ކުރާ މީހާ އަބަދުވެސް ބަލާނީ އެމީހަކަށް ނުވަތަ އެމީހެއްގެ ގާތުގައި އުޅޭ ބަޔަކަށް މޮޅުގޮތް ކަމަށެވެ.

އެގޮތުން އަދުރޭ ފާހަގަކުރެއްވި ގޮތުގައި ބައެއް ރައީސުންނަކީ ރަށްރަށަށް ވޑައިގެންނެވިޔަސް އެރަށެއްގެ ދެފަށް ބެދޭ ހިސާބުގައި ރައްޔިތުންނާއި ބައްދަލުކުރައްވާ ހަމައެކަނި އެރައީސުން އެކަނި ބުނެލަން ބެނުންވާ ވާހަކައެއް ބުނެލުމަށްފަހު އެރަށަކުން ފައިބައިގެންދާ ރައީސުން ކަމަށެވެ.

އަބުދުއްރަޙިމް އިތުރަށް ފާހަގަ ކުރެއްވި ގޮތުގައި ވެރިކަން ކުރެވެނީ އެކަން އެނގޭ އެކަން ރަނގަޅަށް ދަންނަ މީހަކަށް ކަމަށެވެ.

"ސިޔާސީގޮތުން މީހާ ތަސައްރަފު ފުދުމަކީ ސިޔާސީގޮތުން ޖެހޭވައި ދަނެގެން، ސިޔާސީ ކަނޑުގައި ނަގަރާޅު ބަލައިގެން ، ސިޔާސީ ކަނޑުގައި ދަމާ އޮއިވަރު އެނގިގެން ކަނޑުއޮޅިން ސަލާމަތްކަމާއިއެކު ބަނދަރުކުރަން އެނގޭ މީހާ އެހެންވެގެން އަޅުގަނދުމެން މިތަ މިތިބީ، އެހެންވެގެން ޑރ.މުއިއްޒު ރައީސްކަމަށް ވަޑައިގެންނެވީ" އަބުދުއްރަހީމް ވިދާޅުވިއެވެ.

ތިމާޔަށް ކުރަން ނުކުރެވުނު ކަމެއް އެހެން މީހަކު ކުރަން ފޭށީމަ އެކަން ހަޖަމު ނުވުމަކީ އެމީހެއްގެ ހުރި ބަލިކަށިކަމެއް ކަމަށާއި އަދި އެންމެ ބޮޑު އިދިކޮޅު ޕާޓީ އެމްޑީޕީއަށް މިއަދު ވެގެން އެ އުޅެނީ އެގޮތް ކަމަށެވެ. ވޭތުވެ ދިޔަ ފަސްއަހަރު ދުވަހު ނުކުރެވުނު ކަންތައްތައް މި ސަރުކާރުން ކުރަމުންދާތަން ފެންނާތީ ހަޖަމު ނުވެގެން ކަމަށެވެ.