ކުޅުދުއްފުށި ސިޓީ ކައުންސިލަށް އެންމެ މުހިއްމުވީ ބޯހިޔާވަހިކަމުގެ މަޝްރޫއުކަމަށް އެކައުންސިލުން ހާމަކުރައްވައިފިއެވެ.

ކ ކުޅުދުއްފުށީ ސިޓީ ކައުންސިލުން މިކަން ހަމަކޮށްފައިވަނީ ރައީސުލްޖުމުހޫރިއްޔާ ޑރ.މުހައްމަދު މުއިއްޒު މިހާރު އުތުރުގެ 4 އަތޮޅަށް ކުރައްވަމުން ގެންދަވާ ދަތުރުފުޅުގެ ތެރެއިން ކުޅުދުއްފުށީ ސިޓީއަށް ވަޑައިގެން އެރަށު ސިޓީ ކައުންސިލާއި ބައްދަލުކޮށްލެއްވި ބައްދަލުކޮށްލެއްވުމުގެ ތެރޭގައެވެ.

ކައުންސިލުންވަނީ މަސްވެރިކަމުގެ ސިނާއަތް އިތުރަށް ކުރިއެރުވުމަށް ވެލިއު އެޑެޑް ފެސިލިޓީސް ބޭނުންވާކަމަށާއި، ކައުންސިލުގެ އާ އިމާރާތެއް ބޭނުންވާކަންވެސް ހާމަކުރައްވާފައެވެ.

އޭގެ އިތުރުން ރަށްގިރުމުގެ މައްސަލައަށް ހައްލު ހޯދުމަށް ބޭނުންވާކަމަށާއި، ސްޕޯޓްސް އެރީނާއާ އެކީގައި ސިންތެޓިކް ޓްރެކެއް އެޅުމަށް ބޭނުންވާކަމުގައި ދަންނަވާފައެވެ. އަދި ޓިވެޓް ސެންޓަރާއި ދަމަނަވެށީގެ މަސައްކަތް އަވަހަށް ނިންމަވައިދެއްވުމަށްވެސް ކައުންސިލުން ރައީސް ޑރ.މުހައްމަދު މުއިއްޒު އަރިހުން އެދިވަޑައިގަތެވެ.

މި ބައްދަލުކުރެއްވުމުގައި ބައިވެރިވެވަޑައިގެންނެވި ވަޒީރުންވަނީ ކައުންސިލުން ފާހަގަކުރެއްވި ކަންކަމުގައި ސަރުކާރުން ކުރައްވަމުން ގެންދަވާ މަސައްކަތްތަކުގެ އެންމެ ފަހުގެ މަޢުލޫމާތު ހިއްސާކުރައްވާފައެވެ.

މި ބައްދަލުކުރެއްވުމުގައި ރައީސުލްޖުމްހޫރިއްޔާ ދެއްކެވި ވާހަކަފުޅުގައި، ކައުންސިލުން ފާހަގަކުރެއްވި ކަންކަން ކޮށްދެއްވުމަށް މަސައްކަތްކުރައްވާނެ ކަމުގައި ވިދާޅުވިއެވެ.

ރައީސުލްޖުމުހޫރިއްޔާ ޑރ.މުހައްމަދު މުއިއްޒު ރޭ ކުޅުދުއްފުށި ސިޓީގެ ރައްޔިތުންނާއި ބައްދަލުކުރައްވާ ދެއްކެވި ވާހަކަފުޅުގައި މި އަހަރު ނިމުގެ ކުރިން އެސިޓީގައި 300 ހައުސިންޔުނިޓް އަޅުއްވައި ދެއްވާނެކަމަށް ވަނީ ވިދާޅުވެފައެވެ.