ރައީސުލްޖުމްހޫރިއްޔާ ޑރ.މުހައްމަދު މުއިއްޒު މިހާރު އުތުރަށް ކުރައްވަމުން ގެންދަވާ ދަތުރުފުޅުގައި ށ.ފޯކައިދޫ އާއި އަދި އެ އަތޮޅު ނަރުދޫ ކައުންސިލާއި ބައްދަލުކުރައްވައިފިއެވެ.

މިއަދު ހަވީރު ށ.މިލަންދޫ ކައުންސިލް އިދާރާގައި ވަކިވަކިން ބޭއްވުނު މި ބައްދަލުވުން ތަކުގައި އެދެރަށުގެ ރައްޔިތުންގެ ފަރާތުން ހުރި ކަންބޮޑުވުންތަކާއި، އެދެރަށުގެ ތަރައްޤީއަށް ބޭނުންނާ ކަންތައްތައް ވަނީ ރައީސް ޑރ.މުހައްމަދު މުއިއްޒާއި ހިއްސާ ކުރައްވާފައެވެ.

އެގޮތުން ނަރުދޫ ކައުންސިލުން ވަނީ އެރަށުގެ ތަރައްޤީއަށްޓަކައި ކުރުމަށް ބޭނުންވާ ކަންތައްތަކުގެ ގޮތުގައި ފެނާއި ނަރުދަމާގެ މަޝްރޫޢު އާއި، ރަށުގެ ގިރާ ސަރަހައްދު ހިމާޔަތްކުރުމާއި، ސްކޫލުގެ މަލްޓިޕަރޕަސް ހޯލެއް ޤާއިމުކުރުން ފަދަ މަސްރޫޢުތައް ހުށަހަޅުއްވާފައެވެ.

ފޯކައިދޫ ކައުންސިލުން ފާހަގަ ކުރެއްވި ކަންތައްތަކުގެ ތެރޭގައި ހިމެނެނީ އެ ރަށުގައި މޫދަށް އެރެވޭނެ ސަރަހައްދެއް ޤާއިމުކުރުމާއި، އާ ކައުންސިލް އިދާރާއެއް ޤާއިމުކޮށްދިނުމާއި، އެ ކައުންސިލުން އިސްނަގައިގެން އިއާދަކުރަނިވި ހަކަތައިން ކަރަންޓު އުފެއްދޭނެ މިންވަރު އިތުރުކުރުމުގައި ސަރުކާރުގެ އެއްބާރުލުން ލިބޭނެގޮތެއް ހޯއްދެވުމެވެ. އަދި އޭގެ އިތުރުން ރައްކާތެރި ގޮތުގައި ކުނި ނައްތާލުމަށްޓަކައި ހަރުދަނާ ނިޒާމެއް ޤާއިމުކޮށްދެއްވުމެވެ.

މި ދެ ބައްދަލުކުރެއްވުމުގައި ބައިވެރިވެވަޑައިގެންނެވި ވަޒީރުންވަނީ ކައުންސިލުން ފާހަގަކުރެއްވި ކަންކަމުގައި ސަރުކާރުން ކުރައްވަމުން ގެންދަވާ މަސައްކަތްތަކުގެ އެންމެ ފަހުގެ މަޢުލޫމާތު ހިއްސާކުރައްވާފައެވެ.

ރައީސުލްޖުމުހޫރިއްޔާ ޑރ. މުހައްމަދު މުއިއްޒު މި ދެބައްދަލުވުމުގައި ވެސް ވިދާޅުވެފައިވަނީ ކައުންސިލުތަކުން ފާހަގަކުރެއްވި ކަންކަން ބައްލަވައި އެކަންކަން ކޮށްދެއްވުމަށް މަސައްކަތް ކޮށްދެއްވާނެ ކަމަށެވެ.