މަނަދޫގައި ޒަމާނީ ހޮސްޕިޓަލެއް ގާއިމު ކުރުމުގެ އިދާރީ މަސައްކަތްތައް ކުރިއަށްދާ ކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.
ރައީސް ޑރ.މުއިއްޒު މިފަދައިން ވިދާޅުވީ، މިހާރު އެމަނިކުފާނު އުތުރުގެ ހަތަރު އަތޮޅަށް ކުރައްވަމުންގެންދަވާ ދަތުރުފުޅުގެ ތެރެއިން ނ.މަނަދޫއަށް ވަޑައިގެން އެރަށުގެ ރައްޔިތުންނާއި ބައްދަލުކުރައްވާ، ވާހަކަފުޅު ދައްކަވަމުންނެވެ.
މަނަދޫގެ ތަރައްގީ އަށް ރަށުގެ ސިއްހީ ދާއިރާ ހަރުދަނާ ކުރުމުގެ މުހިންމުކަން ފާހަކުރައްވާ ރައީސް ޑރ.މުއިއްޒު ވިދާޅުވީ، އެ ރަށުގައި ފެންވަރު ރަނގަޅު ހޮސްޕިޓަލެއް އެޅުމަށް ވައުދުވެވަޑައިގަތް ކަމަށެވެ. އެހެންކަމުން ރަށުގައި ފެންވަރު ރަނގަޅު ހޮސްޕިޓަލެއް ގާއިމު ކުރުމުގެ އިދާރީ މަސައްކަތްތައް ކުރިއަށްދާ ކަމަށް އެމަނިކުފާނު ވިދާޅުވިއެވެ.
"ދެން މިރަށުގެ ތަރައްގީ އަށް އެންމެ މުހިންމު އެއް ކަމެއް ސިއްހީ ދާއިރާ ހަރުދަނާ ކުރުން. ހޮސްޕިޓަލް ގެ ވާހަކަ. އެހެންވީމަ އެކަމަށް ބަލާއިރުގައި ވެސް، އަޅުގަނޑު އެ ވައުދުވެސް ވިން ފެންވަރު ރަނގަޅު ހޮސްޕިޓަލެއް ގާއިމު ކޮށްދޭނެ ކަމަށް. އަޅުގަނޑުމެން އެކަމާއި ގުޅޭ އިދާރީ މަސައްކަތް ވެސް އެބަ ކުރިއަށް ގެންދަން. އަބަދު ތިބޭފުޅުން އާދޭސްކޮށްކޮށް ނުވެގެން އުޅޭ ކަމެއްގެ ގޮތުގައި އެކަން އޮތް އޮތުން ނިމުމަކަށް ގެނެސް، ހަގީގީ ކުލަ ޖައްސަދީ އިރާދަކުރެއްވިއްޔާ ތިބޭފުޅުން ފަހުރުވެރިވާފަދަ،މި އަތޮޅުގެ ރައްޔިތުން ބޭނުންވާފަދަ ފެންވަރުގެ ހޮސްޕިޓަލެއް މިތާ ގާއިމު ކޮށްދޭނަން އިރާދަ ކުރެއްވިއްޔާ.
ރައީސް ޑރ.މުއިއްޒު ވިދާޅުވިއެވެ.
މީގެ އިތުރުންވެސް ރައީސް ޑރ.މުއިއްޒު ވަނީ މަނަދޫގެ މަގު ހެދުމުގެ މަޝްރޫއު ވެސް ރަށުގެ ރައްޔިތުން ބޭނުންވާ ގޮތަށް، ފުޅާ މިނެއްގައި ކުރިއަށް ގެންދަވާނެ ކަމުގެ ޔަގީންކަން ވެސް މަނަދޫގެ ރައްޔިތުންނަށް އަރުވާފައެވެ.
Advertisement
This content is created and paid for by advertisers and does not involve Voice Journalists
