11 އަހަރުގެ ޖަލުހުކުމެއް އިއްވާ ގޭ ބަންދުގައި ހުކުމް ތަންފީޒު ކުރައްވަމުން މިހާރު ގެންދަވާ ކުރީގެ ރައީސުލްޖުމުހޫރިއްޔާ އަބުދުﷲ ޔާމީން ޢަބުދުލް ޤައްޔޫމުގެ އިސްތިއުނާފުގެ މަރުހަލާ ނުނިމިގެން އުޅެނީ ކޮންމެވެސް ބައެއްގެ ނުވަތަ ، ކޮންމެވެސް ފަރާތެއް ނުފޫޒެއް ކޯޓްތަކަށް ފޯރާތީ ކަމަށް ކުރީގެ ރައީސް އިބްރާޙިމް މުހައްމަދު ޞާލިޙް ވިދާޅުވެއްޖެއެވެ.
ރައީސް ޞަލިހް މިފަދައިން ވިދާޅުވެފައިވަނީ ކުރިއަށް އޮތް 20 ވަނަ ރައްޔިތުންގެ މަޖިލިހުގެ އިންތިހާބުގައި އެމްޑީޕީގެ ކެންޑިޑޭޓުންނަށް ތާއިދު ހޯއްދެވުމަށް ދޮރުން ދޮރަށް ހިންގެވުމަށް މިއަދު ބޭއްވެވި އިވެންޓެއްގެ ތެރެއިން ނޫސްވެރިންނާއި ވާހަކަފުޅު ދައްކަވަމުންނެވެ.
ރައީސް ޞާލިހް ވިދާޅުވީ ޔާމީންގެ އިސްތިއުނާފު ނޮވެންބަރު 23، 2023 ގައި ނިމިފައިވާއިރު ހުކުމަކާއި ހަމައަށް ނުގޮސް ތިން މަސް ދުވަސް ހޭދަވުމަކީ މާ ބޮޑަށް ލަސްވުން ކަމަށާއި، އަދި އެ މިންވަރަށް ލަސްވާނީ ކޮންމެވެސް ނުފޫޒެއް އޮވެގެން ކަމަށް ރައްޔިތުން ދެކޭ ކަމަށެވެ.
"އެންމެނަށް ގަބޫލު ކުރެވެނީ ކޮންމެވެސް ކަހަލަ ނުފޫޒެއް، ކޮންމެވެސް ކަހަލަ ނުފޫޒެއް ކޯޓުގެ ތެރެއަށް ފޯރާ ކަމަށް،"
ރައީސް ޞާލިހް ވިދާޅުވިއެވެ.
ކުރީގެ ރައީސް ޞާލިޙް އިތުރަށް ވިދާޅުވީ އިންސާފު އަވަސް ކުރުމަކީ އެންމެ މުހިންމު ކަމަށްވީއިރު އެކަން ލަސްވާނަމަ ވެރިއަކަށް ހުންނަ ބޭފުޅަކަށް އެކަންކަން ބެލޭނެ ކަމަށާއި، އަދި އިންސާފު އަވަސް ކޮށް ދިނުމަށް ދެންނެވުމުގެ ޤާނޫނީ ބާރު ރައީސަށް އޮންނާނެ ކަމަށެވެ.
ރައީސް ޞާލިޙް މިއަދު މިފަދައިން ވިދާޅުވެފައިވާއިރު ރައީސް ޔާމީން 25 ޑިސެމްބަރ 2022 ގައި 11 އަހަރަށް ޖަލަށް ލުމަށް ހުކުމްކޮށް 1000 ދުވަހަށް ވުރެ ގިނަ ދުވަހު ރައީސް ޔާމީން ޖަލުގައި ބަންދުކޮށްފައި ބެހެއްޓީ ރައީސް އިބުރާހިމް މުހައްމަދު ޞާލިޙްގެ ވެރިކަމުގައެވެ.
Advertisement
This content is created and paid for by advertisers and does not involve Voice Journalists
