ރާއްޖޭގެ ކަނޑުގެ ސަރަހައްދު އަމިއްލައަށް ބެލެހެއްޓުމުގެ ގާބިލުކަން އަންނަ މަހުގެ ތެރޭގައި ގާއިމު ކުރުމުގެ މަސައްކަތް ފަށާނެ ކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.

ނ.މަނަދޫ ރައްޔިތުންނާއި ބައްދަލުކުރައްވާ ވާހަކަފުޅު ދައްކަވަމުން ރައީސް ޑރ.މުއިއްޒު ވިދާޅުވީ، 24 ގަޑިއިރު ހުއްޓުމެއް ނެތި، ރާއްޖޭގެ ކަނޑުގެ ސަރަހައްދު ބެލެހެއްޓޭނެ ގާބިލުކަން ގާއިމު ކުރުމުގެ މަސައްކަތް ބާރުމިނުގައި ކުރިއަށްދާ ކަމަށެވެ.

މީގެ އިތުރުންވެސް ރައީސް ޑރ.މުއިއްޒު ވިދާޅުވީ، މެއި މަހުގެ 10 ގެ ކުރިން އިންޑިއާގެ ހުރިހާ ސިފައިން ފޮނުވައިލެވޭނެކަމުގެ ޔަގީންކަން އެބައޮތް ކަމަށާއި މިހާރު އެކަމަށްޓަކައި "ލެޓާ އޮފް އެކްސްޗޭންޖް"ގައި ސޮއިކުރެވިފައިވާކަމަށެވެ. އިދިކޮޅު ފަރާތްތަކުން، ރާއްޖޭގައި ތިބި އިންޑިއާ ސިފައިން މި ސަރުކާރުން ފޮނުވާލަނީ ނަމެއްގައި ކަމަށް ބުނި ނަމަވެސް މި ސަރުކާރުން އިންޑިއާ ސިފައިން ފޮނުވާލަނީ ހަގީގީ މާނައިގައި ކަމަށް އެމަނިކުފާނު ވިދާޅުވިއެވެ. އަދި ރުންކުރުވެގެން ރައްޔިތުންނަށް ލިބޭނެ މޮޅެއް އޮތް ކަމަށް ފެނިވަޑައިގަންނަވާ ބޭފުޅެއް އެ ގޮތެއް ރައްޔިތުންނަށް ކިޔައިދެއްވަން ޖެހޭ ކަމަށް ވެސް ރައީސް ޑރ.މުއިއްޒު ވިދާޅުވިއެވެ.

އަންނަ މަހުގެ އެއް ވަނަ ދުވަހު ރާއްޖޭގައި އެއާ އެމްބިއުލެންސް ގެ ހިދުމަތް ފެއްޓުމަށް ހަމަޖެހިފައިވާކަން އިއުލާން ކުރައްވާ ރައީސް ޑރ.މުއިއްޒު ވިދާޅުވީ މެޑިކަލް އިވެކުއޭޝަން ހަދައި، އަމިއްލަ ސަރަހައްދު ބަލަހައްޓާނީ އަމިއްލަ އަށް ކަމަށާއި، ދެން އެހެން ބައެއްގެ ކިބައިން ކަމަކު އެދޭކަށް ނުޖެހޭނެ ކަމަށެވެ.