މި ސަރުކާރުގެ ފަރާތުން ތެލަސީމިއާބަލި ހުންނަ ފަރާތްތަކަށް ދޭން ކަނޑައަޅާފައިވާ އިނާޔަތް އަންނަ އަހަރު ފެށިގެން ދޭން ފަށާނެކަމަށް ރައީސުލްޖުމުހޫރިއްޔާ ޑރ، މުހައްމަދު މުއިއްޒު ވިދާޅުވެއްޖެއެވެ.
އެމަނިކުފާނު މިފަދައިން ވިދާޅުވެފައި ވަނީ އާއްމު ރައްޔިތުންގެ ސުވާލުތަކަށް ޖަވާބުދެއްވުމަށް ކުރިއަށް ގެންދަވާ "ރައީސްގެ ޖަވާބު" ސިލްސިލާ ޕްރޮގްރާމުގެ ދަށުން ނ.މަނަދޫ، މާރިނދަ، ވަސްމާ ޔޫސުފް މިއަދު ކުރެއްވި ސުވާލަށް ޖަވާބު ދެއްވަމުންނެވެ.
ވަސްމާ މިއަދު ރައީސް އަރިހުން ތަފާތު ތިންކަމަކާއި ގުޅޭ މަޢުލޫމާތު ސާފުކުރުމަށް 3 ސުވާލު އަމާޒުކުރިއިރު ތެލިސީމިއާއި ގުޅޭގޮތުން ސުވާލު އަމާޒުކޮށްފައި ވަނީ މި ސަރުކާރުން ތެލަސީމިއާބަލި ހުންނަ ފަރާތްތަކަށް ދިނުމަށް ވައުދުވި އިނާޔަތާއި ގުޅޭގޮތުންނެވެ.
އެ ސުވާލުގެ ޖަވާބުގައި ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ވިދާޅުވީ، ތެލަސީމިއާބަލި ހުންނަ ފަރާތްތަކަށް ޢިނާޔަތް ދެއްވުމަށް މިއަހަރުގެ ބަޖެޓް ފާސްކުރިއިރު މަޖިލީހުން ހިމަނުއްވާފައި ނުވާކަމަށެވެ. އެހެންކަމުން އަންނަ އަހަރުގެ ބަޖެޓުގައި ހިމަނުއްވައިގެން ދެއްވަން ގަސްތުކުރައްވާކަމަށް ރައީސުލްޖުމްހޫރިއްޔާ ވިދާޅުވިއެވެ.
"ތެލަސީމިއާ ތެލަސީމިއާބަލި ހުންނަ ފަރާތްތަކަށް ދޭ އިނާޔަތް މިއަހަރުގެ ބަޖެޓުގައި ނެތް ހިމެނިފައި. އަންނަ އަހަރުގެ ބަޖެޓުގައި ހިމަނައިގެން ދޭންފަށަން ގަސްތުކުރަނީ."
ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވިއެވެ.
ވަސްމާގެ އަނެއް ސުވާލު އަމާޒުކުރީ އަތޮޅުތެރޭގައި ތިބި ޚާއްސަ އެހީއަށް ބޭނުންވާ ފަރާތްތަކަށް ދޭންޖެހޭ ތެރަޕީގެ ޚިދުމަތް އަތޮޅުތެރެއިން ލިބެން ނެތުމާއި ގުޅޭގޮތުންނެވެ.
އެ ސުވާލަށް ޖަވާބު ދެއްވަމުން ރައީސް ޑރ.މުހައްމަދު މުއިއްޒު ވިދާޅުވީ އެފަރާތްތަކަށް ބޭނުންވާ ޚިދުމަތްތައް ކޮންމެ އަތޮޅެއްގެ، އަތޮޅު ހޮސްޕިޓަލެއްގައި ޤާއިމުކުރުމަކީ އެމަނިކުފާނުގެ މެނިފެސްޓޯގައިވެސް ޚާއްސަ އިސްކަމެއް ދެއްވާފައިވާކަމެއްކަމަށެވެ.
އެގޮތުން ހޮސްޕިޓަލްތަކުގައި އެފަދަ ފަރާތްތަކަށް ބޭނުންވާ ފިޒިއޮތެރަޕީއާއި ސައިކޭޓްރީގެ ޚިދުމަތާއި އިތުރު ތެރަޕީތައް ޤާއިމުކުރުމުގެ މަސައްކަތްވެސް ކުރައްވަމުންދާކަމަށް ރައީސުލްޖުމްހޫރިއްޔާ ވިދާޅުވިއެވެ. އަދި މިއީ ޚާއްސަ ތަމްރީންތަކެއް ލިބިފައިވާ ބަޔަކު ހޯދަންޖެހޭ ދާއިރާއެއްކަމުން، ބަޖެޓު ތަންދިން މިންވަރަކުން ވީހާވެސް ގިނަ އަތޮޅު ހޮސްޕިޓަލްތަކެއްގައި މިފަދަ ޚިދުމަތް ޤާއިމުކޮށް ސްޕެޝަލިސްޓުން ބޭތިއްބުމަށް މަސައްކަތް ކުރައްވާނެކަމަށް ރައީސުލްޖުމްހޫރިއްޔާ ވިދާޅުވިއެވެ.
ސެންކުދިންނަށް ކިޔަވައިދިނުމުގެ ފުރުސަތު ތަނަވަސް ކޮށްދެއްވުމަކީ އެމަނިކުފާނު ވަރަށް ހާއްސަ ސަމާލުކަމެއް ދެއްވާކަމެއްކަމަށް ވިދާޅުވިއެވެ.
"ޚާއްސަ އެހީއަށް ބޭނުންވާ ކުދިންނަށް ބޭނުންވާ ސެން ކްލާސްތައް ސްކޫލްގައި ޤާއިމުކުރުމަކީވެސް މެނިފެސްޓޯގައި ޚާއްސަ އިސްކަމެއް ދީފައިވާދާއިރާއެއް. ޓްރެނިންގ ލިބިފައިވާ ސެން ޓީޗަރުންނެއް ނެތް ހަގީގަތުގައި. އެކަމަށް ޚާއްސަ ޓްރއެނިންގ އެއް ލިބެންޖެހޭނެ އެފަދަ ކުދިންނަށް އަޅާލާ ޓީޗަރުންނަށް. އެކަމުގެ މަސައްކަތް މިހާރު ފެށިފައިވަނީ."
ރައީސް ޑރ،މުހައްމަދު މުއިއްޒު ވިދާޅުވިއެވެ.
ރައީސް ވިދާޅުވީ މިހާރުވެސް މި ސަރުކާރުގެ ފަރާތުން ސެންޓީޗަރުން ތަމުރީނުކުރުމަށާއި ހާއްސައެހީއަށް ބޭނުންވާ ކުދިންނަށް ކިޔަވައި ދިނުމަށް ބޭނުންވާ ވަސީލަތްތައް ޤާއިމުކޮށްދިނުމަށް ގިނަ މަސައްކަތްތަކެއް ކުރައްވަމުން ގެންދަވާ ކަމަށެވެ.
Advertisement
This content is created and paid for by advertisers and does not involve Voice Journalists
