ރާއްޖޭގެ ކަންކަން ހަމައިން ނެއްޓެން ފެށީމަ ހަމަމަގަށް އަޅުވަން އެންމެ ފަރިތަ ބަޔަކީ އެމްޑީޕީ ކަމަށް އެމްޑީޕީގެ ކުރީގެ ޗެއަރޕަރސަން މާރިޔާ އަހުމަދު ދީދީ ވިދާޅުވެއްޖެއެވެ.
މާރިޔާ މިފަދައިން ވިދާޅުވީ، ހުކުރު ދުވަހުގެ ރޭ، ދަނޑިކޮށި ޖަގަހައިގައި ބޭއްވި "ދޮގު ދޮލަނގު ޖަލްސާ"ގައި ވާހަކަފުޅުދައްކަވަމުންނެވެ. މިގޮތުން މާރިޔާ ވިދާޅުވީ އިދިކޮޅު ފަރާތަކަށް ތިބެގެން މަސައްކަތް ކުރުމަކީ ފަސޭހަ ނޫން ނަމަވެސް އެކަމަށް އެމްޑީޕީ ފަރިތަ ކަމަށާއި، އިދިކޮޅު ގައި ރައްޔިތުން މަޖިލީހުގައި މަސައްކަތް ކުރުމަކީ ވެސް ފަސޭހަ ކަމަކަށް ނުވާއިރު އެމްޑީޕީ ގެ ފަރިތަކަން އެކަމުން ވެސް ދައްކުވައިދީފި ކަމަށެވެ.
"އިދިކޮޅު ފަރާތަކަށް ތިބެގެން މަސައްކަތް ކުރުމަކީ ފަސޭހަކަމެއް ނޫން. އެކަމަކު އެމްޑީޕީ ފަރިތަކަން. އިދިކޮޅު ފަރާތެއްގައި ރައްޔިތުން މަޖިލީހުގައި މަސައްކަތް ކުރުމަކީވެސް ފަސޭހަކަމެއް ނޫން. އެކަމަކު އެމްޑީޕީ ފަރިތަކަން. ރާއްޖޭގެ ކަންކަން ހަމައިން ނެއްޓެން ފެށީމަ ހަމަމަގަށް އަޅުވަން އެންމެ ފަރިތަ ބަޔަކީ އެމްޑީޕީ"
މާރިޔާ ވިދާޅުވިއެވެ.
އެމްޑީޕީން މަޖިލިސް އިންތިހާބަށް ކުރާ ކެމްޕޭންގެ ތެރެއިން މިހާރު ކުރިއަށްގެންދާ ދޮރުން ދޮރަށް ކެމްޕެއިންގައި، ގޭގެއަށް ޒިޔާރަތްކޮށް އާއްމު ރައްޔިތުންގެ ޚިޔާލު ހޯދުމުންވެސް މިހާރު މިއޮތް ހާލަތު މިގޮތަށް ގޮސްގެން ނުވާނެކަން އެނގޭކަމަށާއި، މި ކަންކަން ވީއެންމެ އަވަހަށް ބަދަލުކުރުމަށް ރައްޔިތުން ބުނަމުންދާކަމަށް މާރިޔާ ވިދާޅުވިއެވެ.
މާރިޔާ ވިދާޅުވީ އިންޑިއާ މީހުން މިތާ ތިބުމުން އިސްތިގުލާލު ގެއްލޭކަމަށް ބުނުމަކީ ދެއްކި ވާހަކައެއް ކަމަށާއި، 100 ދުވަސް ވީއިރުވެސް އެމީހުން އަދިވެސް ތިބި ކަމަށެވެ. އަދި އެމްއެންޑީއެފްގެ ހުއްދައެއްނެތި އެމީހުންނަށް ނުދެވޭނެ ކަމަށް އެމްޑީޕީން ކުރިން ބުނިކަމަށް ވެސް މާރިޔާ ވިދާޅުވިއެވެ
މިނޫނީ ގައުމިއްޔަތޭ ވިދާޅުވެ، ގައުމު ނަގައި ބޮލަށް ޖަހަމުން ދާއިރު ރައްޔިތުންނާމެދު ނުވިސްނާ ވެރިއަކު ނުދެކޭކަމަށް ވިދާޅުވެ މާރިޔާ ވަނީ ރައީސް ޑރ.މުއިއްޒަށް ފާޑު ވިދާޅުވެފައެވެ.
މާރިޔާ ވަނީ މި ކަންކަމުން ރައްޔިތުން ސަލާމަތްވުމަށްޓަކައި 21 އޭޕްރީލްގައި ވޯޓުލާން ނިކުމެ، ވަކި ބޭފުޅަކަށް ވަކި ނަމަކަށް ބެލުމެއްނެތި ތިލަފަތަށް ވޯޓު ދިނުމަށް އެދިވަޑައިގެންފައެވެ.
Advertisement
This content is created and paid for by advertisers and does not involve Voice Journalists
