ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު، މާޅޮސްމަޑުލު ދެކުނުބުރީ މާއްޑޫއަކީ އޭދަފުށީގެ ބައެއްގެ ގޮތުގައި ކަނޑައަޅުއްވައިފިއެވެ. ރައީސުލްޖުމްހޫރިއްޔާ މިގޮތަށް ކަނޑައަޅުއްވާފައި އެމަނިކުފާނު ސޮއިކުރައްވައި އިޢުލާން ކުރެއްވި ޤަރާރަކުންނެވެ.

މި ޤަރާރުގައި ސޮއިކުރައްވާފައި ވަނީ އެދަފުށީ ކައުންސިލާ އ.ތ.މ ކޮމިޓީއާ ބައްދަލުކުރެއްވުމަށް ބ. އަތޮޅު ކައުންސިލުގެ އިދާރާގައި ބޭއްވި ބައްދަލުކުރެއްވުން ފެށްޓެވުމުގެ ކުރިންނެވެ.

މި ބައްދަލުކުރެއްވުމުގައި ކައުންސިލުން ފާހަގަކުރެއްވި ކަންކަމުގެ ތެރޭގައި އޭދަފުށީގައި ހައުސިންގ މަޝްރޫއެއް އަވަހަށް ފެށުމާއި ބ. އަތޮޅު ހޮސްޕިޓަލުގެ ޚިދުމަތްތަކުގެ ފެންވަރު މަތިކުރުމާއި ރަށަށް ކަރަންޓް ދިނުމުގައި ހުރި ބައެއް ކަންބޮޑުވުންތަކާއި ކައުންސިލުގެ އިދާރީ މުވައްޒަފުންގެ މުސާރަ ބޮޑުކުރަން ބޭނުންވުން ހިމެނެއެވެ.

މި ބައްދަލުކުރެއްވުމުގައި ރައީސުލްޖުމްހޫރިއްޔާ ވަނީ ކައުންސިލުން އެދިވަޑައިގެންނެވި ކަންކަމުގައި ސަމާލުކަންދެއްވައިގެން މަސައްކަތް ކޮށްދެއްވާނެކަމުގައި ވިދާޅުވެފައެވެ.

މާއްޑޫ އަކީ އޭދަފުށީގެ ބައެއްގެ ގޮތުގައި ހަމަޖައްސަވާނެކަން ރައީސުލްޖުމްހޫރިއްޔާ އިއުލާން ކުރެއްވީ ރޭގައެވެ.

އެގޮތުން ރޭގައި އޭދަފުށީގައި އޮތް ޖަލްސާގައި ރައީސް މުޢިއްޒު ވިދާޅުވީ އޭދަފުށީގެ ބިން ހިއްކެން އޮތް އެންމެ ބޮޑަކަށް މިހާރު ހިއްކިފައިވާ ކަމަށެވެ. އެހެންކަމުން އެރަށުގައި އިތުރަށް ބިން ހިއްކެން ނެތްކަމަށާއި، ރަށުގެ ބިމުގެ މައްސަލައަށް އޮތް ހައްލަކީ އިތުރު ރަށެއް ހޯދުންކަމުގައި އެމަނިކުފާނު ވިދާޅުވި އެވެ. 

އެކަމަށްޓަކައި އޭދަފުށީ ކައިރީ އޮތް މާއްޑޫ އެރަށުގެ ބައެއްގެ ގޮތުގައި ހަމަަޖައްސަވާނެ ކަމަށް ކެންޕެއިން ތެރޭގައިވެސް އެމަނިކުފާނު ވަޢުދުވެލެއްވިކަން ފާހަގަކުރައްވައި ރައީސް މުޢިއްޒު ވަނީ އެ ވަޢުދު ފުއްދަވާފައިވާ ކަން އިއުލާން ކުރައްވާފައެވެ. 

"އޭދަފުށީގެ ބައެއްގެ ގޮތުގައި މާންޑޫ ހަމަޖައްސައިފިން. މި ހަފްތާ ތެރޭގައި އެކަމުގެ ލިޔެކިޔުން ކައުންސިލާއި ހަވާލު ކުރާނަން. ދެން އެރަށުގައި އޭރުން ގެދޮރުވެރިކަމާއި، އުމްރާނީ ތަރައްގީއާ ދެން އެހެރަ ކަންކަން ޕްލޭން ކޮށްގެން، ކައުންސިލަށް، ސަރުކާރާ ގުޅިގެން ކުރިއަށްގެންދަންވީ ކަންކަން ކައުންސިލުން ކުރިއަށް ގެންދަންވީ. އިރާދަކުރެއްވިޔާ އެ ރަށަކީ ތިޔަބޭފުޅުންގެ ކުރި މަގަށް މުހިންމު ރަށެއް." ރައީސުލްޖުމްހޫރިއްޔާ ޑރ މުހައްމަދު މުޢިއްޒު ވިދާޅުވި އެވެ.