ބ.ގޮއިދޫގެ ޞިއްޙީ މަރުކަޒުގެ ޖާގައިގެ ދަތިކަން ހައްލުކޮށް، ލެބޯޓްރީގެ ޚިދުމަތް ތައާރަފް ކުރުމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ގެ އަރިހުން އެރަށުގެ ކައުންސިލުން އެދެފިއެވެ.

މިކަމަށް އެދި ރައީސް ޑރ.މުއިއްޒުގެ އަރިހުގައި ގޮއިދޫ ކައުންސިލުން ދަންނަވާފައިމިވަނީ މިހާރު އެމަނިކުފާނު ބ އަތޮޅަށް ކުރައްވާ ދަތުރުފުޅުގެ ތެރެއިން ގޮއިދޫ ކައުންސިލާއި އަންހެނުންގެ ތަރައްގީ އަށް މަސައްކަތްކުރާ ކޮމިޓީ އާއި އެކު ބޭއްވި ބައްދަލުވުމުގައެވެ.

ޞިއްޙީ މަރުކަޒުގެ ޖާގައިގެން ދަތިކަން ހައްލުކޮށް ޚިދުމަތްތަކުގެ ފެންވަރު މަތިކުރުމާއި ލެބޯޓްރީގެ ޚިދުމަތް ތަރާފަރުކުރުމަށް އެދުމުގެ އިތުރުން، އެ ރަށުގެ ކައުންސިލުން ވަނީ ގޮއިދޫ ބަނދަރު މަރާމާތު ކުރުމާއި ބީޗް ތަރައްޤީކުރުމަށް ބޭނުންވާކަމަށާއި، ރަށުގައި ޓޫރިޒަމް ޒޯނެއް ތަރައްޤީކުރާއިރު އެސަޙައްދަށް ފެނާ ނަރުދަމާ އަދި ކަރަންޓުގެ ޚިދުމަތް ފޯރުކޮށްދިނުމަށް ވެސް ބޭނުންވާކަން ހާމަކޮށްފައެވެ.

Advertisement

މި ބައްދަލުވުމުގައި އެ ރަށުގެ އ.ތ.މ ކޮމިޓީން ވަނީ  އާމްދަނީ ހޯދަން ބިމެއްގެ މުހިންމުކަން ފާހަގަކޮށް ރައީސް ޑރ.މުއިއްޒު އަށް ދަންނަވާފައެވެ.

ރައީސް ޑރ.މުއިއްޒު މި ބައްދަލުކުރެއްވުމުގައި ބައިވެރިވެވަޑައިގެންނެވި ސަރުކާރުގެ ކަމާގުޅޭ ފަރާތްތައް މެދުވެރިކޮށް، ވަނީ ކައުންސިލުން ފާހަގަކުރެއްވި ކަންކަމުގެ އެންމެ ފަހުގެ މަޢުލޫމާތުތައް ކައުންސިލާ ހިއްސާކުރައްވާފައެވެ.