ބ.ކަމަދޫގެ ތަރައްޤީގެ އެންމެ މުހިންމު ކަންކަމާ ގުޅޭގޮތުން ރައީސުލްޖުމްހޫރިއްޔާ ޑރ.މުހައްމަދު މުއިއްޒު މަޝްވަރާކުރައްވައިފިއެވެ.

މިކަންކަމާއި މަޝްވަރާ ކުރައްވާފައިވަނީ ބ. ކެންދޫ ކައުންސިލުގެ އިދާރާގައި، ކަމަދޫގެ ކައުންސިލާ އަންހެނުންގެ ތަރައްޤީއަށް މަސައްކަތްކުރާ (އ.ތ.މ) ކޮމިޓީއާއި އެކު ބޭއްވި ބައްދަލުވުމުގެ ތެރެއިންނެވެ.

މި ބައްދަލުވުމުގައި ކަމަދޫގެ ކައުންސިލުން ވަނީ އެ ރަށުގެ ރަށްގިރުމުގެ މައްސަލައާ ކަރަންޓުގެ ހާލަތާމެދު އޮތް ކަންބޮޑުވުން ފާހަގަކޮށް، ރަށުގައި ލޯކަލް ޓުއަރިޒަމް ތަރައްޤީވެ ގިނަ ބަޔަކު ރަށުގައި ދިރިއުޅުނު ނަމަވެސް ރަށަކީ އާބާދީ މަދު ރަށެއްކަމުގައިވާތީ އެރަށަށް ލިބޭ ވަސީލަތްތައް މަދުވުމުން ގޮންޖެހުންތައް ކުރިމަތިވާ ކަމަށް ބުނެފައެވެ. އަދި ރަށުގެ މަގުތަކުގައި ތާރު އެޅުމުގެ ބަދަލުގައި، ރަށުގެ މަގުތަކުގައި ފެންހެދޭ މައްސަލަ ހައްލުކޮށްދެއްވައި މަގުގެ ބޭނުން ހިފޭގޮތަށް މަސައްކަތްކޮށްދެއްވުމަށް ވެސް ކައުންސިލުން ވަނީ ރައީސް ޑރ.މުއިއްޒުގެ އަރިހުގައި އެދިފައެވެ.

ކަމަދޫއަށް އިޤުތިޞާދީ މަންފާލިބޭގޮތަށް ބ.މަދިރިވާދޫ ކަމަދޫގެ ކައުންސިލަށް ލިބޭގޮތަށް ހަމަޖައްސައިދެއްވުމަށް ވެސް ކައުންސިލުން އެދިފައިވާއިރު، ރަށުގެ އިޖުތިމާއީ ތަރައްޤީއަށް މުހިންމު ކަންތައްތައް ވެސް މި ބައްދަލުވުމުގެ ތެރެއިން ރައީސް ޑރ.މުއިއްޒު އާއި ވަނީ ހިއްސާ ކޮށްފައެވެ.

ކަމަދޫގެ އަންހެނުންގެ ތަރައްޤީއަށް މަސައްކަތްކުރާ ކޮމިޓީން ވަނީ އެކޮމިޓީއަށް އެކަށީގެންވާ ބަޖެޓު ނުލިބޭތީ އެކަމާއި ގުޅިގެން ކުރިމަތިވާ ދަތިތައް ރައީސް ޑރ.މުއިއްޒު އަށް ދަންނަވާފައެވެ.

ކަމަދޫ ކައުންސިލުން އެދިވަޑައިގެންނެވި ކަންކަމަށް ސަމާލުކަން ދެއްވައިގެން އެކަންކަން ކޮށްދެއްވާނެކަމުގައި ރައީސް ޑރ.މުއިއްޒު ވަނީ ވިދާޅުވެފައެވެ.