ރާއްޖެއަށް މަސްތުވާތަކެތި އެތެރެކޮށް އޭގެ ވިޔަފާރިކުރުމުގެ ކުށް ސާބިތުވެގެން އުމުރަށް ޖަލަށްލާފައިވާ 314 މީހަކަށް ކުރީގެ ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙު މައާފުދެއްވާފައިވާކަމަށް ހޯމް ލޭންޑް ސެކިއުރިޓީ މިނިސްޓަރު އަލީ އިހްސާން މިއަދު ވިދާޅުވެއްޖެ އެވެ.
މިއަދު ހޯމް މިނިސްޓްރީން ބޭއްވި ނޫސްވެރިންގެ ބައްދަލުވުމުގައި އިހުސާން ވިދާޅުވީ، އުމުރު ދުވަހުގެ ޖަލު ހުކުމް އިއްވާފައިވާ މީހުންގެ ތެރެއިން ކުރީ ސަރުކާރުގެ ފަސް އަަހަރުތެރޭ މައާފުދީ ދޫކޮށްލާފައިވާ މިންވަރު ބަލާފައިވާނެ ކަމަށެވެ.
"އަޅުގަނޑުމެން ކޮންމެވެސް ވަރަކަށް ބަލައިލިން ޑްރަގް ޓްރެފިކްކުރާ މީހުން ޑްރަގު ޑީލުކުރާ މީހުން ހައްޔަރުކުރެވި ދައުވާކުރެވި ކުށް ސާބިތުވެފައިވާ މީހުން ދޫކުރެވިފައި ހުރި ގޮތަށް. ބަލާލިއިރުގައި ފާއިތުވި ފަސް އަހަރުގެ ތެރޭގައި އުމުރަށް ޖަލާލާފައި ތިބި މީހުން 314 މީހަކަށް މައާފު ދީފައި،"
އިހުސާން ވިދާޅުވިއެވެ.
އިހުސާން ވިދާޅުވީ އުމުރަށް ޖަލަށްލެވެނީ ފުލުހުންނާއި ޕްރޮސިކިއުޓަރުން ކުރާ ވަަރަށް ބުރަ މަސައްކަތުން ކަމަށެވެ. ކޯޓުގެ މަރުހަލާގައި ވެސް އެތައް ދުވަހެއް ފާއިތުވާފަހުން މީހެއްގެ މައްޗަށް އުމުރު ދުވަހުގެ ޖަލު ހުކުމެއް ސާބިތުވެފައި ވަނިކޮށް، ރައީސްއަށް ލިބޭ ބާރުގެ ދަށުން އެ ކުށްވެރިން މިނިވަން ކުރުަމަކީ ކަންބޮޑުވާ ކަމެއް ކަމަށް އޭނާ ފާހަގަ ކުރެއްވި އެވެ.
އަދި މިފަދައިން ދޫކޮށްލާފައިވާ މީހުން އަލުން އެ ބާވަތުގެ މައްސަލަތަކުގައި ހައްޔަރުކުރަންޖެހޭކަންވެސް އޭނާ ފާހަގަކުރެއްވިއެވެ.
"މަސްތުވާތަކެތި ޓްރެފިކްކުރާ 314 މީހުން އަލުން މުޖުތަމައު ތެރެއަށް ދޫވެގެން ދިއުމަކީ މަސްތުވާތަކެތީގެ މައްސަލަ ހައްލުކުރުމަށް އަންނަ ވަރަށް ބޮޑު އުދަގުލެއް.،" ކެޕްޓަން އިހުސާން ވިދާޅުވިއެވެ.
ޞާލިހްގެ ވެރިކަމުގެ ފަހުކޮޅު ވަނީ ބޮޑެތި ކުށްތައް ސާބިތުވެފައިވާ މީހުންނަށް ވެސް މައާފު ދެއްވައި ނުވަތަ އަދަބު ލުއިކޮށްދީގެން މިނިވަންކުރައްވައިފަ އެވެ. އޭގެ ތެރޭގައި ކުޑަކުދިންގެ މައްސަލަތަކުގައި ހިމެނޭ ފަރާތްތަކާއި، އެމްއެމްޕީއާރުސީގެ ހިޔާނާތުގެ އެންމެ ބޮޑު އެކަކު ކަމަށްވާ ކުރީގެ ނައިބު ރައީސް އަހުމަދު އަދީބު ވެސް ހިމެނެ އެވެ.
Advertisement
This content is created and paid for by advertisers and does not involve Voice Journalists
