މ.މުލަކުގައި ހޮސްޕިޓަލެއް ގާއިމުކުރުމަށްޓަކައި ކުރަންޖެހޭ ހުރިހާ މަސައްކަތްތަކެއް ކުރައްވާނެ ކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.

ރައީސް ޑރ.މުއިއްޒު މިފަދައިން ވިދާޅުވީ، އެމަނިކުފާނު މިހާރު އަތޮޅު ތެރެއަށް ކުރައްވަމުންގެންދަވާ ދަތުރުފުޅުގެ ތެރެއިން މުލަކަށް ވަޑައިގެން، އެރަށުގެ ރައްޔިތުންނާއި ބައްދަލުކުރައްވާ ދެއްކެވި ވާހަކަފުޅުގައެވެ.

މިގޮތުން ރައީސް ޑރ.މުއިއްޒު ވިދާޅުވީ، މުލަކުގެ ސިއްހީ ހިދުމަތް ރަނގަޅުކޮށް، ހޮސްޕިޓަލަކަށް ހަދައިދެއްވާނެ ކަމަށާއި، މިހާރުން މިހާރަށް ވެސް ހިދުމަތުގެ ފެންވަރު ރަނގަޅު ކުރުމަށްޓަކައި ކުރަންޖެހޭ މަސައްކަތްތައް ކުރިއަށް ގެންދަވާނެ ކަމަށެވެ.

Advertisement

ރައީސް ޑރ.މުއިއްޒު ވިދާޅުވީ ރިޔާސީ އިންތިހާބުގެ ކެމްޕޭން ދުވަސްވަރު ރައްޔިތުންނަށް ވަރަށް ގިނަ ވައުދުތައް ވެވަޑައިގެންފައިވާނެ ކަމަށާއި އެ ހުރިހާ ވައުދެއްވެސް ވެވަޑައިގެންނެވީ ފުއްދެވުމަށް ކަމަށެވެ. އޭގެތެރޭގައި، މުލަކަށްވެސް ގިނަ ކަންކަން ކޮށްދެއްވާނެ ކަމަށް ވައުދުވެވަޑައިގެންނެވި ކަމަށާއި އެ ހުރިހާ ވައުދެއް އަކުރުން އަކުރަށް ފުއްދަވައިދެއްވާނެކަމުގެ ޔަގީންކަން ވެސް ރައީސް ޑރ.މުއިއްޒު ވަނީ މުލަކުގެ ރައްޔިތުންނަށް ދެއްވާފައެވެ.