ދުރު މުސްތަޤްބަލަށްޓަކައި، ވ އަތޮޅުގައި މީހުން ދިރިއުޅޭނެ އާ ރަށެއް ހިއްކާ ދިނުމަށް އެ އަތޮޅުގެ ކައުންސިލުން ރައީސުލްޖުމްހޫރިއްޔާ ޑރ.މުހައްމަދު މުއިއްޒު ގެ އަރިހުން އެދެފިއެވެ.
ވ އަތޮޅު ކައުންސިލުން އެ އަތޮޅުގައި އާ ރަށެއް ހިއްކައިދިނުމަށް އެދިފައިވަނީ، ރައީސް ޑރ.މުއިއްޒު މިހާރު އަތޮޅުތެރެއަށް ކުރައްވަމުންގެންދަވާ ދަތުރުފުޅުގެ ތެރެއިން ވ އަތޮޅަށް ވަޑައިގެން އެ އަތޮޅުގެ ކައުންސިލާއި އެކު ބޭއްވި ބައްދަލުވުމުގެ ތެރެއިންނެވެ.
މި ބައްދަލުވުމުގައި ވ އަތޮޅު ކައުންސިލުން ވަނީ މުޅި އަތޮޅުގެ ތަރައްޤީއަށްޓަކައި ކުރުމަށް ބޭނުންވާ ކަންކަމާއި މަޝްވަރާކުރުމުގެ އިތުރުން، އަތޮޅުގެ އެކި ރަށްރަށުގައި ފެށިފައިހުރި މަޝްރޫޢުތައް އަވަހަށް ކުރިއަށް ގެންގޮސްދެއްވައި ނިންމަވާދެއްވުމަށްވެސް ރައީސް ޑރ.މުއިއްޒު ގެ އަރިހުން އެދިފައެވެ.
މިގޮތުން ވ އަތޮޅު ކައުންސިލުން ފާހަގަކުރި ކަންކަމުގެ ތެރޭގައި، މީހުން ދިރިއުޅެމުންދާ ރަށްތައް ހިއްކުމުގެ ބަދަލުގައި ދުރު މުސްތަޤްބަލަށްޓަކައި، އެ އަތޮޅުގައި މީހުން ދިރިއުޅޭނެ 6 ވަނަ މަންޒިލެއް ނުވަތަ އައު ރަށެއް ހިއްކާ ދެއްވުމަށް އެދުން ހިމެނެއެވެ. އަދި އަތޮޅު ހޮސްޕިޓަލުގެ އޮޕަރޭޝަން ތިއޭޓަރ މަސައްކަތް ފެށުމަށް ބޭނުންވާ ކަމަށާއި، ވ. އަތޮޅުގައި 'ޕިކްނިކް އައިލެންޑެއް' ތަރައްޤީކޮށްދެއްވުމަށްވެސް އެ އަތޮޅު ކައުންސިލުން ވަނީ ރައީސް ޑރ.މުއިއްޒުގެ އަރިހުގައި އެދިފައެވެ.
މީގެ އިތުރުންވެސް، ސިވިސް ސަރވިސް އިން ކައުންސިލް އިދާރާތައް ވަކިކޮށް މިނިވަން ކުރުމަށް ބޭނުންވާކަމަށް ކައުންސިލުން ބުނެފައިވާއިރު، ފަސޭހަ ކަމާއެކު ކައުންސިލްތަކަށް މުވައްޒަފުން ނެގޭނެ ގޮތެއް ބޭނުންވާކަމަށް ވެސް ވ އަތޮޅު ކައުންސިލުން ވަނީ ފާހަގަކޮށްފައެވެ.
ވ އަތޮޅުގައި އިތުރު ރިސޯޓެއް ތަރައްގީ ކުރަން ބޭނުންނުވާކަމަށާއި، އެ އަތޮޅުގައި އިތުރު ރިސޯޓެއް ތަރައްޤީކުރުމުން ވ އަތޮޅުގެ ރައްޔިތުންނަށް އެއްވެސް ފައިދާއެއް ނުވާނެ ކަމަށް ވެސް ކައުންސިލުން ވަނީ ރައީސް ޑރ.މުއިއްޒު އަށް ދަންނަވާފައެވެ.
މި ބައްދަލުވުމުގައި ރައީސް ޑރ.މުއިއްޒު ވަނީ އަތޮޅު ކައުންސިލުން ފާހަގަކުރެއްވި ކަންކަން ބައްލަވާނެކަމުގައި ވިދާޅުވެފައެވެ. އަދި އެމަނިކުފާނު ވަނީ ބައްދަލުކުރެއްވުމުގައި ބައިވެރިވެވަޑައިގެންނެވި ވަޒީރުން މެދުވެރިކުރައްވައި ކައުންސިލުން ފާހަގަކުރި ކަންކަމުގައި ސަރުކާރުން ކުރައްވަމުން ގެންދަވާ މަސައްކަތްޕުޅުތަކުގެ އެންމެ ފަހުގެ މަޢުލޫމާތު ހިއްސާކުރައްވާފައެވެ.
Advertisement
This content is created and paid for by advertisers and does not involve Voice Journalists
