ކ.ގުރައިދޫގެ ބިން ހިއްކޭނެ ގޮތާއި ގުޅޭގޮތުން ރައީސުލްޖުމްހޫރިއްޔާ ޑރ.މުހައްމަދު މުއިއްޒު މަޝްވަރާކުރައްވައިފިއެވެ.

ގުރައިދޫ ކައުންސިލާއި އެކު ރައީސް ޑރ.މުއިއްޒު މި މަޝްވަރާކުރައްފައިވަނީ، އެމަނިކުފާނު ގުރައިދޫ އަށް ވަޑައިގެން، ގުރައިދޫ ކައުންސިލް އަދި އަންހެނުންގެ ތަރައްޤީއަށް މަސައްކަތްކުރާ (އ.ތ.މ) ކޮމިޓީއާ އެކު ބޭއްވި ބައްދަލުވުމުގެ ތެރެއިންނެވެ.

މި ބައްދަލުވުމުގައި، ރަށުގެ ތަރައްޤީއަށްޓަކައި ކުރުމަށް ބޭނުންވާ ކަންކަމާ ގުޅޭގޮތުން މަޝްވަރާކޮށްފައިވާއިރު،  ކައުންސިލުން ވަނީ ގުރައިދޫގެ ރައްޔިތުން ބޭނުންވާ ގޮތަށް، ބިން ހިއްކައިދިނުމަށް އެދި، ކުރިން ބިން ހިއްކާފައިވާ ގޮތުން ރަށުގެ ރައްޔިތުންނަށް ކުރިމަތިވާ ގޮންޖެހުންތައް ރައީސް ޑރ.މުއިއްޒު އާއި ހިއްސާކުރައްވާފައެވެ. އަދި ސުކޫލުގެ ކިޔެވުން އެއްދަންފަޅިއަށް ބަދަލުކުރަން  ބޭނުންވާކަމަށާއި، ނަރުދަމާ ނިޒާމު އަލުން އަޅައި، ފުލުހުންގެ އާއިމާރާތެއް ބޭނުންވާކަމަށް ވެސް ކައުންސިލުން ވަނީ ފާހަގަކޮށްފައެވެ. މީގެ އިތުރުންވެސް ގުރައިދޫ ބަނދަރުގައި ހުރި މައްސަލަތައް ކައުންސިލުން ހިއްސާކޮށް، ރަށުގެ ޞިއްޙީ މަރުކަޒުގެ އާ އިމާރާތް ނިމިގެން ދާއިރު އެތަން ހޮސްޕިޓަލަކަށް ބަދަލުކޮށްދެއްވުމަށް ވެސް ވަނީ އެދިފައެވެ.

އ.ތ.މ ކޮމިޓީން ވަނީ އެ ކޮމިޓީއަށް އިތުރު އާމްދަނީ ލިބޭނެ މަގެއް ތަނަވަސްވުމަށް ބޭނުންވާކަމަށް ރައީސް ޑރ.މުއިއްޒު އާއި އެކު ބޭއްވި ބައްދަލުވުމުގެ ތެރެއިން ފާހަަގަކޮށްފައެވެ. 

ރައީސް ޑރ.މުއިއްޒު ގުރައިދޫގެ ބިން ހިއްކޭނެ ގޮތާ ގުޅޭގޮތުން މަޝްވަރާކުރައްވާފައިވާއިރު، ކައުންސިލުން ފާހަގަކުރެއްވި ވަކި ވަކި ކަންކަމަށް އަލިއަޅުވާލައްވައި އެކަމަށް އޮތް ހައްލުތަކާ ގުޅޭގޮތުން ވެސް އެމަނިކުފާނު މަޝްވަރާ ކުރެއްވިއެވެ. އަދި މި ބައްދަލުކުރެއްވުމުގައި ބައިވެރިވެވަޑައިގެންނެވި ވަޒީރުން މެދުވެރިކުރައްވައި ކައުންސިލުން ފާހަގަކުރި ކަންކަމުގައި ސަރުކާރުން ކުރައްވަމުން ގެންދަވާ މަސައްކަތްޕުޅުތަކުގެ އެންމެ ފަހުގެ މަޢުލޫމާތުވެސް ރައީސް ޑރ.މުއިއްޒު ވަނީ ގުރައިދޫގެ ކައުންސިލާއި ހިއްސާކުރައްވާފައެވެ.