ދިވެހިރާއްޖޭގެ މަސްވެރިންނާއި ކަނޑު ދަތުރުކުރާ ފަރާތްތަކަށް ހާއްސަކޮށް ފަރުމާކޮށްފައިވާ 'ރަސްއައިން' މޯބައިލް އެޕްލިކޭޝަން އިފްތިތާހުކޮށްފިއެވެ.

މި އެޕްލިކޭޝަން އިފްތިތާހުކޮށްފައިވަނީ، ދިވެހި ސިފައިންގެ ވައިގެ ބާރު ރަސްމީކޮށް އިފްތިތާހު ކުރުމަށް މިރޭ ނ. މާފަރު އިންޓަނޭޝަނަލް އެއާޕޯޓްގައި ކުރިއަށް ގެންދިޔަ ރަސްމިއްޔާތުގެ ތެރެއިން، ރައީސުލްޖުމުހުރިއްޔާ އަދި ދިވެހިރާއްޖޭގެ ސިފައިންގެ އެންމެ މަތީ ވެރިޔާ ޑރ. މުހައްމަދު މުއިއްޒުއެވެ.

މި އެޕް ލޯންޗުކުރުމަށްފަހު ނެރުނު ރިޕޯޓުގައި ބުނެފައިވާގޮތުން ރަސްއައިންގެ މޯބައިލް އެޕް ވެގެންދާނީ ރާއްޖޭގެ މަސްވެރިންނަށާއި ކަނޑުދަތުކުރު ކުރާ އުޅަނދުފަރަށާއި ދިވެހި ކަނޑުން ނަފާ ހޯދަމުންދާ އެކި އެކި ސިނާއީ މަސައްކަތްތަކުގައި ހަރަކާތްރިވަމުންދާ ފަރާތްތަަކަށް ޓެކްނޮލޮޖީގެ މަންސަތަކުގައި ބޭނުން ހިފޭނެ މުހިއްމު އެޕަކަށެވެ.

Advertisement

އަދި ދިވެހިރާއްޖޭގެ ކަނޑުތަކުގެ ސަލާމަތާއި ރައްކާތެރިކަން ބެލެހެއްޓުމުގައި ގައުމީ ދިފާއީ ބާރުގެ ކޯސްޓް ގާޑުން ކުރާ މަސައްކަތުގައި މަސްވެރިންގެ އެހީތެރިކަމާއި އެއްބާރުލުން ހޯދޭނެ ފަސޭހަ މަގަކަށް މި އެޕްވާނެކަމަށާއި އެންރޮއިޑް އަދި އައިއޯއެސްއަށް ފަރުމާކޮށްގެން ވުޖޫދުކުރާ މި އެޕްގެ ސަބަބުން މަސްވެރިންނަށާއި ކަނޑުދަތުރު ކުރާ ފަރާތްތަކަށް ބޭނުންވާ މުހިއްމު މައުލޫމާތުތަކެއް ލިބިގެން ދާނެކަމަށްވެސް ބުންޏެވެ.

މި އެޕްގައި ދިވެހިރާއްޖޭގެ މެޕާއެކު މޯލްޑިވްސް މީޓިއޮރޮޖިކަލް ސާވިސްއިން ނެރޭ މޫސުމީ އިންޒާރު ފަދަ މުހިއްމު މައުލޫމާތުތައް ހިމަނާފައިވާއިރު މީގެ ސަބަބުން ކަނޑުމައްޗަށް ނުކުންނަ ފަރާތްތަކަށް މޫސުމީ އިންޒާރުތަކުގެ މައުލޫމާތު ފަސޭހައިން ލިބި ކަނޑުމަތީގެ ރައްކާތެރިކަން ކަށަވަރުކޮށްދިނުމުގައި އިތުރު އެހީއަކަށް ވާނެކަން ރިޕޯޓްގައި ފާހަގަކޮށްފައިވެއެވެ.

އަދި މި އެޕްގެ ސަބަބުން ފަތުރުވެރިކަމުގެ ސިނާއަތް ވަރަށް ބޮޑަށް ބަރޯސާވެފައި އޮންނަ ރާއްޖޭގެ މަގްބޫލު ޑައިވް ސައިޓުތަކަށް ޒިޔާރާތްކުރާ ފަރާތްތަކަށާއި މީހުންނާއި މުދާ އުފުލުމުގައި ހަރަކާތްތެރިވާ އުޅަނދު ފަހަރަށްވެސް ފަސޭހަތަކެއް ލިބިގެން ދާނެކަމަށްވެސް ބުންޏެވެ.

ރަސް އައިން އެޕްގައި މަސްކަނދުފަތިތައް އަޅާފައިވާ ސަރަހައްދުތަކާއި އެހެނިހެން ވަސީލަތްތަކުން އެއްކުރާ މަސް ހުންނަ ތަންތަނުގެ މައުލޫމާތާއި ރާއްޖޭގެ ކަނޑުތަކުގެ ދިޔަވަރާއި އޮއިވަރުގެ މައުލޫމާތު ފެންނަން ހުންނަކަން ފާހަގަކޮށް އެ ރިޕޯޓްގައި އިތުރަށް ބުނީ އޭގެ ސަބަބުން، މަސްވެރިންނަށް މަސްވެރިންކަން ރަނގަޅު ސަރަހައްދު ކަނޑައެޅުމުގަ އާއި މަސްއައިން ހޯދުމުގައި ކުރާ ހޭދަ ކުޑަކުރުމަށް އެހީތެރިވެދޭނެކަމަށެވެ.

އަދި މި އެޕްގެ ތިންވަނަ ޓެބް މުއާސަލާތީ ހަބެއްގެ ގޮތުގައި ހާއްސަކުރެވިފައިވާއިރު އުޅަނދުފަހަރުން ފޮނުވާ މެސެޖުތަކާއި ކުއްލި ހާލަތުގައި ފޮނުވާ ޑިސްޓްރޭސް ކޯސްޓްގާޑުގެ ޕުޝް މެސެޖުތައްވެސް މި ޓެބްގައި ފެންނަމުންދާނެ ކަން ފާހަގަކޮށްފައިވެއެވެ.

މީގެއިތުރުން ރަސްއައިން އެޕް ވެގެންދާނީ ރާއްޖޭގެ ކަނޑުތަކުގައި ދަތުރުފަތުރުކުރާ ފަރާތްތަކަށާއި މަސްވެރިކަމުގެ މަސައްކަތަށް އެހީތެރިކަން ފޯރުކޮށްދިނުމާއި ދިެވހި މަސްކަނޑުތައް ހިމާޔަތްކޮށް ބެލެހެއްޓުމުގައި ގައުމީ ދިފާއީ ބާރާއި ދިވެހި މަސްވެރިން ގުޅިގެންގެން ކުރާ މަސައްކަތަށް ލިބިގެންދާނެ ވަރަށް ބޮޑު ކުރިއެރުމަކަށްކަމަށާ މިއީ ރާއްޖޭގެ ކަނޑުތަކުގެ ސަލާމަތާއި ރައްކާތެރިކަން ގާއިމްކުރުމަށްޓަކައި މެރިޓައިމް ޑޮމެއިން އެވަޔަނަސް އިތުރުކުރެވޭ މުހިއްމު ވަސީލަތަކަށް ވާނެކަމަށްވެސް އެ ރިޕޯޓުގައި ބުނެފައިވެއެވެ.