މާލެ ސަރަހައްދުގެ އިހުސާސްކުރެވޭ ފިނިހޫނުމިން 43 ޑިގްރީ ސެލްސިއަސްއަށް އަރައިފިއެވެ.

މޫސުމާއި ބެހޭ ގައުމީ އިދާރާ، މެޓް އޮފީހުން އެންމެ ފަހުން އާއްމު ކުރި މައުލޫމާތުގައި ވާ ގޮތުން މިއަދުގެ 11:00 ގައި ހުޅުލޭގެ ހޫނުމިން ހުރީ 32.2 ޑިގްރީ ސެލްސިއަސްގައެވެ. ނަމަވެސް އިހުސާސް ކުރެވޭ ހޫނުމިން ހުރީ 43.0 ޑިގްރީ ސެލްސިއަސް ގައެވެ.

އަދި ހަނިމާދޫއަށް ހޫނުމިން 33.1 ޑިގްރީ ސެލްސިއަސްގައި ހުރި އިރު، އެރަށުގައި އިހުސާސްކުރެވޭ ހޫނުމިން ހުރީ 42.5 ގައެވެ.

Advertisement

މީގެ އިތުރުން ކައްދޫއަށް ހޫނުމިން 31.3 ގައި ހުރި އިރު، އިހުސާސްކުރެވޭ ހޫނުމިން ހުރީ 40.4 ގައެވެ. އަދި ކާޑެއްދޫގެ ހޫނުމިން 31.5 ޑިގްރީ ސެލްސިއަސް ގައި އުޅޭއިރު އިހްސާސް ކުރެވޭ ހޫނުމިނަކީ 40.7 ޑިގްރީ ސެލްސިއަސްއެވެ.

މާޗް އަދި އޭޕްރީލް މަހަކީ އަހަރުގެ ތެރޭގައި ރާއްޖޭގެ ސަރަހައްދަށް ހޫނުމިން އެންމެ މައްޗަށްދާ ދުވަސްވަރު ކަމަށްވާޢިރު ވިލާ މަދުވުމާއި، ވައި މަޑުވުން އަދި ވައިގެ ތެތްކަން މަތިކޮށް ހިފެހެއްޓިފައި ހުރުމުގެ ސަބަބުން ވައިގެ ހޫނުމިނަށްވުރެ އިހްސާސްކުރެވޭ ހޫނުމިން އިތުރަށް މަތިވުމުގެ ފުރުސަތު އޮތްކަމަށްވެސް މެޓް އޮފީހުން ބުނެފައިވެއެވެ. 

މީގެ އިތުރުންވެސް މި އަހަރަކީ އެލްނީނޯ އަހަރެއް ކަމުން ހޫނުމިން އިތުރަށް މަތިވުމުގެ ފުރުސަތު އޮތްކަން ދުނިޔޭގެ މޫސުމާބެހޭ ޖަމިއްޔާއިން ލަފާކޮށްފައިވާ ކަމަށް ބުނެފައިވެއެވެ.

އެލްނީނޯ އަހަރަކީ މެދުތެރެއާއި އިރުމަތީ ޓްރޮޕިކަލް ޕެސިފިކް ކަނޑުގެ ސަރަހައްދު ހޫނުވުން، ނުވަތަ ކަނޑުގެ ސަރަހައްދުގެ ފިނިހޫނުމިން އެވްރެޖަށްވުރެ މަތިވާ މަތިވުމަށް ދެވިފައިވާ ނަމެކެވެ.