ޤަވާއިދާ ހިލާފަށް އުޅޭ ހުރިހާ ބިދޭސީން އެއް އަހަރު ތެރޭ ހޯދާނެކަމަށް ހޯމްލޭންޑް ސެކިއުރިޓީ އެންޑް ޓެކްނޮލޮޖީގެ މިނިސްޓަރު އަލީ އިހުސާން ވިދާޅުވެއްޖެއެވެ.

މިނިސްޓަރު މިހެން ވިދާޅުވީ، މާފަންނު މެދު ދާއިރާގެ މެންބަރު އިބްރާހީމް ރަޝީދު، ހޯމް މިނިސްޓަރ އަލީ އިހުސާނަށް ކުރައްވާ ސުވާލަށް ޖަވާބުދެއްވުމަށް މަޖިލީހަށް ހާޒިރުވެވަޑައިގެން ޖަވާބުދެއްވަމުންނެވެ.

އިހުސާން ވިދާޅުވީ ރާއްޖޭގައި ބިދޭސީންގެ ދަފްތަރެއް ކައުންސިލްތަކުގައި އޮތުމަކީ މުހިއްމު ކަމެއް ކަމަށެވެ. ނަމަވެސް، ކައުންސިލްތަކުގައި ބިދޭސީންގެ ޑޭޓާބޭސް އަށް އެކްސެސް ނެތުމަކީ އެފަދަ ކަމެއް އެހާ ފަސޭހައިން ކުރެވިދާނެ ކަމެއް ނޫންކަމަށާއި ކުރިއަށް އޮތް އެއް އަހަރުގެ ތެރޭގައި ރާއްޖޭގައި ތިބި ހުރިހާ ބިދޭސީންގެ ޑޭޓާބޭސް ނަގާ އޭގެ އެކްސެސް ކައުންސިލްތަކަށް ދޭނެ ކަމަށްވެސް އިހުސާން ވިދާޅުވިއެވެ.

Advertisement

އިހުސާން އިތުރަށް ވިދާޅުވީ، މިކަން މިގޮތަށް ކުރެވިއްޖެނަމަ، ކައުންސިލުތަކަށް އެ ބާރު ލިބި ބިދޭސީންގެ ތެރެއިން ފުރާ ބަޔަކު ފުރިކަމާއި އެނބުރި އަންނަ ބަޔަކު އައިކަންވެސް މި ޑޭޓާބޭސް ގެ ޒަރިއްޔާއިން ލިބިގެންދާނެ ކަމަށެވެ. 

މިހާރުވެސް އެކިއެކި މައްސަލަތަކުގައި ހައްޔަރުކުރަމުންދާ ބިދޭސީން އައިޑީ ނުކުރެވުމުގެ ސަބަބުން ދިމާވާ އުނދަގޫތަކުގެ ވާހަކަ އިހުސާން ވަނީ ފާހަގަ ކުރައްވާފައެވެ. އެހެންކަމުން، މިފަދަ ޑޮކިއުމެންޓޭޝަނެއް އޮތުމަކީ މުހިންމު ކަމެއް ކަމަށް އިހުސާން ވަނީ ވިދާޅުވެފައެވެ.

ޤަވާއިދާ ޚިލާފަށް އުޅޭ ބިދޭސީންގެ މައްސަލައަކީ ރާއްޖޭގައި ވަރަށް ބޮޑުވެފައިވާ މައްސަލައެކެވެ.