ކުރީ ސަރުކާރުން، ގެދޮރުވެރިޔާ އަދި ބިންވެރިޔާ ސްކީމްގެ ދަށުން ކުރިއަށް ގެންދިޔަ ބޯހިޔާވަހިކަމުގެ މަޝްރޫއުގެ ތެރެއިން ގޯއްޗާއި ފުލެޓް ލިބުނު މީހުންނަށް އެ ނުދީ ހިފަހަށްޓާފައިވާ ހިފެހެއްޓުމަކީ ގާނޫނީ ކުށެއް ކަމަށް ކުރީގެ ރައީސް އަދި އެމްޑީޕީގެ އެޑްވައިޒަރ އިބްރާހީމް މުހައްމަދު ޞާލިހު ވިދާޅުވެއްޖެއެވެ.

ކުރިއަށް އޮތް ރައްޔިތުންގެ މަޖިލީހުގެ އިންތިޚާބުގައި މާފަންނު އުތުރު ދާއިރާއަށް އެމްޑީޕީގެ ޓިކެޓްގައި ވާދަކުރައްވާ ކެނޑިޑޭޓްގެ ކެންޕެއިން ޖަލްސާގައި ވާހަކަ ދައްކަވަމުން، ޞާލިހު ވިދާޅުވީ ބޯހިޔާވަހިކަމުގެ މައްސަލައަކީ މާލެއަށް ދިމާވެފައިވާ އެންމެ ބޮޑު މައްސަލަ ކަމަށެވެ.

ކަންމިހެން ހުރި ނަމަވެސް، އެ ސަރުކާރުން ކުރި މަސައްކަތްތަކުން، އެ ސަރުކާރުގެ ޕްލޭނާއި އެއްގޮތަށް ގުޅީފަޅު، ގިރާވަރުފަޅު، އަދި ހުޅުމާލޭ ފޭސް 3 ހިއްކުމުގެ ޢަމަލީ މަސައްކަތް ފެށިގެން ދިޔަ ކަމަށް އެމަނިކުފާނު ވިދާލުވިއެވެ. 

ޞާލިހު ވިދާޅުވިގޮތުގައި، ގޯތި ދޫކުރުމުގެ މަސައްކަތަކީ ވަރަށް ގިނަ ގޮންޖެހުންތަކާއި ކުރިމަތިލާންޖެހުނު ކަމެއް ކަމަށެވެ. އަދި، އެންމެ ފުރަތަމަ މާލޭގެ ރަށްވެހިންނަށް ގޯތިދޭން ނިންމީ، އެފަރާތްތަކީ އެތައް އަހަރެއް ވަންދެން އެ ހައްގުން މަހްރޫމްވެފައި ތިބި މީހުން ކަމަށް ވުމުން ކަމަށް އެމަނިކުފާނު ވިދާޅުވިއެވެ. 

ޞާލިހު ވިދާޅުވީ މަޖިލިސް ތެރެއިން، މާލޭގެ ރައްޔިތުންނަށް ދިން ގޯއްޗާއި ފުލެޓް ހަވާލުކުރުމުގެ މަސައްކަތް އެމްޑީޕީން ކުރާނެ ކަމަށާ، އެކަން ހުއްޓުވައިގެން ސަރުކާރަށް ނުހުރެވޭނެ ކަމަށެވެ. އަދި ސަރުކާރުން ބޭނުން ގޮތަކަށް ލިސްޓުތައް ބަދަލުވެސް ނުކުރެވޭނެ ކަމަށް އެމަނިކުފާނު ވިދާޅުވިއެވެ. 

ރައީސް ޞާލިހު މިހެންވިދާޅުވެފައިވާއިރު، އެމަނިކުފާނުގެ ސަރުކާރުން އިއުލާންކުރި ގެދޮރުވެރިޔާ ސްކީމްގެ ދާއިމީ ލިސްޓާ މެދު ގިނަ ބަޔަކު ހިތްހަމަނުޖެހުން ފާޅުކޮށް އޭސީސީ އަށް ހުށައެޅި ޝަކުވާތަކާ ގުޅިގެން ފްލެޓު ދިނުމުގެ ހުރިހާ ކަމެއް ހުއްޓާލަން މީގެ ކުރިން މިނިސްޓްރީ އަށް އެންގިއެވެ. އަދި އެފަހުން އެ މައްސަލާގައި ކުރެވުނު ތަހުގީގުން އެނގުނު ގޮތުން ގެދޮރުވެރިޔާ ސްކީމްގެ ދަށުން ދޫކޮށްފައިވާ 4000 ފުލެޓްގެ ތެރެއިން، ފްލެޓް ލިބޭ މީހުންގެ 59.6 އިންސައްތަ މީހުންގެ ޝަރުޠު ހަމަނުވެއެވެ.