މި ސަރުކާރުގައި 1500 އަށް ވުރެން ގިނަ ސިޔާސީ މަގާމު އުފައްދާފައިވާކަމަށް އަންދާޒާކުރެވޭކަމަށް ކުރީގެ ރައީސް އަދި އެމްޑީޕީގެ އެޑްވައިޒަރ އިބްރާހީމް މުޙައްމަދު ޞާލިހު ވިދާޅުވެއްޖެއެވެ.
ކުރިއަށް އޮތް ރައްޔިތުންގެ މަޖިލީހުގެ އިންތިޚާބުގައި މާފަންނު އުތުރު ދާއިރާއަށް އެމްޑީޕީގެ ޓިކެޓްގައި ވާދަކުރައްވާ ކެނޑިޑޭޓްގެ ކެންޕެއިން ޖަލްސާގައި ވާހަކަ ދައްކަވަމުން ޞާލިހު ވިދާޅުވީ, މި އަހަރުގެ ފުރަތަމަ ތިން މަސްދުވަހާ މިދިޔަ އަހަރުގެ އެ މުއްދަތާ އަޅާބަލާއިރުގައި 300 މިލިއަން ރުފިޔާ އިތުރަށް ސަރުކާރުން ޚަރަދުކޮށްފައިވާ ކަމަށެވެ. ނަމަވެސް މި ސަރުކާރުން ކުރެއްވީ ކޮން ކަމެއްތޯ ސޯލިހު ވަނީ ސުވާލު އުފައްދަވާފައެވެ.
ކޮންކަމެއްތޯ ކުރީ؟ ބަލާލާއިރުގައި، 1700 ޕްރޮޖެކްޓް ހުއްޓާލައިފި. މި ފައިސާ ޚަރަދުކުރީ ކޮންބަޔަކަށްތޯ؟
ކުރީގެ ރައީސް އިބްރާހީމް މުހައްމަދު ޞާލިހު
ޞާލިހު އިތުރަށް ވިދާޅުވީ، ދައުލަތުން ފައިސާ ޚަރަދުކޮށްފައިވާ ގޮތުގެ ތަފްޞީލު ހޯދުމަށްޓަކައި ރައީސް އޮފީހަށާއި އަދި ފިނޭންސް މިނިސްޓްރީއަށް ވެސް ސިޓީ ހުށަހެޅިކަމަށާއި ނަމަވެސް މިކަމާ ގުޅޭ އެއްވެސް މައުލޫމާތެއް ލިބިފައިނުވާ ކަމަށެވެ. ނަމަވެސް އެނގޭ ކަމަކީ ސިޔާސީ މަޤާމުތަކަށް މީހުން ދާކަން ކަމަށް ޞާލިހު ވަނީ ފާހަގަކުރައްވާފައެވެ.
އެނގޭކަަމަކީ، ސިޔާސީ މަޤާމުތަކަށް މީހުން އެބަދާކަން. ފުނިފުންޏަށް. ބައެއް މިނިސްޓްރީ ތަކުގައި އިށީންނާނެ ތަނެއް ނެތް. ކޮރިޑޯތަކުގައި ކިޔޫގަ ޖެހިފަ ތިބޭކަމަށް ވަނީ. ޑިއުޓީ ބަހައިގެން.
ކުރީގެ ރައީސް އިބްރާހީމް މުހައްމަދު ޞާލިހު
ޞާލިހު ވިދާޅުވީ، މި ސަރުކާރުގައި 1500 އަށް ވުރެން ގިނަ ސިޔާސީ މަޤާމު އުފައްދާފައިވާކަމަށް އަންދާޒާކުރެވޭ ކަމަށެވެ. އެހެންނޫނަމަ، މަހެއްގެ މައްޗަށް 100، 150 މިލިއަން ރުފިޔާ ދައުލަތުގެ ބަޖެޓަކުން ރިކަރަންޓު ޚަރަދަކަށް މުސާރައަކަށް ޚަރަދު ކުރަން ނުޖެހޭނެކަމަށްވެސް ޞާލިހު ވަނީ ވިދާޅުވެފައެވެ.
މިއަދުގެ ސަރުކާރުން ހިންގާ ބޮޑެތި އޮޅުވާލުންތަކާއި ދޮގުތައް ހުއްޓުވުމަށްޓަކައި މަސައްކަތް ކުރެވެން އޮތް އެންމެ ބޮޑު ޕްލެޓްފޯމަކީ ރައްޔިތުންގެ މަޖިލީސް ކަމަށް ޞާލިހު ވިދާޅުވިއެވެ. އެމްޑީޕީގެ މެޖޯރިޓީ މަޖިލީހުގައި އޮންނަންޖެހޭނެކަން ފާހަގަކުރައްވައި ޞާލިހު ވިދާޅުވީ މި ސަރުކާރަށް މަޖިލީހުގެ މެޖޯރިޓީ ލިބިއްޖެކަމުގައި ވަނީނަމަ، ޤައުމު ނާމާން ހާލަތަކަށް ވެއްޓިގެންދާނެ ކަމަށެވެ.
Advertisement
This content is created and paid for by advertisers and does not involve Voice Journalists
