ވިލިމާލޭގައި 100 އެނދުގެ ޓާޝަރީ ހޮސްޕިޓަލެއް ގާއިމުކުރުމުގެ މަސައްކަތް ވަރަށް އަވަހަށް ފަށާނެ ކަމަށް، ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.
ރައީސް މުއިއްޒު މިފަދައިން ވިދާޅުވެފައިވަނީ އާންމުންނަށް ސީދާ ރައީސާ ސުވާލުކުރެވޭ 'ރައީސްގެ ޖަވާބު'ގެ ސިލްސިލާގައި ވިލިމާލޭގެ ރައްޔިތަކު ކުރެއްވި ސުވާލަކަށް ޖަވާބުދެއްވަމުންނެވެ.
ވިލިމާލޭގެ ސިއްޙީ ހާލަތު މިއަދު އޮތްގޮތާ ބެހޭގޮތުން މާލެ ސިޓީ، ވ.ފަޒީލާމަންޒިލް، އަޙުމަދު ޝިފާން ކުރެއްވި ސުވާލުގައި ބުނެފައިވަނީ ސިއްހީ މަރުކަޒުން ފޯރުކޮށްދޭންޖެހޭ ފެންވަރުގެ ޚިދުމަތެއް ވިލިމާލޭގެ ހޮސްޕިޓަލުން ފޯރުކޮށްނުދެވޭ ކަމަށެވެ. އަދި ބަލިވެގެންނާއި ކުއްލި ހާލަތެއް ދިމާވެގެން ވިލިމާލޭ ހޮސްޕިޓަލަށް ދިޔަކަމުގައި ވިޔަސް، ހޮސްޕިޓަލުން ޚިދުމަތް ފޯރުކޮށްދިނުމުގެ ބަދަލުގައި ބަލިމީހާ ފޮނުވާލަނީ މާލެއަށްކަމަށް ބުނެ ކަންބޮޑުވުން ވަނީ ފާޅުކޮށްފައެވެ. މިކަންކަން ޙައްލުކޮށް، ވިލިމާލޭގައި ހޮސްޕިޓަލެއްގެ ފެންވަރުގައި ޚިދުމަތް ދެވެން ފެށޭނީ ކޮންއިރަކުތޯ ވަނީ ރައީސް މުއިއްޒުއާ ސުވާލުކުރައްވާފައެވެ.
ރައީސް މުއިއްޒު ވިދާޅުވީ، ވިލިމާލޭގެ ސިއްހީ ޚިދުމަތް ރަނގަޅުކުރުމަކީ އެމަނިކުފާނު ވަރަށް ޚާއްސަ އިސްކަމެއްދޭ ސިޔާސަތެއް ކަމަށެވެ. އެގޮތުން، އެމަނިކުފާނު ވިލިމާލޭގައި 100 އެނދުގެ ޓާޝަރީ ހޮސްޕިޓަލެއް ގާއިމުކުރުމަށް ވައުދުވެވަޑައިގެންނެވި ގޮތަށް އެ މަސައްކަތް ކުރަން ފަށާފައިވާކަމަށް ވަނީ ވިދާޅުވެފައެވެ. އެގޮތުން، މިއީ ޗައިނާގެ ހިލޭ އެހީގެ ދަށުން ކުރިއަށް ގެންދާ މަސައްކަތެއް ކަމަށާއި، ޗައިނާގެ ކަމާބެހޭ އިދާރާގެ ބޭފުޅުންނާއި، މިނިސްޓްރީ އޮފް ކޮންސްޓްރަކްޝަން އެންޑް އިންފްރާސްޓްރަކްޗަރ އާއި އަދި މިނިސްޓްރީ އޮފް ހެލްތު އާ ގުޅިގެން ޑިޒައިނިންގ އާއި ޓެކްނިކަލް މަސައްކަތް ކުރަމުންދާކަމަށާއި ހޮސްޕިޓަލް އެޅުމަށް ބިން ވެސް ކަނޑައަޅާފައިވާ ކަމަށް ރައީސް މުއިއްޒު ވަނީ ވިދާޅުވެފައެވެ.
އެހެންކަމުން، މި މަސައްކަތް ނިމުމުން މިކަމުގެ ޢަމަލީ މަސައްކަތް ފަށާ، ވިލިމާލޭގެ ރައްޔިތުން އެދޭގޮތަށް އެތަނުގައި ޓާޝަރީ ހޮސްޕިޓަލެއް ގާއިމުކުރެވިގެންދާނެ ކަމަށް ރައީސް މުއިއްޒު ވަނީ ވިދާޅުވެފައެވެ.
Advertisement
This content is created and paid for by advertisers and does not involve Voice Journalists
