ޝަރީޢަތް ނިމެންދެން ބަންދުގައި ތިބި މީހުން ދޫކޮށް ލުއި ދިނުމަށް ނިންމަނީ ކޯޓުތަކުންކަމަށާއި ރައީސުލްޖުމްހޫރިއްޔާ ނޫންކަމަށް މިނިސްޓަރ އޮފް ހޯމްލޭންޑް ސެކިއުރިޓީ އެންޑް ޓެކްނޮލޮޖީ އަލީ އިހުސާން ވިދާޅުވެއްޖެއެވެ.
މިނިސްޓަރު އިހުސާން މިއަދު އެކްސްގައި ކުރެއްވި ޕޯސްޓެއްގައި ވިދާޅުވެފައިވަނީ، ތަހުގީގު ނިމެންދެން ނުވަތަ ޝަރީޢަތް ނިމެންދެން ބަންދުގައި ތިބޭމީހުން ދޫކޮށް ލުއި ދިނުމަކީ ރައީސް ޑރ. މުޙައްމަދު މުއިއްޒުއާއި އެމަނިކުފާނުގެ ސަރުކާރުން ކުރައްވަމުން ގެންދަވާ ކަމެއް ނޫންކަމަށެވެ. އަދި މިފަދަ ނިންމުންތައް ނިންމަނީ ރާއްޖޭގެ ކޯޓުަތަކުން ކަމަށްވެސް އިހުސާން ވިދާޅުވިއެވެ.
ތިންބާރު ވަކިވެފަ އޮންނަ ނިޒާމެއްގައި މިފަދަ ކަންކަން ސާފުވުން މުހިއްމު. މީގެ ދެތިން ދުވަސް ކުރިން ކުޑަކުއްޖަކާމެދު ޖިންސީ ޢަމަލެއް ހިންގިކަމުގެ ދަޢުވާގައި ބަންދުގައި ހުރި މީހަކު ކޯޓުން ދޫކޮށްލުމުން އެކަން ހިނގި ގޮތް ރައްޔިތުންނަށް އޮޅުވާލަމުންދާތީ އެކަން ސާފުކޮށްދެން. އެ ނިންމުމަކީ ކޯޓުގެ ނިންމުމެއް. ސަރުކާރުގެ ނިންމުމެއް ނޫން. އެ ނިންމުން ޕީޖީން ދަނީ އިސްތިއުނާފު ކުރަމުން.
ހޯމް މިނިސްޓަރ އަލީ އިހުސާން
މިނިސްޓަރު އިހުސާން އިތުރަށް ވިދާޅުވިގޮތުގައި، މިކަން މިގޮތަށް އޮތްކަމުގައި ވީނަމަވެސް، ޝަރީޢަތްތައް ލަސްވެ އިންސާފު ނުލިބި، ހުކުމަކާނުލާ އެތައް ދުވަސްތަކެއް ޖަލުގައި މީހުން ބަންދުކޮށްފައި ތިބުމަކީ މި ސަރުކާރުން ބަލައިގަންނާނެ ކަމެއް ނޫންކަމަށެވެ. މިކަމަށް ޙައްލެއް ގެނައުމަށްޓަކައި ސަރުކާރުން ދަޢުލަތުގެ ހުރިހާ ކަމާބެހޭ މުއައްސަސާތަކާއެކު މަސައްކަތް ކުރަމުންދާ ކަމަށްވެސް އިހުސާން ވިދާޅުވިއެވެ.
މީގެ އިތުރުން، "ވާނުވާ ބަންދު"ގައި ޙުކުމަކާނުލާ މީހުން ތިބޭ ތިބުން ނިމުމަކަށް ގެނައުން އެއީ ރައީސް މުއިއްޒުގެ ވައުދުފުޅެއްކަމަށާއި އެކަން ކުރާނެކަމުގެ ޔަގީންކަން ވަނީ މިނިސްޓަރ އިހުސާން ދެއްވާފައެވެ.
Advertisement
This content is created and paid for by advertisers and does not involve Voice Journalists
