މިނިސްޓްރީ އޮފް ޓްރާންސްޕޯޓް އެންޑް ސިވިލް އޭވިއޭޝަނުން 'ކޯލް ބެކް ސާވިސް' ޚިދުމަތް ތަޢާރަފުކޮށްފިއެވެ.

އެ މިނިސްޓްރީން އެކްސްގައި މިއަދު ކުރި ޕޯސްޓެއްގައި ބުނެފައިވަނީ، މިނިސްޓްރީގެ ހޮޓްލައިން ނަންބަރު، 1511 އިން މިހާރު ކޯލް ބެކް ސާވިސް ގެ ޚިދުމަތް ލިބިގެންދާނެކަމަށެވެ.

މި މިނިސްޓްރީގެ 1511 ޚިދުމަތަށް އަލަށް ތަޢާރަފްކުރި ކޯލް ބެކް ސަރވިސް ޚިޔާރުކުރެއްވުމުން ކޯލް ކިއުގައި ގިނަވަގުތު މަޑުނުކުރާކަށް ނުޖެހޭނެއެވެ.

Advertisement

އަދި ކަސްޓަމަރުން އެދިލައްވާ މަޢުލޫމާތު ކަސްޓަމަރުންނަށް ފޯރުކޮށްދިނުމަށްޓަކައި މިނިސްޓްރީގެ ކޯލް ސެންޓަރުން އަނބުރާ ގުޅާނެ އިންތިޒާމު މިހާރުވަނީ ހަމަ ޖެހިފައިކަމަށް އެ މިނިސްޓްރީން ބުނެފައިވެއެވެ.

އާއްމުކޮށް ހުރިހާ ކަސްޓަމަރުން އެއްފަހަރާ ފޯނުން ޚިދުމަތް ހޯދަމުން އަންނަ ތަންތަން ވަރަށް ގިނައެވެ. އެގޮތުން، ޓްރާންސްޕޯޓް މިނިސްޓްރީ، ވެމްކޯ، މޯލްޑިވިއަން، އަދި ސިއްހީ ހިދުމަތް ފޯރުކޮށްދޭ ތަންތަނަށްވެސް އެއްފަހަރާ 15، 20 އަދި އެއަށްވުރެންވެސް ގިނަ ކަސްޓަމަރުން ގުޅުމުގެ ސަބަބުން ކިއޫގައި އެތައް އިރެއް ވަންދެން ތިބެން ޖެހުމުގެ ޝަކުވާ ވަރަށް ބޮޑުވެއެވެ.

މިކަމާ ގުޅިގެން، އެކި ތަންތަނުން އަންނަނީ ކަސްޓަމަރުންނަށް ކިއޫގައި ތިބެން ނުޖެހި ލުއިފަސޭހަ ގޮތެއްގައި މުއާމަލާތު ކުރެވޭނެ އެކިކަހަލަ އިންތިޒާމުތައް އޮންލައިން ޕްލެޓުފޯމުތައް މެދުވެރިކޮށްވެސް ހަމަޖައްސައިދެމުންނެވެ.