ފެންބިލާ ކަރަންޓު ބިލުގެ ޖޫރިމަނާ މާފު ކޮށްދޭނީ އޭޕްރީލް 1 އިން ޑިސެމްބަރު 31، 2024ގެ ނިޔަލަށް ޖޫރިމަނާ ވެފައިވާ ބިލްތަކުގެ ޖުމްލަ ފައިސާ ދައްކާ ހަލާސް ކުރުމުން ކަމަށް އެމްޑަބްލުއެސްސީއިން ބުނެފިއެވެ.

އާއްމު ރައްޔިތުންގެ މާލީ ހާލަތު ރަނގަޅު ކުރުމަށްޓަކައި ސަރުކާރުން އަޅަމުންދާ ފިޔަވަޅުތަކުގެ ތެރެއިން އިތުރު ލުޔެއް ދިނުމުގެ ގޮތުން ކަރަންޓް އަދި ފެން ބިލު ނުދެއްކިގެން އަރާފައިވާ ޖޫރިމަނާ ރައީސް ޑރ. މުހައްމަދު މުއިއްޒު މައާފު ކޮށްދެއްވަން ނިންމަވާފައިވާކަން މި މާރިޗު މަހުގެ 24 ވަނަ ދުވަހު ވަނީ އިއުލާންކޮށްފައެވެ. އަދި އެކަން އެ ޚިދުމަތްދޭ ފަރާތްތަކަށް އަންގަވާފައިވާނެ ކަމަށްވެސް އެމަނިކުފާނު ވަނީ ވިދާޅުވެފައެވެ.

އެކަމާއި ގުޅިގެން އެމްޑަބްލިޔުއެސްސީން އިން ނެރުނު ބަޔާނެއްގައި ބުނީ، ސަރުކާރުގެ އެ ނިންމުމާއިއެކު، ނިމިދިޔަ ޑިސެމްބަރު މަހުގެ 31 ގެ ނިޔަލަށް އަރާފައިވާ ޖޫރިމަނާ މަޢާފު ކުރެވިގެންދާނެ ކަމަށެވެ. އަދި ޖޫރިމަނާ މަޢާފް ކޮށްދެވޭނީ އެ މުއްދަތައް ޖޫރިމަނާ އަރާފައިވާ ބިލްތަކަށް ދައްކަންޖެހޭ ޖުމްލަ ފައިސާ އޭޕްރީލް 1 އިން ޑިސެމްބަރު 31، 2024ގެ ނިޔަލަށް ދެއްކުމުން ކަމަށްވެސް ބުނެފައިވެއެވެ.

މިއާއެކު އެމްޑަބްލިޔުއެސްސީން ބުނީ، ބިލުތައް އެއްފަަހަރާ ދެއްކުމަށް ދަތިވާ ފަރާތްތަކަށް ބިލްތައް މަހުން މަހަށް ބަހާލައިގެން ފައިސާ ދައްކާ ހަލާސްކުރެވޭނެ އިންތިޒާމުވެސް އެ ކުންފުނިން ހަމަޖައްސައިދޭނެކަމަށެވެ. އަދި މަހުން މަހަށް ބަހާލައިގެން ފައިސާ ދައްކާ ކަސްޓަމަރުންނަށް ޖޫރިމަނާ މާފްކޮށްދެވޭނީ އެއްބަސްވުމާއި އެއްގޮތަށް ފައިސާ ދައްކާ ހަލާސްކުރުމުންކަމަށްވެސް ވަނީ ބުނެފައެވެ.

މިކަމާ ބެހޭ އިތުރު މައުލޫމާތު ހޯދުމަށް އެމްޑަބްލިއުއެސްސީގެ ކަސްޓަމާ ކެއާ ސެންޓަރުގެ ހޮޓްލައިން 105 އަށް ގުޅުމުން ނުވަތަ 1050 އަށް އެސއެމްއެސްއެއް ފޮނުވުމުން ނުވަތަ އެކުންފުނީގެ އީމެއިލްއަށް މެއިލް ކުރުމުން ލިބޭނެ ކަމަށް ވަނީ ބުނެފައެވެ.

އެހެންކަމުން އެމްޑަބްލިއުއެސްސީ އިން ވަނީ ފުރުސަތުގެ ބޭނުން ހިފައު ނުދެއްކި ހުރި ބިލްތައް ގަވައިދުން ދައްކާ ހަލާސްކުރުމަށް އިލްތިމާސްކޮށްފައެވެ.