ވޭތުވެދިޔަ 3 މަސްދުވަހުން ޓުއަރިޒަމް ސެކްޓާއިން އެކަނިވެސް 58 މިލިއަން ޑޮލަރުގެ ގެއްލުން ވެފައިވާ ކަމަށް އިދިކޮޅު އެމްޑީޕީގެ އެޑްވައިޒަރު އަދި ކުރީގެ ރައީސް އިބްރާހިމް މުހައްމަދު ޞާލިހު ވިދާޅުވެއްޖެއެވެ.

'މިސްރާބު ހަމަމަގަށް' ޝިޢާރުގެ ދަށުން އެމްޑިޕީން ކުރިއަށްގެންދާ ކެމްޕެއިން ހަރަކާތްތަކުގެ ތެރެއިން ރޭ ބޭއްވި ގަލޮޅު ތަރާވީސް ޖަލްސާގައި ރައީސް ޞާލިހު ވިދާޅުވީ، ރާއްޖެއަށް އެންމެ ބޮޑަށް އާމްދަނީ ލިބެނީ ޓުަރިޒަމް ސެކްޓާ އިން ކަމަށެވެ.

މިއަދުގެ ސަރުކާރުގެ ޚާރިޖީ ސިޔާސަތު ބައްޓަންކުރެވިފައި އޮތްގޮތާމެދު ކަންބޮޑުވުން ފާޅުކުރައްވާ ރައީސް ޞާލިހު ވިދާޅުވީ، ވޭތުވެދިޔަ ތިން އަހަރު ދުވަހު ރާއްޖެއަށް އިންޑިޔާ ޓުއަރިސްޓުން އައި ނިސްބަތާ އަޅާބަލާއިރު މިފަހަރު ވަރަށް ބޮޑުތަން ދަށަށް ގޮސްފައިވާ ކަމަށެވެ.

ރައީސް ޞާލިހު ވިދާޅުވީ، ޓުއަރިޒަމް ސެކްޓާއިން އެކަނިވެސް 58 މިލިއަން ޑޮލަރުގެ ގެއްލުން ވޭތުވެދިޔަ 3 މަސްދުވަސް ތެރޭ ވެފައިވާ ކަމަށެވެ.

އިގްތިސާދީ އެއްވެސް ތަސައްވަރެއް މި ސަރުކާރުގައި ނެތްކަމަށް ސިފަކުރައްވައި ރައީސް ޞާލިހު ވިދާޅުވީ، ދައުލަތުގައި އާމްދަނީ މަދުވަމުންދާ ސަބަބަކީ މިއީ ކަމަށެވެ.  

މީގެ އިތުރުން ޓެކްސް ގެ ގޮތުގައި ލިބޭ އާމްދަނީ އިތުރުވަމުންދިޔަ ނަމަވެސް، އެކަމަކީވެސް ނިމިދިޔަ ސަރުކާރުން ޓެކްސްގެ ނިޒާމަށް ގެނައި ބަދަލާ ގުޅިގެން ފެންނަމުންދާ މަންޒަރެއްކަމަށް ރައީސް ޞާލިހު ވަނި ވިދާޅުވެފައެވެ.

ރައީސް ޞާލިހު އިތުރަށް ވިދާޅުވީ، މިސްރާބު މިއަދު އޮތީ ފާލުން ނައްޓައިގެން ގޮސްފައި ކަމަށެވެ. މިއަދުގެ ރައީސް އެގެންދަވަނީ ކޮންމެ ދޮޅު ދުވަހަކުން ދޮގެއް ހައްދަވަމުން ކަމަށާއި، ދޮޅު ދުވަހަކުން ދޮގެއް ހައްދަވާ ވެރިއަކު ފަސް އަހަރު ދުވަހު ހުރިކަމުގައި ވާނަމަ، ދެންވާނީ ކިހިނެއްތޯ ރައީސް ޞާލިހު ވަނީ ސުވާލު އުފައްދަވާފައެވެ.