ކުނީގެ ޓަނަކަށް މިހާރު ނަގަމުންދާ 750 ރުފިޔާ 500 އަށް ކުޑަކޮށްދެއްވާނެކަމަށް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ވިދާޅުވެއްޖެއެވެ. 

ރައީސް ޑރ.މުޢިއްޒު މިގޮތަށް ވިދާޅުވެފައިވަނީ 2024 ވަނަ އަހަރުގެ ރައްޔިތުންގެ މަޖިލީހުގެ ދާންދޫ ދާއިރުާގައި ވާދަކުރައްވާ ސަރުކާރު ކެންޑިޑޭޓް، މުޙައްމަދު ފަޒީލުގެ ކެމްޕެއިން ޖަލްސާގައި އެމަނިކުފާނު ވާހަކަފުޅު ދައްކަވަމުންނެވެ.

އެމަނިކުފާނު ވިދާޅުވީ، މިއަދު މި ދިވެހިރާއްޖެއަށް ދިމާވެފައިވާ އެންމެ ބޮޑު އެއް މައްސަލައަކީ ކުނީގެ މައްސަލަ ކަމުގައެވެ.

ކުރީގެ ސަރުކާރު ނިމުނުއިރު ވެމްކޯ އޮތީ ވަރަށް ހާލުގައިކަމަށް ފާހަގަކުރައްވައި ރައީސް މުއިއްޒު ވިދާޅުވީ، ވެމްކޯ އިން މިހާރު މަސައްކަތް ކުރަމުންދަނީ އެ ކުންފުނީގެ މަސައްކަތް މިހާރު އޮތްގޮތަށްވުރެން އިތުރަށް ހަރުދަނާ ކުރެއްވުމަށް ކަމުގައެވެ.

މިހާރުވެސް ކުރަމުންމިދާ މަސައްކަތަކީ ރައްޔިތުންނަށް ލުއިފަސޭހަ ކޮށްދިނުން ކަމަށްވެސް ރައީސް މުޢިއްޒު ވިދާޅުވިއެވެ.

ރައީސް ޑރ.މުޢިއްޒު ވިދާޅުވީ، ކުނީގެ ޓަނަކަށް 750 ރުފިޔާއަށް ވެމްކޯއިން ކުނިއުކާލުމުގެ ޚިދުމަތް ދެމުންގެންދާތީ ރައްޔިތުންނަށް އެކަން ވެގެން ދަނީ ވަރަށް ބޮޑު ތަކުލީފަކަށް ކަމަށެވެ.

މިކަންކަމަށް ލުއިތަކެއް ހޯދައިދިނުމަށް އިސްވެރިންނާ މަޝްވަރާވެސް ކޮށްފައިވާ ކަމަށް ރައީސް ޑރ.މުޢިއްޒު ވިދާޅުވިއެވެ.

ރައީސް ޑރ.މުޢިއްޒު ވިދާޅުވީ މިކަން މާ ލަސްތަކެއް ނުވެ އިއުލާން ކުރެވިގެންދާނެ ކަމަށެވެ.

ކުނީގެ މައްސަލަ ރާއްޖޭގައި ވަރަށް ބޮޑުވެފައިވާއިރު، މި ރަމަޟާންމަހާ ދިމާކޮށް އާދަޔާޚިލާފަށް ގިނަ ކުނިތަކެއް މާލޭގެ އެކި ސަރަހައްދުތަކަށް އާންމުން ދަނީ އުކާލަމުންނެވެ.

މިކަމާ ގުޅިގެން މާލޭ ސިޓީ ކައުންސިލާއި ވެމްކޯ ގުޅިގެން ކުރިއަށް ގެންދާ މަސައްކަތުގައި ދުވާލެއްގެ މައްޗަށް އެތައް ޓަނެއްގެ ކުނި ނަގަމުން އެބަގެންދެއެވެ.

ގިނަ ދިވެހިންގެ ޝަކުވާއަކަށް ވެފައިވެސް އޮންނަނީ ކުނި އުކާލުމަށް ވެމްކޯއިން ދެމުން ގެންދާ ޚިދުމަތުގެ އަގު ނުބައްދަލު ކަމުގައެވެ.

ރައީސް މުޢިއްޒުގެ މި ނިންމެވުމުން ދިވެހި ރައްޔިތުންނަށް ވަރަށް ބޮޑަށް ލުއިފަސޭހަ ވެގެންދާނެއެވެ.