ޑޮލަރުގެ އަގު ދަށްވުމާ ގުޅޭގޮތުން ކުރީގެ ރައީސް އަބްދުالله ޔާމީން އަބްދުލްގައްޔޫމް ދެއްކެވި ވާހަކައަށް އިކޮނޮމިކް މިނިސްޓަރު މުޙައްމަދު ސަޢީދު ހޫނު ރައްދެއް ދެއްވައިފިއެވެ. 

ކުރީގެ ރަައީސް ރޭ ވިދާޅުވީ، އަދުގެ ސަރުކާރު އައުމާއެކު ޑޮލަރުގެ އަގު ދަށްވީ މަޝްރޫއުތައް ހުއްޓާލާފައި އޮތުމުން ކަމަށެވެ. 

ރައީސް ޔާމީން މިފަދައިން ވިދާޅުވެފައިވަނީ ނިމިދިޔަ ސަރުކާރުން ކުރަން ފަށާފައިވާ އެކިއެކި މަޝްރޫޢުތައް މި ސަރުކާރުން ހުއްޓާލައްވާފައިވާ ކަމަށް ވިދާޅުވެ އެމްޑީޕީންވެސް ފާޑުކިޔަމުންދާ ދަނޑިވަޅެއްގައެވެ.

Advertisement

ރައީސް ޔާމީނުގެ މި ވާހަކަތަކަށް ރައްދުދެއްވައި މިނިސްޓަރު ސަޢީދު މިއަދު އެކްސްގައި ކުރި ޕޯސްޓެއްގައި ވިދާޅުވީ ޑޮލަރުގެ އަގު އަދިވެސް ދާނީ ދަށަށް ކަމަށެވެ.

ސަބަބެއްގެ ގޮތުގައި މިނިސްޓަރު ސަޢީދު ފާހަގަކުރެއްވީ، އެގޮތަށް އެކަންއެވަނީ، ރައީސް މުޢިއްޒުގެ ސަރުކާރުން އަޅުއްވަމުން ގެންދަވާ ހަރުދަނާ ފިޔަވަޅުތަކުގެ ސަބަބުން ކަމަށެވެ.

މީގެ އިތުރުން ނިމިދިޔަ ސަރުކާރުގެ މަޝްރޫޢުތައް މި ސަރުކާރުގައި ހުއްޓާލާފައިވާކަމަށް ދެކެވޭ ވާހަކައަށް ރައްދުދެއްވައި މިނިސްޓަރު ސަޢީދު ވިދާޅުވީ ކުރިން ހުއްޓިފައިވާ އެތައް މަޝްރޫޢުތަކެއް އެދަނީ އެއްވެސް ވެރިކަމެއްގައި މިހާ ކުރީކޮޅު ކުރިއަށްނުދާ ބާރުމިނުގައި ކުރިއަށް ކަމަށެވެ.

މިނިސްޓަރު ސަޢީދު ވިދާޅުވީ، ރާއްޖެއަށް ދިމާވެފައިވާ އެއްމެބޮޑު އެއް މައަސަލައަކީ ވެރިކަންކޮށް ފައިބާ ފަރާތްތަކަށް އެހެންވެރިއަކު ވެރިކަންކުރާ މަންޒަރު ޙަޖަމްނުވުން ކަމުގައެވެ.