މޯލްޑިވިއަން އަށް 5.6 މިލިއަން ރުފިޔަާ ނުދައްކައިގެން އެ ކުންފުނިން އެމްޑީޕީގެ މައްޗަށް ދަޢުވާކުރަން ކޯޓަށް ހުށަހަޅައިފިއެވެ.

"ވޮއިސް" އަށް މައުލޫމާތު ދެއްވަމުން މޯލްޑިވިއަންގެ މެނޭޖިން ޑިރެކްޓާ އިބްރާހީމް އިޔާސް ވިދާޅުވީ، ނިމިދިޔަ ރިޔާސީ އިންތިޚާބުގެ ފުރަތަމަ ބުރާއި ދެވަނަ ބުރުގެ ދެމެދުގައި ދިޔަ ދުވަސްތަކުގައި އެމްޑީޕީން ކުރި ދަތުރުތަކުގެ ޓިކެޓުގެ ފައިސާ ނުދައްކާ ކަމުގައެވެ. 

އެޕާޓީން އެ މުއްދަތުގައި ނެގި ޓިކެޓުތަކުގެ ޖުމްލަ އަގު 5.6 މިލިއަން ރުފިޔާއަށް އަރާކަމަށް އެމްޑީ އިޔާސް ވިދާޅުވިއެވެ.

Advertisement

އިޔާސް ވިދާޅުވީ މޯލްޑިވިއަން އިން އަބަދުވެސް ޓިކެޓް ދޫކުރާނީ ވަގުތުން ފައިސާ ދައްކައިގެން ކަމުގައެވެ.

އެމްޑީޕީއާއި އެކު މަޝްވަރާކޮށް އެންމެ ލަސްވެގެން 48 ގަޑިއިރު ތެރޭ ޓިކެޓުގެ ފައިސާ ދެއްކުމަށް އެއްބަސްވެގެން ޓިކެޓް ދޫކުރިކަމަށް އިޔާސް ވިދާޅުވިއެވެ.

48 ގަޑިއިރުތެރޭ ދައްކަން އެއްބަސްވި ފައިސާއަށް 6 މަސްދުވަސް ވެގެން މިއަދާ ހިސާބަށް އައި އިރުވެސް އެފައިސާ ދައްކާފައި ނުވާކަން އިޔާސް ފާހަގަކުރެއްވިއެވެ.

އިޔާސް އިތުރަށް ވިދާޅުވީ މި މައްސަލަ މިއަދު ސިވިލް ކޯޓަށް ހުށަހެޅީ އެމްޑީޕީއަށް ތަކުރާރުކޮށް ފައިސާ ދެއްކުމަށް އެންގުމުންވެސް ފައިސާ ދައްކާފައި ނުވާތީ ކަމުގައެވެ. 

އެގޮތުން ލިޔެކިޔުމުން އެތައް ފަހަރަކު އަންގާފައިވާނެ ކަމަށާއި މި މުއްދަތުތަކުގައި ފައިސާ ނުދައްކައިފިނަމަ ޝަރުޢީ މަރުހަލާއަށް ގެންދާނެ ކަމަށް މޯލްޑިވިއަން އިން އެމްޑީޕީއަށް އަންގާފައިވީ ނަމަވެސް އެޕާޓީން އެއްވެސް ފައިސާ އެ މުއްދަތުގައި ކުރެއްވި އެއްވެސް ދަތުރަކަށް ދައްކާފައި ނުވާތީ އިތުރު ގޮތެއް ނެތިގެން މައްސަލަ ހުށަހެޅީކަމަށް އިޔާސް ވިދާޅުވިއެވެ.