ދަމުނަމާދަށް ހުރި މީހެއްގެ ފޯނާއި ވޮލެޓް ވަގަށް ނެގި ދެ މީހަކު ފުލުހުން ހައްޔަރުކޮށްފިއެވެ.
ފުލުހުން ބުނީ ރޭ ޞަލާހުއްދީން މިސްކިތުގައި ދަމުނަމާދަށް ހުރި އަންހެނެއްގެ ފޯނާއި ފައިސާތަކެއް ނެގި މައްސަލަ ރޭ މެންދަމު ތިނެއްހާއިރު އެ އިދާރާއަށް ރިޕޯޓު ކޮށްފައިވާކަމަށެވެ.
މި މައްސަލާގައި 36 އަހަރުގެ ދިވެހި ދެ ފިރިހެނުން ހައްޔަރުކޮށްފައިވާ ކަމަށްވެސް ފުލުހުން ބުނެއެވެ.
މި ރޯދަމަހު މިސްކިތްތަކުން ވައްކަން ކުރުމުގެ މައްސަލަތަކާއި މިސްކިތްތަކަށް ގެއްލުންދިނުމުގެ މައްސަލަތަކެއް ވަނީ ވަރަށް ބޮޑަށް ފެންމަތިވެފައެވެ.
މިގޮތުން ތަގުވާ މިސްކިތްތަކުން ހަތް ފަންކާ ވަގަށް ނަގާފައިވާއިރު، ދަރުމަވަންތަ މިސްކިތުން ވަނީ ދެ ފަންކާ އާއި ފެން މޯޓަރުވެސް ވަގަށް ނަގާފައެވެ. އެ މައްސަލާގައިވެސް މީހަކު ހައްޔަރުކޮށްފައި ވެއެވެ.
މީގެ އިތުރުން މިރޯދަ މަހު ބަންޑާރަ މިސްކިތުގެ އަންހެނުންގެ ފާހާަނާގެ ތަށި އަދި ވިޔަފާރިވެރިންގެ މިސްކިތުގެ އަންހެނުން ވުޟޫކުރާ ބައިގެ ފެން އިސްކުރުތަކަށް ވަރަށް ބޮޑަށް ގެއްލުންދީފައި ވެއެވެ.
މި މައްސަލަތައް ފުލުހުން ދަނީ އިތުރަށް ތަހުގީގުކުރަމުންނެވެ.
Advertisement
This content is created and paid for by advertisers and does not involve Voice Journalists
