މެއި 10 ގެ ފަހުން ރާއްޖޭގައި ބޭރު ސިފައިންގެ އެންމެ މީހަކުވެސް ނުހުންނާނެކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

ރައީސް މުޢިއްޒު މިފަދައިން ވިދާޅުވީ ހުޅުމާލޭގެ ދެވަނަ ފިޔަވަހީގެ ހިޔާ ސަރަހައްދުގައި ރައްޔިތުންނާ ބައްދަލުކުރައްވައި ރޭގައި ދެއްކެވި ވާހަކަފުޅުގައެވެ.

ރައީސް މުޢިއްޒު ވިދާޅުވީ ދިވެހިރާއްޖެ އަކީ ހަމަޖެހުމާއި މިނިވަންކަން އޮންނަ ރާއްޖެއެއްކަމަށެވެ. އެގޮތުން, މި ޤައުމަކީ ތާ އަބަދު މިނިވަން ގައުމެއްގެ ގޮތުގައި ބޭއްވުމަކީ އެމަނިކުފާނު ވެވަޑައިގެންނެވި ވައުދުފުޅެއްކަމަށް ރައީސް މުޢިއްޒު ވިދާޅުވިއެވެ. 

Advertisement

ރައީސް މުޢިއްޒު ވިދާޅުވީ ދެފަރާތުން ލިޔެކިއުމުގައި ސޮއިކުރައްވާ އެއްބަސްވިގޮތަށް މިކަން ތަންފީޒު ކުރައްވަމުން ގެންދަވާ ކަމަށެވެ.

މި ހިނގާ އޭޕްރީލް މަހުގެ ތެރޭގައި ދެވަނަ ޕްލެޓްފޯމްގައި ތިބި ބޭރުގެ ސިފައިން ފައިބާނެކަމަށާއި އަދި ތިންވަނަ ޕްލެޓްފޯމްގައި ތިބި ބޭރުގެ ސިފައިން ދެން އަންނަ މަހުގެ 10ގެ ކުރިން ފައިބާނެކަމަށް އެމަނިކުފާނު ވިދާޅުވިއެވެ.

ރައީސް މުޢިއްޒު ވިދާޅުވީ ބަދަލު ހިފުމުގެ ރޫހުގައި ތިބި ބައެއްގެ އަތްމައްޗަށް މަޖިލިސް ދޫކޮށްލާފިއްޔާ އެބޭފުޅުން ބަދަލު ހިފުމަށްޓަކައި ގައުމު ހަމަނުޖެހުމުގެ ތެރެއަށް ގެންދަވާނެ ކަމަށެވެ. 

ރައީސް މުޢިއްޒު ވަނީ އެކަން އެމިސްރާބަށް ނުގެންދިއުމަށް ސަރުކާރު ކެންޑިޑޭޓުން އިންތިހާބުކުރުމަށް އެދިވަޑައިގެންފައެވެ.