ވޭތުވެދިޔަ 4000 އަހަރު ދުވަހުގެ ތެރޭގައިވެސް ދިވެހި ރައްޔިތުންނަށް އެންމެ ބޮޑު އަނިޔާވެރިކަމެއް ކުރިމަތިކުރީ ނިމިދިޔަ، ރައީސް އިބްރާހިމް މުހައްމަދު ޞާލިހުގެ ސަރުކާރުންކަމަށް ރައީސް ޑރ މުހައްމަދު މުއިއްޒުގެ ހާއްސަ އެޑްވައިޒަރ އަދި ޕީއެންސީގެ ޗެއާޕާސަން އަބްދުއްރަހީމް އަބްދުالله ވިދާޅުވެއްޖެއެވެ.

ރައްޔިތުންގެ މަޖިލީހުގެ ބ އޭދަފުށީ ދާއިރާއަށް ޕީއެންސީގެ ފަރާތުން ވާދަކުރައްވާ ކެންޑިޑޭޓްގެ ކެމްޕެއިން ޖަލްސާއެއްގައި ވާހަކަދައްކަވަމުން އަބްދުއްރަހީމް ވިދާޅުވީ ރައީސް ޑރ މުހައްމަދު މުޢިއްޒު ވެރިކަން ކުރައްވަމުންދަނީ ހަމަހަމަ ކަމާއި އެކީގައި ރައްޔިތުންނާއި ގާތުންކަމަށެވެ. އަދި އެމަނިކުފާނު އުޅުއްވަނީ ފިއްލަވައިގެން ނޫންކަމަށާ ރައްޔިތުން ކުރައްވާ ސުވާލު ތަކަށް އެމަނިކުފާނު ޖަވާބު ދެއްވަމުންދާ ކަމަށެވެ. 

އަބްދުއްރަހީމް ވިދާޅުވީ، މި ސަރުކާރަށް ރައްޔިތުންގެ މަޖިލީހުގެ މެޖޯރިޓީ ބޭނުންވެގެންއުޅެނީ މިހާރުވެސް ކުރައްވަމުންދާ ގޮތުގެމަަތިން ވެރިކަން ކުރެއްވުމަށް ފަސޭހަކުރުމަށްކަމަށާ، ޕީއެންސީއިން ރައީސް މުއިއްޒުއާއިއެކު ދިވެހިންގެ ރާއްޖެއެއް ބިނާކުރުމަށް މަސައްކަތް ކުރަނީ ސަބަބުތަކެއް އޮވެގެންކަމަށެވެ.

Advertisement

އަބްދުއްރަހީމް ވިދާޅުވީ، ޕީޕީއެމްއަށް މެޖޯރިޓީ ދީފި ހާލަތެއްގައި މާލެ ރައްޔިތުންނަށް ގޯތިތައް ނުދޭނެކަމަށް އިދިކޮޅުން ބުނާ ކަމަށާ އެހެންނަމަވެސް މި ސަރުކާރު ވެރިކަމަށް އައީ މާލެ ރައްޔިތުންނަށް ގޯތި ދޭންކަމަށެވެ. އޭނާ ވިދާޅުވީ، ރައީސް މުއިއްޒު އާއި ސަރުކާރުން މަސައްކަތްކުރަމުންދަނީ މާލެ އަދި ރާއްޖޭގެ ހުރިހާ ރައްޔިތުނަށްވެސް ބޯހިޔާވަހިކަމުގެ މައްސަލަ ހައްލުކޮށްދިނުމަަށްކަމަށެވެ.

އަބްދުއްރަހީމް ވިދާޅުވީ، ގެދޮރުވެރިކަމަށް ބޭނުން ޖެހިފައިވާ ހުރިހާ ރައްޔިތުންނަށް ގެދޮރުވެރިކަން ހާސިލުކޮށްދޭނީ ރައީސް މުއިއްޒުގެ ސަރުކާރުންކަމަށާއި ރައްޔިތުންގެ މަޖިލީހުގެ މެޖޯރިޓީ ބޭނުން ވެގެން އުޅެނީ އެކަމަށް ބޭނުންވާ ގާނޫނުތައް ހެދުމަށް ކަމަށެވެ. 

އަމިއްލަ އެދުމެއް ނެތި ރައްޔިތުންގެ ހައްގުގައި ވަކާލާތުކުރާނެ މެމްބަރުންތަކެއް މަޖިލީހަށް އައިސްގެން ނޫންގޮތަކަށް ދިވެހިންގެ ރާއްޖެއެއް ބިނާނުވާނެ ކަން ފާހަގަކުރައްވައި އަބްދުއްރަހީމް ވުދާޅުވީ އެކަން ކުރެވޭނީ ދިވެހިންގެ ވިސްނުމާއި ހިޔާލުތައް ތަމްސީލުވެގެންދާހެން މަޖިލީހަށް ދިވެހިންގެ ރާއްޖެ ވަދެގެންކަމަށެވެ.