އައްޑޫސިޓީގެ އިގްތިޞާދީ މަރުތަޅު ނެއްޓުވޭނީ ސަރުކާރު ކެންޑިޑޭޓުންނަށް ކަމަށް ރައްޔިތުންގެ މަޖިލީހުގް އައްޑޫ ފޭދޫ ދާއިރާގެ މެންބަރު މުޙައްމަދު ނިހާދު ވިދާޅުވެއްޖެއެވެ.
މެންބަރު ނިހާދު އެކްސްގައި މިއަދު ކުރެއްވި ޕޯސްޓެއްގައި ވިދާޅުވެފައިވަނީ، މިއަދު އިދިކޮޅަށް މަޖިލީސް ދީގެން ވީ އެއްވެސް ފައިދާއެއް ނެތް ކަމަށެވެ.
އަދި ސަރުކާރު ކެންޑިޑޭޓުން ހޮވައި ސަރުކާރަށް އެއްބާރުލުން ދިނުމުން ކަންކަން ކުރެވިގެންދާނެ ކަމަށްވެސް ނިހާދު ވިދާޅުވިއެވެ.
އައްޑޫސިޓީގެ އިގްތިޞާދީ ހާލަތު މިއަދު އޮތްގޮތް ފާހަގަކުރައްވައި ނިހާދު ވިދާޅުވީ، އައްޑޫސިޓީގެ އިގްތިޞާދީ މަރުތަޅު ނައްޓުވައި ފުދުންތެރި ބަޔަކަށް ވުމަށް މިފަހަރުގެ ރައްޔިތުންގެ މަޖިލީހުގެ އިންތިޚާބުގައި ސަރުކާރު ކެންޑިޑޭޓުން އިންތިޚާބުކުރުން ލާޒިމުކަމުގައެވެ.
ނިހާދު މިހެން ވިދާޅުވެފައިވާއިރު، އެމްޑީޕީން އަންނަނީ ނިމިދިޔަ ސަރުކާރުގައި ފަށާފައިވާ މަޝްރޫޢުތައް މިސަރުކާރުގައި ހުއްޓާލާފައިވާ ކަމަށާއި، މި ސަރުކާރު އައިފަހުން އިގްތިޞާދީ ހާލަތު ދަށަށް ގޮސްފައިވާ ކަމަށް ވިދާޅުވެ ސަރުކާރަށް ވަރަށް ބޮޑަށް ފާޑުވިދާޅުވަމުންނެވެ.
ނަމަވެސް، ރައީސް ޑރ.މުޙައްމަދު މުޢިއްޒު ވަނީ އެމްޑީޕީން ކުރައްވަމުން ގެންދަވާ ތުހުމަތުތަކަށް ރައްދުދެއްވާ، މަޝްރޫޢުތައް ހުއްޓަވާލެއްވީ އެމްޑީޕީގެ ސަރުކާރުގައި ކަމަށާއި، މި ސަރުކާރުގައި އެ ހުއްޓާލާފައިވާ މަޝްރޫޢުތަކުގެ އިތުރުންވެސް ފަށާފައި ހުރި އެކި އެކި މަޝްރޫޢޫތައް އަދަދުތަކުން ޙިއްސާ ކުރައްވާފައެވެ.
Advertisement
This content is created and paid for by advertisers and does not involve Voice Journalists
