ރައްޔިތުންގެ މަޖިލީހަށް ވައްދަން ހެޔޮނުވާވަރުގެ ވިއްސަކަށް މެމްބަރުން މި އިންތިޚާބުގައި ވާދަކުރައްވާ ކަމަށް ރައީސް ޑރ މުހައްމަދު މުއިއްޒުގެ ހާއްސަ އެޑްވައިޒަރު އަދި މިފަހަރުގެ މަޖިލިސް އިންތިޚާބުގެ ފޮނަދޫ ދާއިރާއަށް ވާދަކުރައްވާ ސަރުކާރު ކެންޑިޑޭޓް، ޢަބްދުއްރަޙީމް ޢަބްދުالله ވިދާޅުވެއްޖެއެވެ.

ޢަބްދުއްރަހީމް މިފަދައިން ވިދާޅުވެފައިވަނީ އޭނާގެ ކެމްޕެއިން ހަރަކާތުގައި ރޭ ވާހަކަ ދައްކަވަމުންނެވެ.

ޢަބްދުއްރަޙީމް ވިދާޅުވީ، ރައްޔިތުންގެ މަޖިލީހުގެ މެޖޯރިޓީ ޕީޕީއެމް/ޕީއެންސީ އަށް ބޭނުން ވަނީ ކުރީ ސަރުކާރުން ގާނޫނީ އިމުގެ ބޭރުން ކޮށްފައިވާ ކަންތައްތައް ހަމަޔަކަށް އެޅުވުމަށް ކަމަށެވެ.

Advertisement

މި ސަރުކާރުގައި ރައީސް ޑރ.މުޙައްމަދު މުޢިއްޒުގެ މެނިފެސްޓޯ ތަންފީޒުކުރުމަށްޓަކައި މަޖިލީހުގެ ތެރެއިން 200 އަށްވުރެން ގިނަ ބިލު ފާސްކުރަންޖެހިފައިވާކަން ފާހަގަކުރައްވައި އަބްދުއްރަހީމް ވިދާޅުވީ، އެ ބިލުތައް ފާސްކުރެވޭނީ ގައުމާއި ރައްޔިތުންގެ ހައްގުތައް އިސްކުރާ ބަޔަކަށް ކަމަށެވެ.

އެފަދަ ސިފަތަކެއް ވާދަވެރި ފަރާތްތަކުގެ ކިބައިން ފެންނަން ނެތްކަމަށްވެސް އަބްދުއްރަހީމް ވިދާޅުވިއެވެ.

ޢަބްދުއްރަޙީމް އިތުރަށް ވިދާޅުވީ، ރައްޔިތުންގެ މަޖިލީހަށް ވައްދަން ހެޔޮ ނުވާވަރުގެ މެންބަރުން ވާދަކުރައްވާ ކަމަށާއި މިކަންކަމަށް ދިވެހި ރައްޔިތުން ވިސްނާ ސަމާލުވުމަށެވެ. 

ނަމަވެސް އެއީ ކޮން މެންބަރުންތަކެއް ކަމެއް ޢަބްދުއްރަހީމް ހާމަކުރައްވާފައެއް ނުވެއެވެ.

ޖުމްލަ 93 ދާއިރާގެ ކެންޑިޑޭޓުން މަޖިލީސް އިންތިޚާބުގައި ވާދަކުރައްވާއިރު، 3 ދާއިރާއެއް ފިޔަވައި ދެންހުރި ހުރިހާ ދާއިރާއެއްގައި ޕީޕީއެމް / ޕީއެންސީ ކެންޑިޑޭޓަކު ވާދަކުރައްވައެވެ.