މި ގައުމުގެ ކުޑަކުދިން ކުށުގެ ވެށިން ސަލާމަތްކުރެވޭނީ މަޖިލީހަށް ސަރުކާރުގެ ސުޕާމެޖޯރިޓީ ދީގެންކަމަށް އެމްއެމްޕީއާރުސީގެ މެނޭޖިންގ ޑިރެކްޓާ ފާތިމަތު ތައުފީޤް ވިދާޅުވެއްޖެއެވެ.

އެމްޑީ ފާތިމަތު ތައުފީގު މިފަދައިން ވިދާޅުވެފައިވަނީ، އއ. ރަސްދޫގައި ހުކުރު ދުވަހުގެރޭ ތަރާވީސް ނަމާދު ކުރަމުންދިޔަ ވަގުތު މިސްކިތުގެ ފާޚަނާބަރީގައި ކުޑަ ކުއްޖަކަށް އަނިޔާކުރި މައްސަލަ ފެންމަތިވުމާ ގުޅިގެންނެވެ.

ވަރަށް ސީރިއަސް މައްސަލައެއްގެ ގޮތުގައި ފުލުހުން މި މައްސަލަ ބަލަމުން އަންނައިރު، ފުލުހުން ވަނީ އަނިޔާކުރިކަމަށް ތުހުމަތު ކުރެވޭ 13 އަހަރާއި 14 އަހަރުގެ ކުއްޖަކު ދެނެގަނެފައެވެ.

ނަމަވެސް، އާންމު ރައްޔިތުން ފުލުހުން އެކަމާ ގުޅިގެން ކޮށްފައިވާ ޕޯސްޓަށްވެސް ނުރުހުން ފާޅުކޮށް ބުނެފައިވަނީ މިކަމަށް އިންސާފު ލިބުމަށްވުރެން ގާތީ ނުލިބުންކަމަށެވެ. 

ސަބަބެއްކަމުގައި ބުނަމުން އަންނަނީ ޤާނޫނު އަސާސީގައި 18 އަހަރުން ދަށުގެ ކޮންމެ ކުއްޖަކީ ކުޑަކުއްޖެއް ކަމުގައި ކަނޑައަޅާފައިވާހިނދު، މި ކުދިންނަށް ދީފައިވާ ރައްކާތެރިކަމުގެ ސަބަބުންނެވެ.

އެފަދަ ކުދިން މުޖުތަމަޢުގައި ކިތަންމެ ބޮޑު ޖަރީމާއެއް ހިންގިކަމުގައިވިޔަސް، އެކުދިންނަށް 18 އަހަރު ވެެގެން ނޫނީ ޖިނާއީ ބޮޑެތި ކުށްތަކުގެ އަދަބު ނުލިބޭތީ ރައްޔިތުން އަންނަނީ ކަންބޮޑުވުން ފާޅުކުރައްވަމުންނެވެ.

އެމްޑީ ފާތިމަތު ތައުފީޤު މިކަމާ ގުޅޭގޮތުން އިއްޔެ އެކްސްގައި ކުރެއްވި ޕޯސްޓެއްގައި ވިދާޅުވީ، ކުޑަކުދިން ކުށުގެ ވެށިން ސަލާމަތްކުރެވޭނީ ސަރުކާރުގެ މެޖޯރިޓީ ލިބި މަޖިލީހުގެ ތެރެއިން ޤާނޫނުތައް އިސްލާހުކޮށްގެން ކަމަށެވެ.

އެމްޑީ އިތުރަށް ވިދާޅުވީ، މާޒީގައި ސުޕާމެޖޯރިޓީ ލިބި ފެއިލް ވެފައި ތިބި ބަޔަކު މިއަދުގެ ހާލަތަށް ޒިންމާވާނެޖެހޭނެ ކަމަށެވެ.